ନୂଆଦିଲ୍ଲୀ: ଆଗାମୀ ଲୋକସଭା ନିର୍ବାଚନ ସମ୍ପର୍କରେ ଦେଶର ସମସ୍ତ ବିରୋଧୀ ଦଳ ଏନଡିଏକୁ ପରାସ୍ତ କରିବା ପାଇଁ ଇଣ୍ଡିଆ ମେଣ୍ଟ ଗଠନ କରିଛନ୍ତି। ବର୍ତ୍ତମାନ ମଧ୍ୟପ୍ରଦେଶ ବିଧାନସଭା ନିର୍ବାଚନ ପୂର୍ବରୁ ଏଥିରେ ଫାଟ ସୃଷ୍ଟି ହେଉଛି। ଗୋଟିଏ ପଟେ ମଧ୍ୟପ୍ରଦେଶରେ କଂଗ୍ରେସ ସମାଜବାଦୀ ପାର୍ଟି ପାଇଁ ନିଜ ଆସନ ଛାଡି ନାହିଁ ଏବଂ ସମସ୍ତ ଆସନରେ ପ୍ରାର୍ଥୀ ରଖିଛି। ଏଥି ସହ ଉତ୍ତରପ୍ରଦେଶ କଂଗ୍ରେସ ସଭାପତି ଅଜୟ ରାୟ ସମାଜବାଦୀ ପାର୍ଟି ଉପରେ ଏକ ବଡ ଆକ୍ରମଣ କରିଛନ୍ତି। ଏହାର ଜବାବରେ ଆଜି ଏସପି ମୁଖ୍ୟ ଅଖିଳେଶ ଯାଦବ ତାଙ୍କୁ ଟାର୍ଗେଟ କରିଛନ୍ତି।
ଏସପି ମୁଖ୍ୟ ଅଖିଳେଶ ଯାଦବ କହିଛନ୍ତି ଯେ, ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ଥିବା କଂଗ୍ରେସ ନେତା ଏକ ବୈଠକ ଡାକିଛନ୍ତି। ଯେଉଁଥିରେ ସେ ଗତ ମଧ୍ୟପ୍ରଦେଶ ବିଧାନସଭା ନିର୍ବାଚନରେ ସମାଜବାଦି ଦଳର ସମ୍ପୂର୍ଣ୍ଣ ରିପୋର୍ଟ ଦର୍ଶାଇଥିଲେ। ସେ କହିଛନ୍ତି ଯେ, କଂଗ୍ରେସ ନେତାମାନେ ସମାଜବାଦୀ ପାର୍ଟିର ନେତାମାନଙ୍କୁ ରାତି ୧ ଟା ପର୍ଯ୍ୟନ୍ତ ଉଜାଗର ରଖିଥିଲେ ଏବଂ ସମାଜବାଦୀ ପାର୍ଟି ପାଇଁ ୬ ଟି ଆସନ ଉପରେ ବିଚାର କରାଯିବ ବୋଲି ସେ ଆଶ୍ୱାସନା ଦେଇଥିଲେ। ଯେତେବେଳେ ଆସନ ଘୋଷିତ ହେଲା, ସମାଜବାଦୀ ପାର୍ଟି ପାଇଁ କୌଣସି ଆସନ ରଖାଯାଇ ନଥିଲା। ସେ କହିଛନ୍ତି ଯେ, ଯଦି ସେ ପୂର୍ବରୁ ଜାଣିଥାନ୍ତେ ଯେ ବିଧାନସଭା ସ୍ତରରେ ଇଣ୍ଡିଆ ମେଣ୍ଟର କୌଣସି ସହଭାଗିତା ନାହିଁ, ତେବେ ସେ ସେଠାରେ କେବେ ମିଶିବାକୁ ଯାଇ ନଥାନ୍ତେ।
ଅଜୟ ରାୟଙ୍କୁ ଟାର୍ଗେଟ କରାଯାଇଛି::
ନିକଟରେ ଉତ୍ତରପ୍ରଦେଶ କଂଗ୍ରେସ ସଭାପତି ଅଜୟ ରାୟ ସମାଜବାଦୀ ପାର୍ଟି ଉପରେ ସିଧାସଳଖ ଆକ୍ରମଣ କରୁଥିବାବେଳେ ମଧ୍ୟପ୍ରଦେଶରେ ସମାଜବାଦୀର କୌଣସି ଶକ୍ତି ନାହିଁ ବୋଲି କହିଥିଲେ। ବର୍ତ୍ତମାନ ଏସପି ମୁଖ୍ୟ ଅତ୍ୟଧିକ କ୍ରୋଧିତ ଥିବା ଜଣାପଡିଛି ଏବଂ ଗଣମାଧ୍ୟମ ସହ କଥାବାର୍ତ୍ତା ବେଳେ ସେ କହିଛନ୍ତି ଯେ, ରାଜ୍ୟ ସଭାପତିଙ୍କ କୌଣସି କ୍ଷମତା ନାହିଁ। ସେ ଆହୁରି ମଧ୍ୟ କହିଛନ୍ତି ଯେ, ମୁମ୍ବାଇ, ପାଟନାରେ ଅନୁଷ୍ଠିତ ବୈଠକରେ ସେ ଜଡିତ ନୁହଁନ୍ତି। ସେ ଇଣ୍ଡିଆ ସହଯୋଗୀ ଦଳ ବିଷୟରେ କିଛି ଜାଣନ୍ତି ନାହିଁ।
କଂଗ୍ରେସ ନେତାଙ୍କ ବିରୋଧରେ ବଡ ଅଭିଯୋଗ:
ଏସପି ମୁଖ୍ୟ ସିଧାସଳଖ କଂଗ୍ରେସ ନେତାମାନଙ୍କୁ ବିଜେପି ସହ ମିଶିଥିବା ଅଭିଯୋଗ କରିଛନ୍ତି ଏବଂ କହିଛନ୍ତି ଯେ ‘ଏହି ଲୋକମାନେ ବିଜେପି ସହ ମିଶିଛନ୍ତି। ଯଦି ମୁଁ ଜାଣିଥାନ୍ତି ଯେ, ଏହି ମେଣ୍ଟ ରାଜ୍ୟ ସ୍ତରରେ ନାହିଁ, ତେବେ ମୁଁ ଦିଗବିଜୟ ସିଂଙ୍କ ନିକଟକୁ ଏସପି ନେତା ପଠାଇ ନ ଥା’ନ୍ତି। ଯଦି ମୁଁ ଜାଣିଥାନ୍ତି ଯେ, କଂଗ୍ରେସ ଲୋକମାନେ ଆମକୁ ବିଶ୍ୱାସଘାତକତା କରିବେ, ମୁଁ ସେମାନଙ୍କ ଉପରେ ବିଶ୍ୱାସ କରି ନ ଥା’ନ୍ତି।
