ଭୁବନେଶ୍ବର: ଓଡିଶାରେ ହେବ ଅନ୍ତର୍ଜାତୀୟ ଜି-୨୦ ବୈଠକ। ଏଥିରେ ଜି-୨୦ର ସଦସ୍ୟ ଥିବା ୨୦ଟି ରାଷ୍ଟ୍ରର ପ୍ରତିନିଧି ଓଡିଶା ଆସି ଏହି ସମ୍ମିଳନୀରେ ଯୋଗ ଦେବେ। ସେଥିପାଇଁ ଓଡିଶା ସରକାର ବର୍ତ୍ତମାନଠାରୁ ତତ୍ପରତା ପ୍ରକାଶ କରିଛନ୍ତି। ହକି ପରି ଅନ୍ତର୍ଜାତୀୟ ମ୍ୟାଚକୁ ସଫଳତାର ସହିତ ପରିଚାଳନା କରିଥିବାରୁ ଏହାକୁ ମଧ୍ୟ ସଫଳ କରିବା ପାଇଁ ରାଜ୍ୟ ସରକାର ପ୍ରଚେଷ୍ଠା ଆରମ୍ଭ କରିଛନ୍ତି।
ଜି-୨୦ କାର୍ଯ୍ୟକ୍ରମ ସୂଚନା ଅନୁଯାୟୀ ଓଡିଶାରେ ଦୁଇଟି ବିଷୟରେ ଆଲୋଚନା ହେବ ବୋଲି ନିଷ୍ପତି ହୋଇଛି। ତାହା ହେଲା ‘ସଂସ୍କୃତି’ ଏବଂ ‘ଶିକ୍ଷା’। ଆସନ୍ତା ଏପ୍ରିଲ ୨୪ ତାରିଖରୁ ୨୭ ତାରିଖ ପର୍ଯ୍ୟନ୍ତ ଶିକ୍ଷା ଉପରେ ଆଲୋଚନା କରାଯିବ। ସେହିପରି ସଂସ୍କୃତି ଉପରେ ଆଲୋଚନା ମେ ୧୪ ତାରିଖରୁ ୧୭ ତାରିଖ ପର୍ଯ୍ୟନ୍ତ ହେବ। ସମସ୍ତ ପ୍ରତିନିଧି ମେ ୧୬ ତାରିଖରେ କୋଣାର୍କ ପରିଭ୍ରମଣରେ ଯିବେ ବୋଲି ନିର୍ଦ୍ଧାରିତ ହୋଇଛି।
ପୂର୍ବରୁ ଅନୁମାନ କରାଯାଉଥିଲା ଯେ, ସଂସ୍କୃତି ବିଷୟରେ ଯେଉଁ ବୈଠକ ହେବ ତାହାକୁ ବିଶ୍ବ ଐତିହ୍ୟ କୋଣାର୍କରେ ଆୟୋଜନ କରାଯିବ। ହେଲେ କେନ୍ଦ୍ର ସରକାର ସମସ୍ତ ବୈଠକକୁ ଭୁବନେଶ୍ବରରେ କରିବା ପାଇଁ ପରାମର୍ଶ ଦେଇଥିବାରୁ ତାହାକୁ ବାତିଲ କରାଯାଇଛି।
ଏ ନେଇ ରାଜ୍ୟ ସରକାର ଶିଳ୍ପ ବିଭାଗକୁ ନୋଡାଲ ଏଜେନସି ଭାବେ ମନୋନିତ କରିଛନ୍ତି। ଏହି ବିଭାଗ ସମସ୍ତ ବୈଠକକୁ ପରିଚାଳନା କରିବେ। ତେବେ ଏହି ଅନ୍ତର୍ଜାତୀୟ ସମ୍ମିଳନୀ ଅନ୍ୟ ସ୍ଥାନରେ କିପରି ହେଉଛି ସେ ନେଇ ରାଜ୍ୟର ବରିଷ୍ଠ ଅଧିକାରୀମାନେ ବର୍ତ୍ତମାନ ଚାଲିଥିବା ବୈଠକରେ ଯୋଗଦେଇ ଅନୁଧ୍ୟାନ କରିବେ ବୋଲି ନିଷ୍ପତି ହୋଇଛି। ଏଥିସହିତ ମୁଖ୍ୟ ଶାସନ ସଚିବ ଏ ନେଇ ପ୍ରସ୍ତୁତି ବୈଠକ କରିବେ। ଏହି ବୈଠକରେ ରାଜ୍ୟର ବହୁ ବରିଷ୍ଠ ଅଧିକାରୀ ଯୋଗ ଦେବେ।
ଜି-୨୦ ସଦସ୍ୟ ରାଷ୍ଟ୍ରର ପ୍ରତିନିଧୀଙ୍କୁ ଓଡିଶା ଉପରେ ଏକ ଭଲ ଛବି ସୃଷ୍ଟି କରିବା ପାଇଁ ଭୁବନେଶ୍ବର ସ୍ମାର୍ଟ ସିଟି ଲିମିଟେଡ ମଧ୍ୟ ପଦକ୍ଷେପ ଆରମ୍ଭ କରିଛି। ନିକଟରେ ହକି ଚମ୍ପିୟାନସିପରେ ଯେପରି ଭୁବନେଶ୍ବରୁ ସଜେଇ ଦିଆଯାଇଥିଲା, ପୁଣି ଥରେ ସେହିପରି କରାଯିବ ବୋଲି ଜଣାପଡିଛି। ଏ ନେଇ କେତେକ ଅଧିକାରୀ ଭୁବନେଶ୍ବରର ବିଭିନ୍ନ ସ୍ଥାନ ବୁଲି ଅନୁଧ୍ୟାନ କରିସାରିଛନ୍ତି।
ଜି-୨୦ ର ବିଭିନ୍ନ ସମ୍ମିଳନୀ ବର୍ତ୍ତମାନ ଦେଶର ଭିନ୍ନ ଭିନ୍ନ ସ୍ଥାନରେ ଚାଲିଛି। ଏଥିରେ ପରିବେଷ ପରିବର୍ତ୍ତନ, ଅର୍ଥନୈତିକ ସ୍ଥିତି, ଶିଳ୍ପ, ବାଣିଜ୍ୟ, କୃଷି, ସ୍ବାସ୍ଥ୍ୟ ପରି ବହୁ ଗୁରୁତ୍ବପୂର୍ଣ୍ଣ ବିଷୟ ଉପରେ ଆଲୋଚନା ହେଉଛି। ଏହି ଜି-୨୦ ରେ ଆର୍ଜେଣ୍ଟିନା, ଅଷ୍ଟ୍ରେଲିଆ, ବ୍ରାଜିଲ, କାନାଡା, ଚୀନ୍, ଇୟୁ, ଫ୍ରାନ୍ସ, ଜର୍ମାନୀ, ଭାରତ, ଇଣ୍ଡୋନେସିଆ, ଇଟାଲୀ, ଜାପାନ, ମେକ୍ସିକୋ, ଋଷ, ସାଉଦି ଆରବ, ଦକ୍ଷିଣ ଆଫ୍ରିକା, ଦକ୍ଷିଣ କୋରିଆ, ତୁର୍କୀ, ବ୍ରିଟେନ ଏବଂ ଆମେରିକା ସଦସ୍ୟ ଅଛନ୍ତି।
