ଭୁବନେଶ୍ବର, ପିପିଲି ବିଧାନସଭା ଆସନ ଖାଲି ପଡିବାର 6 ମାସରୁ ଅଧିକ ସମୟ ବିତିଗଲାଣି। କାରଣ ଏହି ଆସନରୁ ପ୍ରତିନିଧିତ୍ବ କରୁଥିବା ବିଧାୟକ ପ୍ରଦୀପ ମହାରଥୀଙ୍କର ଗତ ବର୍ଷ ଅକ୍ଟୋବର 4 ତାରିଖରେ ପରଲୋକ ଘଟିଛି। ମାର୍ଚ୍ଚ 4 ତାରିଖକୁ ଏହା ଛଅ ମାସ ପୁରଣ କରି ସାରିଲାଣି। ହେଲେ ଭାରତ ନିର୍ବାଚନ କମିସନ ଏ ପର୍ଯ୍ୟନ୍ତ ପିପିଲି ଉପନିର୍ବାଚନ ପାଇଁ ତାରିଖ ଘୋଷଣା କଲେ ନାହିଁ।
ଭାରତରେ ପ୍ରଣୟନ ହୋଇଥିବା ରିପ୍ରେଜେଣ୍ଟସନ ଅଫ ପିପୁଲ ଆକ୍ଟ 1951 ଅନୁଯାୟୀ କୌଣସ ବିଧାନସଭା ଆସନ ଖାଲି ପଡିଲେ ତାହାକୁ ଛଅ ମାସ ମଧ୍ୟରେ ପୁରଣ କରିବାର ଆବଶ୍ୟକତା ରହିଛି। ଧାରା 149 ଏବଂ 151-କ ଅନୁସାରେ ନିର୍ବାଚନ କମିସନର ଏହି ଆସନ ପାଇଁ ଉପନିର୍ବାଚନ ତାରିଖ ଘୋଷଣା କରି ନିର୍ବାଚନ କରିବା ଉଚିତ୍। ହେଲେ ପିପିଲି କ୍ଷେତ୍ରରେ ତାହା ଏ ପର୍ଯ୍ୟନ୍ତ ହୋଇପାରି ନାହିଁ।
କେବଳ ପିପିଲି ଘଟଣା ନୁହେଁ ଏକଦା ବିଜେପୁର ଉପନିର୍ବାଚନ ବେଳକୁ ସମାନ ସ୍ଥିତି ଉପୁଜିଥିଲା। ସେତେବେଳେ ଦୀର୍ଘ ମାସଧରି ଏହି ଆସନ ଖାଲି ପଡିଥିଲେ ମଧ୍ୟ ନିର୍ବାଚନ କମିସନ ଉପ ନିର୍ବାଚନ ପାଇଁ ତାରିଖ ଘୋଷଣା କରି ନ ଥିଲେ। ଫଳରେ ସେତେବେଳେ ସାଧାରଣରେ ଲୋକଙ୍କର ବିଜେପି ପ୍ରତି ସନ୍ଦେହ ସୃଷ୍ଟି ହୋଇଥିଲା। ଏପରକି ବିରୋଧୀମାନେ ମଧ୍ୟ ବିଜେପି ପ୍ରତି ଅଙ୍ଗୁଳି ନିର୍ଦ୍ଦେଶ କରିଥିଲେ। ବିଜେପି ହାରିଯିବା ଭୟରେ ସେ ଜାଣିଶୁଣି ଏପରି କାର୍ଯ୍ୟ କରୁଛି ବୋଲି ଅଭିଯୋଗ ହୋଇଥିଲା।
