ନୂଆଦିଲ୍ଲୀ: ଅମରନାଥ ଯାତ୍ରା ଆରମ୍ଭ ହେବା ପୂର୍ବରୁ ଆତଙ୍କବାଦୀ ସଂଗଠନ ପକ୍ଷରୁ ଧମକ ଦିଆଯାଇଛି। ଆତଙ୍କବାଦୀ ସଂଗଠନ ଟିଆରଏଫର ଧମକପୂର୍ଣ୍ଣ ଚିଠି ଏକ ସମୟରେ ସାମ୍ନାକୁ ଆସିଛି, ଯେତେବେଳେ ଅମରନାଥ ଯାତ୍ରା ଜୁନ୍ ୩୦ ତାରିଖରୁ ଆରମ୍ଭ ହେବାକୁ ଯାଉଛି। ଟିଆରଏଫ ପକ୍ଷରୁ ଏକ ଧମକପୂର୍ଣ୍ଣ ଚିଠି ଜାରି କରି ଏଥର ରାଷ୍ଟ୍ରିୟ ସ୍ଵୟଂ ସେବକ ସଂଗଠନ (ଆରଏସଏସ) ଏବଂ କେନ୍ଦ୍ର ସରକାରଙ୍କୁ ଟାର୍ଗେଟ କରାଯାଇଛି।
ଆତଙ୍କବାଦୀ ସଂଗଠନ ଟିଆରଏଫ ଅମରନାଥ ଯାତ୍ରା ସମ୍ପର୍କରେ ଏକ ଧମକ ପତ୍ର ଜାରି କରିଛି। ଏହି ଚିଠିରେ ଆତଙ୍କବାଦୀ ସଂଗଠନ ରାଷ୍ଟ୍ରିୟ ସ୍ଵୟଂ ସେବକ ସଂଗଠନ (ଆରଏସଏସ) କୁ ଟାର୍ଗେଟ କରିଛି। ସଂଗଠନ କହିଛି ଯେ, ସେମାନେ ଏହି ଯାତ୍ରା ବିରୁଦ୍ଧରେ ନାହାଁନ୍ତି। କିନ୍ତୁ ତୀର୍ଥଯାତ୍ରୀମାନେ ସେପର୍ଯ୍ୟନ୍ତ ସୁରକ୍ଷିତ ଅଛନ୍ତି, ଯେପର୍ଯ୍ୟନ୍ତ ସେମାନେ କାଶ୍ମୀର ପ୍ରସଙ୍ଗରେ ଯୋଗ ନ ଦିଅନ୍ତି।
ଅନ୍ୟପକ୍ଷରେ ନିଷିଦ୍ଧ ଆତଙ୍କବାଦୀ ସଂଗଠନ ଲଶ୍କର / ଟିଆରଏଫର ୨ ଟି ସ୍ଥାନୀୟ ହାଇବ୍ରିଡ ଆତଙ୍କବାଦୀଙ୍କୁ ଶ୍ରୀନଗର ପୋଲିସ ଗିରଫ କରିଛି। ଆଇଜି କାଶ୍ମୀର କହିଛନ୍ତି ଯେ, ୧୫ ଟି ପିସ୍ତଲ, ୩୦ ଟି ମାଗାଜିନ, ୩୦୦ ରାଉଣ୍ଡ ଏବଂ ୧ ଟି ସାଇଲେନ୍ସର ସହିତ ସାମଗ୍ରୀ, ଅସ୍ତ୍ରଶସ୍ତ୍ର ଏବଂ ଗୁଳି ଜବତ କରାଯାଇଛି। ଏ ବାବଦରେ ଏକ ମାମଲା ରୁଜୁ ହୋଇଛି ଏବଂ ବର୍ତ୍ତମାନ ତଦନ୍ତ ଚାଲିଛି। ପୋଲିସ ଏହାକୁ ନିଜ ପାଇଁ ଏକ ବଡ଼ ସଫଳତା ବୋଲି ବିଚାର କରୁଛି।
ଜମ୍ମୁ କାଶ୍ମୀରର ଲେଫ୍ଟନାଣ୍ଟ ଗଭର୍ଣ୍ଣର ମନୋଜ ସିହ୍ନା ଚଳିତ ବର୍ଷ ବାର୍ଷିକ ଅମରନାଥ ଯାତ୍ରା ସହ ଜଡିତ ସମସ୍ତ କାର୍ଯ୍ୟ ଶେଷ କରିବାର ସମୟ ସୀମା ଧାର୍ଯ୍ୟ କରିଛନ୍ତି ଏବଂ ତୀର୍ଥଯାତ୍ରୀମାନଙ୍କ ପାଇଁ ସର୍ବୋତ୍ତମ ସୁବିଧା ସୁନିଶ୍ଚିତ କରିବା ପ୍ରଶାସନର ପ୍ରାଥମିକତା ବୋଲି ସେ କହିଛନ୍ତି।