ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ବିତୀୟ ବିଦେଶ ଗସ୍ତର ଜାଣନ୍ତୁ ଏହି ୧୦ଟି କଥା

Published: Jun 19, 2022, 10:10 am IST

ଭୁବନେଶ୍ୱର: ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ୨୦ ତାରିଖରୁ ରୋମ ଏବଂ ଦୁବାଇ ଗସ୍ତରେ ଏକ ପ୍ରତିନିଧୀ ଦଳକୁ ନେଇ ଯାଉଛନ୍ତି। ରୋମରେ ବିଶ୍ବ ଖାଦ୍ୟ କାର୍ଯ୍ୟକ୍ରମ ବା WFP ର ହେଡ କ୍ୱାର୍ଟର୍ସ ପରିଦର୍ଶନ କରିବା ସହିତ ସେଠାରେ ଖାଦ୍ୟ ସୁରକ୍ଷା ଏବଂ ବିପର୍ଯ୍ୟୟ ପରିଚାଳନା କ୍ଷେତ୍ରରେ ଓଡିଶାର ପରିବର୍ତ୍ତନଶୀଳ ପଦକ୍ଷେପ ଉପରେ ସେ ବକ୍ତବ୍ୟ ରଖିବେ।  ତେବେ ଏହି ବିଦେଶ ଗସ୍ତ ନେଇ ଜାଣନ୍ତୁ ଏହି ୧୦ଟି କଥା।

୧-ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ରାଜନୈତିକ ଜୀବନର ୨୫ ବର୍ଷ ଏବଂ ମୁଖ୍ୟମନ୍ତ୍ରୀ ହେବାର ୨୨ ବର୍ଷ ମଧ୍ୟରେ ଏହା ହେଉଛି ତାଙ୍କର ଦ୍ବିତୀୟ ବିଦେଶ ଗସ୍ତ।

୨- ରାଜନୀତିକୁ ଆସିବା ପରେ ନବୀନ ପ୍ରଥମ ଥର ପାଇଁ ୨୦୧୨ ମସିହା ମେ’ ୨୨ ତାରିଖରେ ଲଣ୍ଡନ ଗସ୍ତରେ ଯାଇଥିଲେ। ହେଲେ ଏହି ଗସ୍ତ ବିଫଳ ହୋଇଥିଲା। କାରଣ ତାଙ୍କର ତତକାଳୀନ ପରାମର୍ଶଦାତା ପ୍ୟାରୀମୋହନ ମହାପାତ୍ରଙ୍କ ‘ମିଡନାଇଟ୍ ଅପରେସନ’ ଯୋଗୁ ନିଜର ଗସ୍ତ କାଂଟଛାଂଟ କରି ଓଡ଼ିଶା ଫେରିଥିଲେ।

୩- ଏଥର ମୁଖ୍ୟମନ୍ତ୍ରୀଙ୍କ ବିଦେଶ ଗସ୍ତରେ ତାଙ୍କ ସହିତ ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର,  5 ଟି ସଚିବ ଭି କେ ପାଣ୍ଡିଆନ୍, ଖାଦ୍ୟ ଏବଂ ଯୋଗାଣ ବିଭାଗର ପ୍ରମୁଖ ଶାସନ ସଚିବ ଭି ଭି ଯାଦବ, ଶିଳ୍ପ ବିଭାଗର ପ୍ରମୁଖ ଶାସନ ସଚିବ ହେମନ୍ତ ଶର୍ମା, ନୂଆଦିଲ୍ଲୀରେ ଅବସ୍ଥାପିତ ରେସିଡେଣ୍ଟ୍ କମିଶନର ରବିକାନ୍ତ ମଧ୍ୟ ଯାଉଛନ୍ତି।

୪- ବର୍ତ୍ତମାନ ବିଦେଶ ଗସ୍ତକାଳରେ ସେ ପ୍ରଥମେ ରୋମ ଯାଇ ସେଠାରେ କିଛିଦିନ ବିତାଇବେ। ସେଠାରେ ସେ ଜାତିସଂଘର WFP ମୁଖ୍ୟକାର୍ଯ୍ୟାଳୟରେ ବରିଷ୍ଠ ଅଧିକାରୀଙ୍କୁ ଭେଟିବା ସହିତ ଖାଦ୍ୟ ନିରପତ୍ତା ନେଇ ଓଡିଶା କେତେ ସଜାଗ ତାହା ଅନ୍ୟମାନଙ୍କ ସହିତ ଆଲୋଚନା କରିବେ।

୫-ରୋମ ଗସ୍ତ କାଳରେ ନବୀନ ଭାଟିକାନ ସିଟିରେ ପୋପଙ୍କୁ ସାକ୍ଷାତ କରିବେ। ନବୀନ ହେଉଛନ୍ତି ତୃତୀୟ ଭାରତୀୟ ରାଜନୈତିକ ବ୍ୟକ୍ତି ଯେ କି ପୋପଙ୍କୁ ସାକ୍ଷାତ କରିବେ। ଏହା ପୂର୍ବରୁ ଅଟଳ ବିହାରୀ ବାଜପେୟୀ ଏବଂ ନରେନ୍ଦ୍ର ମୋଦୀ ପୋପଙ୍କୁ ସାକ୍ଷାତ କରିଛନ୍ତି।

