ଗୁରୁ ଦିବସ: ଜଣେ ବ୍ୟକ୍ତି ଜଣେ ଶିକ୍ଷକ ଙ୍କୁ ପ୍ରଶ୍ନ କଲେ, ଆମେ ବି ଚାକିରୀ କରି ଦରମା ପାଉଛୁ, ଆପଣ ବି ଦରମା ନେଇ ପାଠ ପଢ଼ାଉଛନ୍ତି ହେଲେ ଆପଣ ମାନଙ୍କୁ ଏତେ ଉପରେ କାହିଁ ବସାଯାଉଛି ମୁଁ କିଛି ବୁଝି ପାରୁନି। ଈଶ୍ୱର ଏତେ ଆଖ୍ୟା ଦେବାର କାରଣ କଣ?
ଶିକ୍ଷକ ଜଣକ ଅଳ୍ପ ଟିକେ ହସି ଦେଇ କହିଲେ – ଆପଣ ପୁରା ଠିକ କହିଲେ ଆଜ୍ଞା। ଆମେ ଆପଣଙ୍କ ପରି ଚାକିରୀ କରି ଦରମା ପାଉଛୁ ଏଥିରେ ଆମର କିଛି ବାହାଦୁରି ନାହିଁ। ପରିବାର ପୋଷିବା କୁ ଏ ଦରମା ଗଣ୍ଡାକ ପାଇଁ ଆମେ ମାସ ଯାକ ଚାହିଁ ରହିଥାଉ। ଲାଞ୍ଚ ନେଇ ଫାଇଲ ଏପଟ ସେପଟ କରିବାର ସୁଯୋଗ ଆମ ଚାକିରୀ ରେ ନାହିଁ କି ଅନ୍ୟ କାହାର ବୁକୁଚା ବୋହି ଶୁଖିଲା ରାଜନୀତି କରି ଦି ପଇସା କମେଇବା ର ଅଯଥା ଇଚ୍ଛା ମଧ୍ୟ ଆମ ମାନଙ୍କର ନାହିଁ ।
ସାଧା ସିଧା ଜୀବନ ବଞ୍ଚିବା ଭିତରେ ଏବଂ ନିଜ ଅପେକ୍ଷା ଅନ୍ୟ ମାନଙ୍କ କଥା ଅଧିକ ଚିନ୍ତା କରୁ କେବେ ଆମ ମାନଙ୍କ ଚାକିରୀ ସରିଯାଏ ଓ ଆମେ ମାନେ କେବେ ଅନ୍ୟ ମାନଙ୍କ ପାଇଁ ଅଖୋଜା ଅଲୋଡ଼ା ହେଇ ଯାଉ ଜଣା ପଡ଼େନି ।
ଆଉ ରହିଲା ଦରମା କଥା, କହୁଛି ଶୁଣନ୍ତୁ ..
ଆମେ ଆପଣ ମାନଙ୍କ ଛୁଆ ଙ୍କୁ ଏମିତି କିଛି ଦାନ କରୁ ଯାହାର ମୂଲ୍ୟ କେହି ବି ଦେଇପାରିବେନି। ଓଡ଼ିଆ ରେ ତାକୁ ବିଦ୍ୟା କହନ୍ତି ଏବଂ ଇଂରାଜୀ ରେ knowledge, ଯାହାକୁ ସେ ବ୍ୟବହାର କରି ଭବିଷ୍ୟତ ରେ ସେ ତା ନିଜ ସହ ପରିବାର ପୋଷିବା ପାଇଁ ସକ୍ଷମ ହୁଏ। ହେଇପାରେ ୟା ପାଇଁ ଆମେ ଦରମା ନେଉ, ହେଲେ ଆପଣ କହି ପାରିବେ ଆପଣଙ୍କ ଛୁଆ କୁ ନିସ୍ଵାର୍ଥପର ଭାବେ ଗେଲ୍ହା କରିବାକୁ ଆମେ କେବେ ପଇସା ମାଗିଛୁ?
ଆପଣଙ୍କ ଛୁଆ ଆପଣ ମାନଙ୍କୁ ଛାଡି ଆମ ପାଖରେ ଦିନକୁ ଆଠ ଘଣ୍ଟା ଧରି ରହେ, ତାର ସମସ୍ତ ଭଲ ମନ୍ଦ, ସୁଖ ଦୁଃଖ, କଣ ଖାଇକି ଆସିଛି ନା ନାହିଁ, ଯଦି ନଖାଇଛି ଭୋକ ହଉଛି କି ପଚାରି ବୁଝିବା ପାଇଁ ଆମେ କେବେ ପଇସା ମାଗିଛୁ? ଆପଣଙ୍କ ଛୁଆ ର ମୁହଁ ଶୁଖି ଯାଇଥିଲେ ବାପା ରେ ମାଆ ରେ କହି ତା ମୁଣ୍ଡ ଆଉଁସି ତାର କଣ ହେଇଛି ବୋଲି ପଚାରି ବୁଝିବାକୁ ଓ ତା ଓଠରେ ଟିକେ ହସ ଫୁଟେଇବାକୁ ନିଜକୁ ଜୋକର କରିବା କୁ ବି ଆମେ କେବେ ପଛ ଘୁଞ୍ଚା ଦେଇନୁ, ସେଥିପାଇଁ ଆମେ କେବେ ପଇସା ମାଗିଛୁ?
