ନୂଆଦିଲ୍ଲୀ: ଆସନ୍ତା ସାଧାରଣ ନିର୍ବାଚନ ପୂର୍ବରୁ ମୋଦୀ ନୂଆ ମନ୍ତ୍ରୀମଣ୍ଡଳ ଗଠନ କରିବେ। ସମ୍ଭବତଃ ଆସନ୍ତା ଜାନୁୟାରୀ ମାସରେ କିମ୍ବା ଶୀତ ଅଧିବେସନ ପରେ ପରେ ଏହି ଅଦଳବଦଳ ହେବ। ଏ ନେଇ ଜାତୀୟ ରାଜନୀତିରେ ବେଶ ଚର୍ଚ୍ଚା ଆରମ୍ଭ ହୋଇଯାଇଛି। କାରଣ ସାଧାରଣ ନିର୍ବାଚନ ହେବାକୁ ଆଉ ମାତ୍ର ବର୍ଷେ ସମୟ ରହିଲା। ଏହା ଭିତରେ କେନ୍ଦ୍ର ସରକାରଙ୍କୁ ସୁଦୃଢ କରିବାକୁ ପଡିବ। ସେ ନେଇ ମୋଦୀଶାହା ଅଙ୍କକଷା ଆରମ୍ଭ କରି ସାରିଲେଣି ବୋଲି କୁହାଯାଉଛି।
ନିକଟରେ ବିଜେପି ଗୁଜୁରାଟରେ ଏକ ବଡ ବିଜୟ କରିଥିବା ବେଳେ ହିମାଚଳ ପ୍ରଦେଶରେ ହାରିଯାଇଛି। କେନ୍ଦ୍ରରେ ସରକାରରେ ଥାଇ ହିମାଚଳରେ ହାରିବା ଉଭୟ ମୋଦୀଶାହାଙ୍କର ହଜମ ହୋଇ ନାହିଁ। ସେହିପରି ଦିଲ୍ଲୀ ମ୍ୟୁନିସପାଲ କରପୋର୍ରେସନରେ ମଧ୍ୟ ଦଳ ହାରିଯାଇଛି। ଏହାକୁ ନେଇ ଦଳ ଭିତରେ ବର୍ତ୍ତମାନ ବେଶ ଆଲୋଚନା ହେବାରେ ଲାଗିଛି।
ସେଥିପାଇଁ ଏବେଠାରୁ ସରକାର ଏବଂ ଦଳକୁ ମଧ୍ୟ ଯଦି ଠିକ ଭାବେ ସଜଡା ନ ଯାଏ ତେବେ ତାହା ସାଧାରଣ ନିର୍ବାଚନରେ ପ୍ରଭାବ ପଡିପାରେ ବୋଲି ଦଳ ଅନୁଭବ କରି ସାରିଲାଣି। ସେଥିପାଇଁ ପ୍ରଥମେ ମନ୍ତ୍ରୀମଣ୍ଡଳର ବଡ ପରିବର୍ତ୍ତନ କରାଯିବାର ସମ୍ଭାବନା ସୃଷ୍ଟି ହୋଇଛି।
ବିଗତ ଦିନରେ ମୋଦୀ ଯେଉଁ ନୂଆ ମନ୍ତ୍ରୀ ମଣ୍ଡଳ ଗଠନ କରିଥିଲେ ସେଥିରେ ବର୍ତ୍ତମାନ ଅନେକ ମନ୍ତ୍ରୀ ନିଜର ଦକ୍ଷତା ପ୍ରତିପାଦନ କରାଇପାରୁ ନାହାଁନ୍ତି। ଏପରିକି କେତେକ ମନ୍ତ୍ରୀଙ୍କୁ ଶକ୍ତିଶାଳି କରିଥିଲେ ମଧ୍ୟ ସେମାନେ ତାଙ୍କ ଅଞ୍ଚଳରେ ଯେପରି ପ୍ରଦର୍ଶନ କରିବା କଥା ତାହା କରି ଦେଖାଇ ପାରୁ ନାହାଁନ୍ତି। ସେଥିପାଇଁ ସେପରି ସାଂସଦଙ୍କୁ ମନ୍ତ୍ରୀ ମଣ୍ଡଳରୁ ବାହାର କରିବାକୁ ଚିନ୍ତା କରାଯାଉଛି।
ସେହିପରି ଗୁଜୁରାଟ, ହିମାଚଳ ପ୍ରଦେଶ, ଏମସିଡି ସହିତ ବିଭିନ୍ନ ରାଜ୍ୟରେ ଉପନିର୍ବାଚନ ହୋଇଯାଇଛି। ଏସବୁକୁ ନେଇ ଏକ ସମୀକ୍ଷା କରାଯାଉଛି। ଏଥିରେ କାହାର ଭୂମିକା କିପରି ଏବଂ କାହାପାଇଁ ଦଳ ଭଲ କରିପାରୁ ନାହିଁ ତାହାର ଏକ ହିସାବ ନିକାସ ମଧ୍ୟ କରାଯାଉଛି।ସେହି ଅନୁସାରେ ମନ୍ତ୍ରୀମଣ୍ଡଳର ରୂପରେଖ ପରିବର୍ତ୍ତନ ହେବ ବୋଲି କୁହାଯାଇଛି।
ଏହି ନୂଆ ବାହିନୀ ଆଗାମୀ ସାଧାରଣ ନିର୍ବାଚନ ତଥା କେତେକ ରାଜ୍ୟରେ ହେବାକୁ ଥିବା ବିଧାନସଭା ନିର୍ବାଚନ ପାଇଁ ଯୁଦ୍ଧ କରିବେ ବୋଲି ଜଣାପଡିଛି।
