ଭୁବନେଶ୍ବର: ଆଜି ବିଧବଧ ଭାବେ ବ୍ରିଟେନର ରାଜା ଭାବେ ଦାୟିତ୍ବ ଗ୍ରହଣ କରିଛନ୍ତି ପ୍ରିନସ ଚାର୍ଲସ। ଏବେ ସେ କିଙ୍ଗ୍ ଚାର୍ଲସ। ମହାରାଣୀ ଏଲିଜାବେଥ ଦ୍ବିତୀୟଙ୍କ ମୃତ୍ୟୁ ପରେ ତାଙ୍କୁ ଏହି ଦାୟିତ୍ବ ମିଳିଛି। ଏ ନେଇ ବ୍ରିଟେନରେ ବେଶ ଖୁସିର ଲହର ଖେଳିଯାଇଛି। ହେଲେ ଆପଣ ଜାଣିଲେ ଆଶ୍ଚର୍ଯ୍ୟ ହେବେ ଯେ, ଏହା ମଧ୍ୟ ଓଡିଶା ପାଇଁ ଏକ ସ୍ମରଣୀୟ ଦିନ। କାରଣ ସେ ଏକଦା ଓଡିଶା ଗସ୍ତରେ ଆସିଥିଲେ।
ବିଶ୍ବ ପ୍ରସିଦ୍ଧ ଏହି ରାଜକୁମାର ଚାର୍ଲସ, ୧୯୮୦ ମସିହା ଡିସେମ୍ବର ୪ ତାରିଖରେ ଓଡିଶା ଗସ୍ତରେ ଆସିଥିଲେ। ସେତେବେଳେ ତାଙ୍କୁ ମାତ୍ର ୩୨ ବର୍ଷ ବୟସ ହୋଇଥିଲା। ସେ ଭୁବନେଶ୍ବରରେ ପହଞ୍ଚି ରାଜଭବନରେ ଅତିଥୀ ଭାବେ ରହିଥିଲେ। ସେତେବେଳେ ଓଡିଶାର ରାଜ୍ୟପାଳ ଥିଲେ ସିଏମ ପୁନାଚା ଏବଂ ମୁଖ୍ୟମନ୍ତ୍ରୀ ଥିଲେ ଜାନକୀ ବଲ୍ଲଭ ପଟ୍ଟନାୟକ।
ଏ ସଂପର୍କରେ ବିସ୍ତୁତ ତଥ୍ୟ ରଖିଛନ୍ତି ସିଏମ ପୁନାଚାଙ୍କ ପୁତ୍ର ଦେଶର ପ୍ରତିଷ୍ଠିତ ଲେଖକ ସି.ପି ବାଲିଆପ୍ପା। ସେ ସମୟର କେତେକ ଫଟୋ ମଧ୍ୟ ସେ ସେୟାର କରିଛନ୍ତି। ସେ ଲେଖିଛନ୍ତି ଯେ, ମୋ ବାପା ଓଡିଶାର ରାଜ୍ୟପାଳ ଥିବା ବେଳେ ପ୍ରିନସ ଚାର୍ଲସ ଓଡିଶା ଆସିଥିଲେ। ରାଜଭବନରେ ସେ ରାଜ୍ୟ ଅତିଥୀ ଭାବେ ରହିଥିଲେ। ମୋ ବାପା ଓ ମାଆ ତାଙ୍କୁ ଫୁଲତୋଡା ଦେଇ ସ୍ବାଗତ କରିଥିଲେ।
ଚାର୍ଲସଙ୍କର ଓଡିଶା ଗସ୍ତ ଥିଲା ସଂପୂର୍ଣ୍ଣ ସରକାରୀ ଗସ୍ତ। ସେଥିପାଇଁ ତାଙ୍କର ସୁରକ୍ଷା ସେତେବେଳେ କେନ୍ଦ୍ର ସରକାର ଦେଖୁଥିଲେ। ଚାର୍ଲସ ଭୁବନେଶ୍ବର ରହଣି ସମୟରେ ସେ ପିପିଲି ନିକଟସ୍ଥ ହରିପୁର ଗାଁକୁ ବୁଲିବାକୁ ଯାଇଥିଲେ। ସେତେବେଳେ ତାଙ୍କର ଗାଁ ପରିବେଶ ଦେଖିବା ପାଇଁ ବେଶ ଆଗ୍ରହ ଥିଲା। ସେଥିପାଇଁ ବ୍ୟାପକ ସୁରକ୍ଷା ଯୋଗାଇ ଦେଇ ତାଙ୍କୁ ସେହି ଗାଁକୁ ନିଆଯାଇଥିଲା। ସେତେବେଳେ ଗାଁ ର ଆର୍ଥିକ ପରିସ୍ଥିତି ଭଲ ନ ଥିବାରୁ ନୁଆଁଣିଆ ଚାଳ ଘର ସବୁ ଥିଲା।
ଚାର୍ଲସ ସେତେବେଳେ ଗାଁ ର ଘର ଦେଖି ଆଶ୍ଚର୍ଯ୍ୟ ହୋଇ ଯାଇଥିଲେ। ଗାଁ ରେ ଥିବା ନଡିଆ ଗଛ ଦେଖି ସେ ବେଶ ଖୁସି ମଧ୍ୟ ହୋଇ ଯାଇଥିଲେ। ସେତେବେଳେ ଗାଁ ରେ ହେଉଥିବା ନଡିଆ ତୋଳା ପ୍ରତିଯୋଗୀତା ମଧ୍ୟ ଦେଖିଥିଲେ। ଲୋକମାନେ ଏତେ ବଡ ଗଛ ଉପରକୁ କିପରି ଶିଘ୍ର ଚଢିଯାଉଛନ୍ତି ତାହା ଦେଖି ତାଙ୍କୁ ଆଶ୍ଚର୍ଯ୍ୟ ଲାଗିଥିଲା। ସେ ସେତେବେଳେ ଏକ ପଇଡ ମଧ୍ୟ ପିଇଥିଲେ। ଏଥିସହିତ ସେହି ଗାଁରେ ହେଉଥିବା ବେଙ୍ଗଳା ପକା ମଧ୍ୟ ଦେଖିଥିଲେ। ଏପରିକି ଜଣେ ପଖାଳ ଭାତ ଖାଉଥିବାର ଦେଖି ତାହା କେମିତି ହୁଏ ବୋଲି ସେ ସେତେବେଳେ ପାଖରେ ଥିବା ଅଫିସରଙ୍କୁ ପଚାରିଥିଲେ।
ବର୍ତ୍ତମାନ ସେ ବ୍ରିଟେନର ରାଜା ଭାବେ ଦାୟିତ୍ବ ନେଇଥିବାରୁ ଓଡିଶାର ସେହି ସ୍ମରଣୀୟ ମୂହୁର୍ତ୍ତକୁ କେବଳ ହରିପୁର ଗାଁ କାହିଁକି ସେତେବେଳର ଅନେକ ବ୍ୟକ୍ତିଙ୍କର ସ୍ମୃତି ପୁଣି ଥରେ ଉଦଜୀବିତ ହୋଇପଡିଛି।