ଭୁବନେଶ୍ବର: ଆଜି ସୁପ୍ରିମକୋର୍ଟରେ ଶ୍ରୀମନ୍ଦିର ପରିକ୍ରମା ପ୍ରକଳ୍ପର ଐତିହାସିକ ରାୟ ଆସିବା ପରେ ସମସ୍ତେ ବେଶ ଖୁସିପ୍ରକଟ କରିଛନ୍ତି। ବିଶେଷ କରି ଯେଉଁମାନେ ଜଗନ୍ନାଥ ସେବକ ସେମାନେ ବେଶ ଖୁସି ପ୍ରକଟ କରିଛନ୍ତି। କାରଣ ସେମାନେ ଏହି ପ୍ରକଳ୍ପ ପାଇଁ ଜମି ଘର ଯୋଗାଇ ଦେଇଛନ୍ତି।
ଆଜି ରାୟ ଆସିବା ପରେ ପୁରୀର ସେବାୟତମାନେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସାକ୍ଷାତ କରି ଅଭିନନ୍ଦନ ଜଣାଇଛନ୍ତି। ନବୀନ ନିବାସରେ ସେମାନେ ଏହି ପ୍ରକଳ୍ପ ସଂପର୍କରେ ମୁଖ୍ୟମନ୍ତ୍ରୀ ଏବଂ ସଚିବ ଭି କେ ପାଣ୍ଡିୟାନଙ୍କ ସହିତ ଆଲୋଚନା କରିଛନ୍ତି। ଏହି ପ୍ରକଳ୍ପ କିପରି ଶିଘ୍ର ଶେଷ ହେବ ସେ ନେଇ ପଦକ୍ଷେପ ନେବାକୁ ସେବାୟତମାନେ ମୁଖ୍ୟମନ୍ତ୍ରୀଙ୍କୁ ଅନୁରୋଧ କରିଛନ୍ତି।
ଆଜି ସୁପ୍ରିମକୋର୍ଟ ଶ୍ରୀମନ୍ଦିର ପ୍ରକଳ୍ପ ଉପରେ ଏକ ଐତିହାସିକ ରାୟ ପ୍ରଦାନ କରିଛନ୍ତି। ଏଥିରେ କୋର୍ଟ କହିଛନ୍ତି ଯେ, ଆବେଦନକାରୀ ଏହି ପ୍ରକଳ୍ପ ଉପରେ ଯେଉଁ ରହିତାଦେଶ ପାଇଁ ନିବେଦନ କରିଛନ୍ତି ତାହାକୁ ରଦ୍ଦ କରାଗଲା। ଏହା ସାମୁହିକ ଭକ୍ତଙ୍କ ସ୍ବାର୍ଥ ପାଇଁ କରାଯାଉଥିବାରୁ ଏହା ଉପରେ ରହିତାଦେଶ ଦିଆଯାଇପାରିବ ନାହିଁ। ଏଥିସହିତ ଆବେଦନକାରୀଙ୍କୁ କୋର୍ଟ ତୀବ୍ର ସମାଲୋଚନା ମଧ୍ୟ କରିଛନ୍ତି।
କୋର୍ଟ କହିଛନ୍ତି ଯେ, ଆବେଦନକାରୀ ଦ୍ବୟ ସେମାନେ ନିଜ ସ୍ବାର୍ଥ ପାଇଁ ଏପରି ଆବେଦନ କରିଛନ୍ତି। ଏଥିରେ କୋର୍ଟର ଅଯଥା ସମୟ ନଷ୍ଟ କରିଛନ୍ତି। ଏଥିପାଇଁ କୋର୍ଟ ଦୁଇ ଆବେଦନକାରୀଙ୍କୁ ଅର୍ଥ ଦଣ୍ଡରେ ଦଣ୍ଡିତ ମଧ୍ୟ କରିଛନ୍ତି। ଉଭୟଙ୍କୁ ଏକ ଲକ୍ଷ ଟଙ୍କା ଲେଖାଏଁ ଜରିମାନା କରିଛନ୍ତି।
