ସାଗରିକା
ଓଡ଼ିଶା ରାଜନୀତିରେ ଦୁଇ ପ୍ରମୁଖ ଦଳ ବିଜେଡ଼ି ଓ ବିଜେପି ମଧ୍ୟରେ ଏବେ ଘନିଷ୍ଠତା ନିବିଡ଼ ହେଉଛି କି ? ରାଜନୈତିକ ପାଣିପାଗରେ ଏହା କିଛି ବିଚିତ୍ର ନୁହେଁ। ବିରୋଧୀ ଦଳ ତଥା ଶାସକ ଦଳ ମଧ୍ୟରେ ତାଳମେଳ ରହିବା ବିକାଶ ଓ ପ୍ରଶାସନର ସୁବିଧା ନିହାତି ଜରୁରୀ। ବିରୋଧୀ ଦଳ ବା ଶାସକ ଦଳ ଯଦି ବିକାଶକୁ ଗୁରୁତ୍ବ ଦେବେ ତେବେ ସେହି ରାଜ୍ୟ ବା ଦେଶ ନିହାତି ଭାବରେ ଅଭିବୃଦ୍ଧି କରିବ ଏଥିରେ ସନ୍ଦେହ ନାହିଁ। ନିକଟରେ ସମାପ୍ତ ହୋଇଥିବା ନିର୍ବାଚନରେ ଓଡ଼ିଶାରେ ବିଜେଡ଼ିକୁ କଡା ଟକ୍କର ଦେଇ ମୁଖ୍ୟ ବିରୋଧୀ ଦଳ ଭାବେ ଉଭା ହୋଇଥିବା ଭାରତୀୟ ଜନତା ପାର୍ଟି ଅର୍ଥାତ୍ ବିଜେପି ନିର୍ବାଚନ ଫଳାଫଳ ଆସିବା ପରେ ରାଜ୍ୟରେ ନିଜର ଆଭିମୁଖ୍ୟକୁ ବଦଳାଇବା ଆରମ୍ଭ କରିଛି।। ନିର୍ବାଚନ ପୂର୍ବରୁ ବିଜେପି ବେଶ୍ ଆକ୍ରାମକ ଭାବରେ ବିଜେଡି ସରକାରକୁ ଟାର୍ଗେଟ୍ କରୁଥିବାବେଳେ ନିର୍ବାଚନ ପରେ ପୁଣି ପଞ୍ଚମ ଥର ପାଇଁ ଶାସନ କ୍ଷମତା ହାତେଇଥିବା ବିଜୁ ଜନତା ଦଳକୁ ସହଯୋଗର ହାତ ବଢାଇଛି।
ନିର୍ବାଚନ ପରେ ଫନି ପରବର୍ତ୍ତୀ ମୁକାବିଲା କ୍ଷେତ୍ରରେ ମଧ୍ୟ ଦୁଇ ଦଳ ବେଶ୍ ସହଯୋଗ କରିଥିଲେ। ଏପରିକି ବାତ୍ୟା ଫୋନି ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓଡିଶା ଗସ୍ତରେ ଆସି ଆକାଶମାର୍ଗରୁ ବାତ୍ୟା ପ୍ରଭାବିତ ଅଞ୍ଚଳ ବୁଲି ଦେଖିବା ସହ ଆଗୁଆ ସହାୟତା ରାଶି ମଧ୍ୟ ପ୍ରଦାନ କରିଥିଲେ। ଆଉ କେନ୍ଦ୍ର ଓ ରାଜ୍ୟ ମଧ୍ୟରେ ଥିବା ସମନ୍ୱୟକୁ ବେଶ ପ୍ରଂଶସା କରିଥିଲେ। ସେହିପରି ଭୁବନେଶ୍ବରର ବିଜେପି ସାଂସଦ ଅପରାଜିତା ଷଡଙ୍ଗୀ ଗତକାଲି ଅପରାହ୍ନରେ ସଚିବାଳୟ ଯାଇ ମୁଖ୍ୟମନ୍ତ୍ରୀଙ୍କ ସହିତ ସହରର ବିକାଶ ସଂପର୍କରେ ବେଶ୍ କିଛି ସମୟ ଆଲୋଚନା କରିଛନ୍ତି। ଦଳୀୟ ରାଜନୀତିରୁ ଉର୍ଦ୍ଧ୍ବରେ ରହି ରାଜ୍ୟ ତଥା ସହରର ଉନ୍ନତି ପାଇଁ କାର୍ଯ୍ୟ କରିବାକୁ ସରକାରଙ୍କ ସହଯୋଗ ନିତାନ୍ତ ଆବଶ୍ୟକ ବୋଲି ଅପରାଜିତା ନିଜ ବକ୍ତବ୍ୟରେ କହିଥିଲେ।
ସେହିପରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆସନ୍ତା ୮ ତାରିଖରେ ଦିଲ୍ଲୀ ଗସ୍ତରେ ଯିବେ। ୫ମ ପାଳି ସରକାରରେ ଏହା ନବୀନଙ୍କ ପ୍ରଥମ ଦିଲ୍ଲୀ ଗସ୍ତ ହେବ। ଏହି ଗସ୍ତ ଅବସରରେ ନବୀନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭେଟିବାର କାର୍ଯ୍ୟକ୍ରମ ରହିଛି। ଏହି ଭେଟଘାଟ ସମୟରେ ପ୍ରଧାନମନ୍ତ୍ରୀଙ୍କ ସାମ୍ନାରେ ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉଠାଇ ପାରନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଏହାପୂର୍ବରୁ କେନ୍ଦ୍ର ସହ ସମନ୍ୱୟ ରକ୍ଷା କରି ରାଜ୍ୟକୁ ବିକାଶ ପଥରେ ଆଗେଇ ନେବାକୁ ଏକ ସାକ୍ଷାତକାରରେ କହିଥିଲେ ନବୀନ। ସେହିଭଳି ପଞ୍ଚମ ଥର ମୁଖ୍ୟମନ୍ତ୍ରୀ ଭାବେ ଶପଥ ନେବା ପରେ ନବୀନଙ୍କୁ ଶୁଭେଚ୍ଛା ଜଣାଇବା ସହ କେନ୍ଦ୍ର ସରକାରଙ୍କ ପକ୍ଷରୁ ସମସ୍ତ ସହାୟତା ପ୍ରଦାନ କରାଯିବ ବୋଲି କହିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଅପର ପକ୍ଷରେ ଆୟୁଷ୍ମାନ ଯୋଜନାରେ ସାମିଲ ପାଇଁ ଓଡିଶାକୁ କେନ୍ଦ୍ର ପ୍ରସ୍ତାବ ଦେଇଛି। ସେହିପରି ରାଜ୍ୟରେ ଆୟୁଷ୍ମାନ ଯୋଜନାକୁ ନେଇ ମଧ୍ୟ ସକାରାତ୍ମକ ଆଲୋଚନା ଆରମ୍ଭ ହୋଇଛି। ଓଡିଶାରେ ଏହି ଯୋଜନା ଲାଗୁ ହେବା ନେଇ ସେ ଆଶାବାଦୀ ଅଛନ୍ତି ବୋଲି କେନ୍ଦ୍ରୀୟ ପ୍ରତିନିଧି କହିଛନ୍ତି।। ଆୟୁଷ୍ମାନ ଯୋଜନା ପାଇଁ ରାଜ୍ୟ ସରକାରଙ୍କ କିଛି ସର୍ତ୍ତ ରହିଛି। ପୂର୍ବରୁ କେନ୍ଦ୍ର ପକ୍ଷରୁ ଏ ନେଇ ଓଡିଶା ସରକାରଙ୍କୁ ପ୍ରସ୍ତାବ ଦିଆଯାଇଥିଲା। ତେବେ ମୋଦି ସରକାରଙ୍କ ଦ୍ବିତୀୟ କାର୍ଯ୍ୟକାଳରେ ଆୟୁଷ୍ମାନ ଯୋଜନାଙ୍କୁ ନେଇ ରାଜ୍ୟ ସରକାରଙ୍କ ସବୁଜ ସଂକେତ ମଧ୍ୟ ଦେଇଛନ୍ତି। ତେବେ ଏ ସମସ୍ତ ଘଟଣାବଳୀକୁ ଲକ୍ଷ୍ୟ କଲେ, ରାଜ୍ୟରେ ଶାସକ ଓ ବିରୋଧୀ ଦଳ ମଧ୍ୟରେ ସମନ୍ବୟ ସମ୍ପର୍କ ସୃଷ୍ଟି ହେଉଛି କହିଲେ ଅତ୍ୟୁକ୍ତି ହେବ ନାହିଁ। ବିଜେଡ଼ି ଓ ବିଜେପି ମଧ୍ୟରେ ବଢୁଥିବା ସମ୍ପର୍କ ଆଗାମୀ ଦିନରେ ରାଜ୍ୟର ରାଜେନୖତିକ ପାଣିପାଗରେ କିଭଳି ପରିବର୍ତ୍ତନ ଆଣିବ, ତାହା ସମୟ କହିବ।