୬- ରୋମରେ ଅବସ୍ଥାନ କାଳରେ ସେ ୟୁରୋପର ବିଭିନ୍ନ ପ୍ରାନ୍ତରୁ ଆସିଥିବା ପ୍ରବାସୀ ଓଡିଆଙ୍କୁ ମଧ୍ୟ ଭେଟିବେ। ସେ ଓଡିଶାର କଳା ଏବଂ ସଂସ୍କୃତିର ପ୍ରଚାରରେ ପ୍ରବାସୀ ଓଡିଆଙ୍କୁ ଜଡିତ ହେବାର ସମ୍ଭାବ୍ୟ ଉପାୟ ବିଷୟରେ ଆଲୋଚନା କରିବେ ଏବଂ ସେମାନଙ୍କୁ ରାଜ୍ୟର ପରିବର୍ତ୍ତନଶୀଳ ଯାତ୍ରାରେ ଭାଗ ନେବାକୁ ଅନୁରୋଧ କରିବେ।

୭-ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ରୋମ ଗସ୍ତ ସାରି ୨୬ ତାରିଖ ଅପରାହ୍ନ ୩ ଟା ୨୫ରେ ଦୁବାଇ ଅଭିମୁଖେ ଗସ୍ତ କରିବେ। ଦୁବାଇରେ ୨୯ ତାରିଖରେ ଭାରତ ସରକାର ଓ ଫିକ୍କି ଦ୍ୱାରା ଆୟୋଜିତ ଓଡ଼ିଶା ଇନଭେଷ୍ଟର୍ସ ମିଟରେ ସେ ଯୋଗ ଦେବେ।

୮-ସେଠାରେ ନବୀନ ପଟ୍ଟନାୟକ ମଧ୍ୟ ପୂର୍ବ ଏବଂ ଦୁବାଇର ବିଭିନ୍ନ ଅଞ୍ଚଳର କେତେକ ନିବେଶକଙ୍କୁ ଭେଟିବେ। ସେଠାରେ ନିବେଶକମାନଙ୍କୁ ଓଡିଶାରେ ପୁଞ୍ଜି ବିନିଯୋଗ କରିବାକୁ ଆମନ୍ତ୍ରଣ କରିବେ ଏବଂ ସେମାନଙ୍କୁ ରାଜ୍ୟ ସରକାରଙ୍କ ସମସ୍ତ ସହଯୋଗ ଏବଂ ସୁବିଧା ଯୋଗାଇ ଦେବା ପାଇଁ ପ୍ରତିଶୃତି ଦେବେ। ସେ ମଧ୍ୟ ଏହି ଅଞ୍ଚଳର କିଛି ବଡ ନିବେଶକଙ୍କ ସହ ୱାନ ଟୁ ୱାନ ବୈଠକ କରିବାର କାର୍ଯ୍ୟକ୍ରମ ରହିଛି।

୯-ମୁଖ୍ୟମନ୍ତ୍ରୀ ଦୁବାଇରେ ମଧ୍ୟ ପ୍ରବାସୀ ଓଡିଆଙ୍କୁ ଭେଟିବେ ଏବଂ ସେମାନଙ୍କ ସହିତ ଗତ ଦୁଇ ଦଶନ୍ଧି ମଧ୍ୟରେ ଓଡିଶାର ପରିବର୍ତ୍ତନଶୀଳ ଯାତ୍ରା ବିଷୟରେ ଆଲୋଚନା କରିବେ ଏବଂ ସେମାନଙ୍କୁ ରାଜ୍ୟ ସରକାରଙ୍କ ସହଭାଗିତା ପାଇଁ ଆମନ୍ତ୍ରଣ କରିବେ।

୧୦- ୩୦ ତାରିଖ ୩ଟା ୨୫ ମିନିଟରେ ଦୁବାଇ ଛାଡ଼ି ରାତି ୮ଟା ୨୦ରେ ନୂଆଦିଲ୍ଲୀ ବିମାନ ବନ୍ଦରରେ ପହଞ୍ଚିବେ। ସେଠାରୁ ସେ ରାତି ୯ ଟା ୩୦ମିନିଟରେ ଭୁବନେଶ୍ୱର ଅଭିମୁଖେ ବାହାରିବେ। ଭୁବନେଶ୍ବରରେ ସେ ସାଢ଼େ ୧୧ଟାରେ ପହଂଚିବେ ବୋଲି କାର୍ଯ୍ୟକ୍ରମ ସ୍ଥିରୀକୃତ ହୋଇଛି।

Related posts