ସେହିପରି ସମାନ ସ୍ଥିତି ବର୍ତ୍ତମାନ ପିପିଲି ଘଟଣାରେ ହେଉଛି ବୋଲି ଅଭିଯୋଗ ହେଲାଣି। କାରଣ ନିୟମ ରହିଥିଲେ ମଧ୍ୟ ପିପିଲି ଉପନିର୍ବାଚନ ତାରିଖ ଘୋଷଣା ନ ହେବା କେଉଁଠି ନା କେଉଁଠି ବିଜେପି ପ୍ରତି ସନ୍ଦେହ ସୃଷ୍ଟି ହୋଇଛି। ପିପିଲିରେ ବିଜେପି ହାରିଯିବା ଭୟ ହେଉ କିମ୍ବା ପ୍ରଦୀପ ମହାରଥୀଙ୍କ ମୃତ୍ୟୁର ସମବେଦନାକୁ ହ୍ରାସ କରିବା ହେଉ, ବିଜେପି ଏପରି କରୁଛି ବୋଲି ଆଲୋଚନା ଚାଲିଛି।
ପିପିଲି ପରି ବିଜେଡି ଗଡରେ ବିରୋଧୀ ଦଳର କୌଣସି ସ୍ଥିତି ନାହିଁ କହିଲେ ଅତ୍ୟୁକ୍ତି ହେବ ନାହିଁ। କାରଣ ସେଠାରେ ଗୋଟିଏ ପଟେ ପ୍ରଦୀପ ମହାରାଥୀ ପରି ରଥୀ ଏବଂ ଅନ୍ୟପଟେ ବିଜେଡି ପରି ଶକ୍ତିଶାଳୀ ଦଳ, ସେଥିପାଇଁ ଅନ୍ୟ କୌଣସି ପ୍ରାର୍ଥୀଙ୍କର ସ୍ଥିତି ରହିବ ନାହିଁ ବୋଲି ସମସ୍ତେ ଅନୁମାନ କରିସାରିଲେଣି। କେବଳ ନିର୍ବାଚନ ଲଢିବା ନାମରେ ଯୁଦ୍ଧ କରାଯିବ ସିନା, ଫଳ କଣ ହେବ ତାହା ଅନ୍ୟଦଳ ହୃଦୟଙ୍ଗମ କରିସାରିଲେଣି। ତେଣୁ ଉପନିର୍ବାଚନ ଦିନ ଗଡାଇ ଲାଭ କିଛି ନାହିଁ ବୋଲି ମଧ୍ୟ ବିଜେପି ବୁଝିବା ଆବଶ୍ୟକ।
ଅନ୍ୟପଟେ ପିପିଲି ଉପନିର୍ବାଚନ ତାରିଖ ଘୋଷଣା ନେଇ ଉଚ୍ଚ ନ୍ୟାୟାଳୟରେ ଏକ ମାମଲା ମଧ୍ୟ ଦାୟର କରାଯାଇଛି। ଆବେଦନକାରୀଙ୍କ ପକ୍ଷରୁ ଆଇନୀଜୀବୀ ସିଦ୍ଧାର୍ଥ ଦାସ ମାମଲା ଲଢୁଛନ୍ତି। ସେଥିରେ ଦର୍ଶାଯାଇଛି ଯେ, ରିପ୍ରେଜେଣ୍ଟସନ ଅଫ ପିପୁଲ ଆକ୍ଟ 1951 ଅନୁଯାୟୀ ଖାଲି ପଡିଥିବା ବିଧାନସଭା ଆସନରେ ଛଅ ମାସ ମଧ୍ୟରେ ତାହା ପୁରଣ ହେବା ଆବଶ୍ୟକ। ଯଦି ଆଇନି ଶୃଙ୍ଖଳା ପରିସ୍ଥିତି ଖରାପ ଥିବ ତେବେ ତାହାର ଅବଧୀ ଘୁଞ୍ଚି ପାରେ। ହେଲେ ଓଡିଶାରେ କିମ୍ବା ପିପିଲିରେ ସେପରି କୌଣସି ପରିସ୍ଥିତି ନ ଥିଲେ ମଧ୍ୟ କଣ ପାଇଁ ଉପନିର୍ବାଚନ ଘୋଷଣା କରାଯାଉ ନାହିଁ ସେ ନେଇ ମାମାଲା ଋଜୁ କରାଯାଇଛି। ଫଳରେ ପିପିଲି ଉପ ନିର୍ବାଚନ ନେଇ ଅନିଶ୍ଚିତତା ଲାଗି ରହିଛି।
