ଭୁବନେଶ୍ବର, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ରାଜ୍ୟ କ୍ୟାବିନେଟ ବୈଠକ ଆଜି ଅପରାହ୍ନରେ ବସିଥିଲା।ଏହି ବୈଠକରେ ଗ୍ରାମାଞ୍ଚଳର ଉନ୍ନତି ପାଇଁ ବହୁ କାର୍ଯ୍ୟକ୍ରମକୁ କ୍ୟାବିନେଟ ମଂଜୁରୀ ମିଳିଛି। ଆଗକୁ ପଞ୍ଚାୟତ ନିର୍ବାଚନକୁ ଦୃଷ୍ଟିରେ ରଖି ଏହି ନିଷ୍ପତି ଗ୍ରହଣ କରାଯାଇଛି।
ଏହି ବୈଠକରେ ମୋଟ ପନ୍ଦରଟି ପ୍ରସ୍ତାବକୁ କ୍ୟାବିନେଟ ମଂଜୁରୀ ପ୍ରଦାନ କରିଛନ୍ତି। ଏଥିରେ ଇଲେକ୍ଟ୍ରୋନିକ୍ ଏବଂ ସୂଚନା ପ୍ରଯୁକ୍ତିବିଦ୍ୟା, ଦକ୍ଷତା ବିକାଶ ଏବଂ ବୈଷୟିକ ଶିକ୍ଷା, ସାଧାରଣ ପ୍ରଶାସନ, ଗୃହ ପଞ୍ଚାୟତିରାଜ, ସହରାଞ୍ଚଳ ବିକାଶ ବିଭାଗର ପ୍ରସ୍ତାବ ରହିଛି।
କ୍ୟାବିନେଟର ନିଷ୍ପତ୍ତି ବିଷୟରେ ଅବଗତ କରାଇ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର କହିଛନ୍ତି ଯେ ଗୁରୁତ୍ୱପୂର୍ଣ୍ଣ ନିଷ୍ପତ୍ତିରେ ଭୁବନେଶ୍ୱରରେ ଓଡିଶା ଟେକ୍ନୋଲୋଜି ଏବଂ ଗବେଷଣା ବିଶ୍ୱବିଦ୍ୟାଳୟ ପ୍ରତିଷ୍ଠା ହେବ। ଭୁବନେଶ୍ବରରେ ଥିବା ସିଇଟି କଲେଜକୁ ଏକକ ବିଶ୍ବବିଦ୍ୟାଳୟ ମାନ୍ୟତା ଦେଇ ଏହି ନୂଆ ନାମରେ ନାମିତ କରାଯିବ। ଏ ନେଇ କ୍ୟାବିନେଟ ନିଷ୍ପତି ଗ୍ରହଣ କରିଛନ୍ତି।
ସେହିପରି କେଉଁଝର ଜିଲ୍ଲାର ଯୋଡା ଏବଂ ଚମ୍ପୁଆକୁ ଜଳ ଯୋଗାଣର ଉନ୍ନତି, ସୁନ୍ଦରଗଡ ଜିଲ୍ଲାର ବିସ୍ରା, ଲାଠିକାଟା, ଲାହୁନିପଡା ଏବଂ ବଣେଇ ବ୍ଲକ ପାଇଁ ମେଗା ପାଇପ୍ ଜଳ ଯୋଗାଣ ପ୍ରକଳ୍ପକୁ ମଧ୍ୟ କ୍ୟାବିନେଟ ଅନୁମୋଦନ କରିଛନ୍ତି।
ସୁନ୍ଦରଗଡ ଜିଲ୍ଲାର ଲେପ୍ରିପାରା, ଟାଙ୍ଗାରାପାଲି, ସୁନ୍ଦରଗଡ, ବରଗାଁ, ସୁବଦେଗା ଏବଂ ବାଲିସାନକରା ବ୍ଲକ ପାଇଁ ମେଗା ପାଇପ୍ ଜଳ ଯୋଗାଣ ପ୍ରକଳ୍ପକୁ ମଧ୍ୟ କ୍ୟାବିନେଟ ଅନୁମୋଦନ କରିଛନ୍ତି। କଟକ ଜିଲ୍ଲାର ଆଠଗଡ ଏବଂ ତିଗିରିଆ ବ୍ଲକର ସମସ୍ତ ଗ୍ରାମ ପାଇଁ ମେଗା ପାଇପ୍ ଜଳ ଯୋଗାଣ ପ୍ରକଳ୍ପକୁ ମଧ୍ୟ ମଂଜୁର ମିଳିଛି।
ଏହା ବ୍ୟତୀତ ସୁନ୍ଦରଗଡ ଜିଲ୍ଲାର ଡୁଡୁକା-ଗୋପାଳପୁର-ଟପାରିଆ ରାସ୍ତାର 2-ଲେନର ଉନ୍ନତି ପାଇଁ ମଧ୍ୟ ଅନୁମୋଦନ କରାଯାଇଛି। ଏହି ବୈଠକରେ ଓଡିଶା ସିଭିଲ ସର୍ଭିସ , ବିଭାଗୀୟ ମୁଖ୍ୟ କାର୍ଯ୍ୟାଳୟର ସମାନ କ୍ୟାଡର, ଜେଲ୍ ଫାର୍ମାସିଷ୍ଟ ସେବା ଏବଂ ଓଡିଶା ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀଙ୍କ ସେବା ସମ୍ବନ୍ଧୀୟ ନିୟମକୁ ମଧ୍ୟ ବିଚାର କରାଯାଇ ଅନୁମୋଦନ କରାଯାଇଛି।
ଏଥିସହ କ୍ୟାବିନେଟ ବୈଠକରେ ପୁରୀ ପାଇଁ ମୌଳିକ ସୁବିଧା ତଥା ଐତିହ୍ୟ ସ୍ଥାପତ୍ୟର ବିକାଶ ପାଇଁ ଲାଗୁ ହୋଇଥିବା ‘ଅଭଡା’ ଯୋଜନାର ଅଧୀନରେ ଖଣ୍ଡେଲାଇଟ୍ ବ୍ଲକ୍ ଯୋଗାଣ ପାଇଁ ରୟାଲଟି ଏବଂ ଅନ୍ୟାନ୍ୟ ଆଇନଗତ ଦେୟ ମଧ୍ୟ ଛାଡକୁ କ୍ୟାବିନେଟ ଅନୁମୋଦନ କରିଛନ୍ତି।