ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିଷୟରେ ପାକିସ୍ତାନୀ ବୈଦେଶିକ ମନ୍ତ୍ରୀ ବିଲାୱାଲ ଭୁଟ୍ଟୋ ଜରଦାରୀଙ୍କ ଅପମାନଜନକ ମନ୍ତବ୍ୟକୁ ଅଖିଳ ଭାରତୀୟ ସୁଫି ସଜାଦାନସିନ୍ ପରିଷଦ ନିନ୍ଦା କରିଛି ଏବଂ ତାଙ୍କର ବିବୃତ୍ତିକୁ ବିଷାକ୍ତ ବୋଲି କହିଛି। ମିଳିତ ଜାତିସଂଘରେ ଏକ ସାମ୍ବାଦିକ ସମ୍ମିଳନୀରେ ବିଲାୱଲ ଭାରତ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉପରେ ଆପତ୍ତିଜନକ ବିବୃତ୍ତି ଦେଇଛନ୍ତି। ବିଲାୱଲଙ୍କ ଖରାପ ଟିପ୍ପଣୀକୁ ନେଇ ଭାରତର ଲୋକଙ୍କ ମଧ୍ୟରେ ବହୁତ ଅସନ୍ତୋଷ ରହିଛି।
ବିଲାୱଲଙ୍କ ଅଶ୍ଳୀଳ ମନ୍ତବ୍ୟକୁ ହତାଶରେ ଦିଆଯାଇଥିବା ବିବୃତ୍ତି ବୋଲି ଭାରତ କହିଛି। ଏଥି ସହିତ ଆଜି ପାକିସ୍ତାନର ବୈଦେଶିକ ମନ୍ତ୍ରୀଙ୍କ କୁଶପୁତ୍ତଳିକା ଦାହ କରିବା ସହ ସମଗ୍ର ଦେଶରେ ବିଜେପି ବିକ୍ଷୋଭ ପ୍ରଦର୍ଶନ କରିଛି।
ଅଖିଳ ଭାରତୀୟ ସୁଫି ସଜାଦାନସିନ୍ ପରିଷଦର ମୁଖ୍ୟ ହଜରତ ସୟଦ ନାସିରୁଦ୍ଦିନ ଚିସ୍ତି କହିଛନ୍ତି ଯେ, ପାକିସ୍ତାନୀ ବୈଦେଶିକ ମନ୍ତ୍ରୀ ପ୍ରଧାନମନ୍ତ୍ରୀ ମୋଦୀଙ୍କ ବିଷୟରେ ଅପମାନଜନକ ମନ୍ତବ୍ୟ ଦେଇ କେବଳ ତାଙ୍କ ସ୍ଥିତିକୁ ନୁହେଁ ବରଂ ସମଗ୍ର ପାକିସ୍ତାନର ଭାବମୂର୍ତ୍ତିକୁ କ୍ଷୁର୍ଣ୍ଣ କରିଛନ୍ତି। ଚିସ୍ତି କହିଛନ୍ତି ଯେ, ପାକିସ୍ତାନ ମନେରଖିବା ଉଚିତ୍ ଯେ, ଭାରତୀୟ ମୁସଲମାନମାନେ ତାଙ୍କ ଦେଶ ଅପେକ୍ଷା ଅଧିକ ସୁରକ୍ଷିତ ଏବଂ ଭଲ ସ୍ଥିତିରେ ଅଛନ୍ତି। ପାକିସ୍ତାନ ସରକାରଙ୍କ ନାକ ତଳେ ଆତଙ୍କବାଦୀ ଓସାମା ବିନ୍ ଲାଦେନକୁ ଆମେରିକୀୟ ସୈନ୍ୟବାହିନୀ ହତ୍ୟା କରିଥିବା କଥା ଭୁଟ୍ଟୋ ଭୁଲି ଯାଇଛନ୍ତି।
ଅଖିଳ ଭାରତୀୟ ସୁଫି ସଜାଦାନସିନ୍ ପରିଷଦର ମୁଖ୍ୟ କହିଛନ୍ତି ଯେ, ଭୁଟ୍ଟୋଙ୍କୁ ମୋର ପରାମର୍ଶ ଭାରତକୁ ପାକିସ୍ତାନ ସହ ତୁଳନା କରିବା ନୁହେଁ କାରଣ ଆମର ସମ୍ବିଧାନ ସମସ୍ତ ଧର୍ମର ସ୍ୱାଧୀନତାକୁ ନିଶ୍ଚିତ କରିଥାଏ। ସମସ୍ତ ମୁସଲମାନ ଭାରତୀୟ ହୋଇଥିବାରୁ ଗର୍ବିତ ଅନୁଭବ କରନ୍ତି।
