ନୂଆଦିଲ୍ଲୀ : ଗତକାଲି କେରଳ ହାଇକୋର୍ଟ ଦେଶରେ ଟୀକାରଣ ନେଇ ଏକ ମାମଲାର ଶୁଣାଣି କରି ଏକ ନୂଆ ମତ ଦେଇଛନ୍ତି। କୋର୍ଟ କହିଛନ୍ତି ଯେ, କେନ୍ଦ୍ର ସରକାର କୋଭିଡ19 ଟୀକାକରଣ କରି ଦେଶର ନାଗରିକଙ୍କୁ ଦୁଇ ଭାଗରେ ବିଭକ୍ତ କରିଦେଲେ। ଗୋଟିଏ ବର୍ଗରେ ନାଗରିକ, ଯେଉଁମାନେ କୋଭାକ୍ସିନ୍ ଟିକା ନେଇଛନ୍ତି ସେମାନଙ୍କର ବିଦେଶକୁ ଯିବା ପ୍ରତିବନ୍ଧକ ଥିବାବେଳେ ଦ୍ୱିତୀୟ ଶ୍ରେଣୀରେ ନାଗରିକମାନେ ଅଛନ୍ତି, ଯେଉଁମାନେ କୋଭିସିଲ୍ଡ ଟିକା ଗ୍ରହଣ କରିଛନ୍ତି ଏବଂ ସେମାନେ ଯେ କୈଣସି ସ୍ଥାନକୁ ଯାଇପାରିବେ।
କୋର୍ଟ କହିଛନ୍ତି ଯେ କେନ୍ଦ୍ରର ଏହି ପଦକ୍ଷେପ ଆବେଦନକାରୀଙ୍କ ମୌଳିକ ଅଧିକାରକୁ ଉଲ୍ଲଂଘନ କରିଛି। ଜଷ୍ଟିସ୍ ପିଭି ଉନିକ୍ରିଷ୍ଣନ୍ କହିଛନ୍ତି ଯେ, ଆନ୍ତର୍ଜାତୀୟ ସ୍ତରର ସ୍ୱୀକୃତିପ୍ରାପ୍ତ ଟୀକାକରଣର କରାଯିବା ଉଚିତ। ଫଳରେ କାମ କରିବାକୁ ବିଦେଶ ଯିବାକୁ ଚାହୁଁଥିବା ବ୍ୟକ୍ତିଙ୍କ ମୌଳିକ ଅଧିକାର ଅକ୍ଷୁର୍ଣ୍ଣ ରହିପାରିବ।
ସାଉଦି ଆରବରେ ଫିଟର ଭାବରେ କାର୍ଯ୍ୟ କରୁଥିବା ଜଣେ ବ୍ୟକ୍ତି ବିଦେଶ ଯିବାକୁ ଚାହୁଥିଲେ ମଧ୍ୟ ସେ ଯାଇପାରୁ ନ ଥିଲେ। କାରଣ ହେଲା ସେ କୋଭାକ୍ସିନର ଦୁଇଟି ଡୋଜ୍ ନେଇଛନ୍ତି ଯାହା ଗଲ୍ଫ ଦେଶରେ ସ୍ୱୀକୃତିପ୍ରାପ୍ତ କିମ୍ବା ଅନୁମୋଦିତ ନୁହେଁ। ଏହା ଦ୍ବାରା ସେ ନିଜର ରୋଜଗାର କରିବାରେ ଅସମର୍ଥ ହୋଇଛନ୍ତି ବୋଲି ଆବେଦନ କରିଛନ୍ତି।
ଶୁଣାଣି ସମୟରେ କେନ୍ଦ୍ର କୋର୍ଟଙ୍କୁ କହିଛନ୍ତି ଯେ ସୁପ୍ରିମକୋର୍ଟରେ ଏଭଳି ଏକ ମାମଲା ବିଚାରାଧୀନ ଅଛି, ଯାହା ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ର ନିଷ୍ପତ୍ତିକୁ ଅପେକ୍ଷା କରିବା ଉଚିତ ହେବ ବୋଲି କହିଥିଲେ। ତେବେ ଏହାର ନିଷ୍ପତି କରି କେନ୍ଦ୍ର କୋର୍ଟଙ୍କୁ ଅବଗତ କରାନ୍ତୁ ବୋଲି ନିର୍ଦ୍ଦେଶ ଦିଆଯାଇଛି।
ଏପରିକି କୋର୍ଟ କହିଛନ୍ତି ଯେ ଯଦି ଏହି ନିଷ୍ପତ୍ତି ନେବାକୁ କେନ୍ଦ୍ର ଅଧିକ ସମୟ ନେବାକୁ ଚାହୁଁଛି, ତେବେ ବିଦେଶରେ କାର୍ଯ୍ୟ କରିବା ସମୟରେ ଆବେଦନକାରୀ ବିଦେଶରେ ଯେତିକି ଦରମା ପାଉଛନ୍ତି ତାଙ୍କୁ ସେତିକି ଅର୍ଥ ପ୍ରଦାନ କରିବାକୁ ନିର୍ଦ୍ଦେଶ ଦେଇଛନ୍ତି। ବିଚାରପତି କହିଛନ୍ତି ଯେ ଏ କ୍ଷେତ୍ରରେ କୋର୍ଟ କେବଳ ଦର୍ଶକଙ୍କ ପରି ଚୁପଚାପ୍ ବସିପାରିବେ ନାହିଁ। ଏହାର ପରବର୍ତ୍ତି ଶୁଣାଣି ଆସନ୍ତାକାଲି କରାଯିବ।