ଯଦି ଖେଳ ଛୁଟି ରେ ସବୁ ପିଲା ଟିଫିନ ଖାଉଥିବା ସମୟରେ ଯଦି କୌଣସି ଛୁଆ ଚିଫିନ୍ ନ ଆଣି ମୁହଁ ଶୁଖେଇ ଠିଆ ହେଇଥିବା ସମୟରେ ଆମ ଆଖି ପଡିଯାଇଛି ଓ ତାକୁ ଡାକି ଯେତେବେଳେ ଆମେ କହିଛୁ ମା ରେ କି ବାପା ରେ ଆଜି ଅନ୍ୟ ସା’ରେମାନେ ଟିଫିନ ଆଣିଥିଲେ ଖାଇଦେଇ ପେଟ ପୁରା ହେଇଯାଇଛି ତ, ଏ ଟିଫିନ ଟା ଦୟାକରି ଖାଇଦେବୁ ଏବଂ ଛୁଆ ଟି ଟିଫିନ ଖାଇବାର ଦେଖି ଯେତେବେଳେ ଆମେ ଖୁସି ହେଇଛୁ ସେଥିପାଇଁ ଆମେ ପଇସା ମାଗିଛୁ?
କେମିତି ଆପଣ ମାନଙ୍କ ଛୁଆ ପରୀକ୍ଷା ରେ ଭଲ କରିବ, କାହିଁ ସେ ଛୁଆ ଟିର ପାଠ ହଉନି, କଣ ତା ପାଇଁ କରାଯାଇପାରିବ ଘରେ ବସି ନିରୋଳା ରେ ଚିନ୍ତା କରିବା ପାଇଁ ଆମେ ପଇସା ମାଗିଛୁ? ଆପଣଙ୍କ ଛୁଆ ଡରି ଯାଉଥିବା ସମୟରେ ତା କାନ୍ଧ ରେ ହାତ ପକାଇ ଯେତେବେଳେ ଆମେ କହୁ “ଡରନା ରେ ମା କି ଡରନା ରେ ବାପା, ମୁଁ ଅଛି ପା” ସେତେବେଳେ କଣ ଆମେ ପଇସା ମାଗିଛୁ? ଭୁଲ କଲେ ନିଜ ଛୁଆ ଭଳି ଆକଟ କରିବା ପାଇଁ ଓ ଭଲ କାମ କଲେ ପିଠି ଥାପୁଡ଼େଇ ଆଗକୁ ବଢିବାକୁ ପ୍ରେରଣା ଦେବା ପାଇଁ ଆମେ କେବେ ପଇସା ମାଗିଛୁ? ଆପଣଙ୍କ ପିଲା ଜଣେ ଦକ୍ଷ ଓ ସଫଳ ମଣିଷ ହେଇଗଲା ପରେ ଯେତେବେଳେ ସେ ଆମ ସାମ୍ନା କୁ ଆସେ ଓ ଆମ ମନ କୁଣ୍ଢେମୋଟ ହେଇଯାଏ, ଆମେ ତାକୁ କୁଣ୍ଡେଇ ପକେଇ ଖୁସିରେ କାନ୍ଦି ପକାଉ, ସେଥିପାଇଁ ଆମେ ପଇସା ମାଗିଛୁ?
ଏ ସବୁ ର ହିସାବ କଲେ ନା ସରକାର ଆମ ଋଣ ସୁଝି ପାରିବେ ନା ଆପଣ ମାନେ। ଆମେ ଛୁଆଙ୍କ ପାଇଁ ବଞ୍ଚିଛୁ ଓ ଛୁଆ ଙ୍କ ପାଇଁ ମରିବୁ ତେଣିକି ଯେ ଯାହା କହୁଛି କହୁ। ସତରେ ଶିକ୍ଷକ ଙ୍କ ମନ କଥା ଓ ତାଙ୍କ ଅବଦାନ କୁ ବୁଝିବାର ଶକ୍ତି ନା ଆଜି ଯାଏ କାହାର ହେଲାଣି ନା ହବ।