ଭୁବନେଶ୍ବର: ଆଇଏଏସ ରୁ ଅବସର ନେବା ପରେ ବର୍ତ୍ତମାନ 5ଟି ତଥା ଆମ ଓଡିଶା ନବୀନ ଓଡିଶା ଅଧ୍ୟକ୍ଷ ଭି କେ ପାଣ୍ଡିଆନ ବିଜେଡିରେ ଯୋଗ ଦେବେ। ସେଥିପାଇଁ ଶଙ୍ଖ ଭବନରେ ପ୍ରସ୍ତୁତି ଚାଲିଛି ବୋଲି ଜଣାପଡିଛି। ସେ ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପସ୍ଥିତିରେ ବିଜେଡିରେ ସାମିଲ ହେବେ। ତାଙ୍କୁ ନବୀନ ଦଳୀୟ ଉତ୍ତରୀୟ ପିନ୍ଧାଇ ଦଳର ସଭ୍ୟ ଭାବେ ଗ୍ରହଣ କରିବେ।
ସେ ଆଇଏଏସ ଚାକିରୀ ଛାଡିବା ପରେ ତାଙ୍କର ରାଜନୀତିରେ ଯୋଗଦାନକୁ ନେଇ ଚର୍ଚ୍ଚା ଜୋର ଚାଲିଛି। ଚାକିରୀ ଛାଡିବାର କିଛି ଘଣ୍ଟା ପରେ ତାଙ୍କୁ ନବୀନ କ୍ୟାବିନେଟ ପ୍ୟାହାରେ ନିଯୁକ୍ତି ପ୍ରଦାନ କଲେ। ଫଳରେ ସେ ବିଜେଡି ସାମିଲ ହେବା ସନ୍ଦେହ ଧିରେଧିରେ ଘନିଭୂତ ହେବାରେ ଲାଗିଲା। ସେ ସିଧା ରାଜନୀତିରେ ଯୋଗଦେଇ ଓଡିଶାର ବିକାଶ କାମକୁ ତଦାରଖ କରିବେ ବୋଲି ବିଜେଡି ମହଲରୁ ଜଣାପଡିଛି।
ପାଣ୍ଡିଆନ ଯେତେବେଳେ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଭାବେ କାମ କରି ବିଭିନ୍ନ ଜିଲ୍ଲା ଗସ୍ତ କଲେ ସେତେବେଳେ ବିରୋଧୀ ପ୍ରବଳ ବିରୋଧ ଆରମ୍ଭ କଲେ। ଉଭୟ କଂଗ୍ରେସ ଓ ବିଜେପି ପାଣ୍ଡିଆନଙ୍କୁ ଆହ୍ବାନ ଦେଲେ ଯେ, ସେ ଚାକିରୀ ଛାଡି ସିଧା ରାଜନୀତିରେ ଯୋଗ ଦିଅନ୍ତୁ। ସେହି ଆହ୍ବାନ ବର୍ତ୍ତମାନ ପାଣ୍ଡିଆନଙ୍କ ପାଇଁ ବରଦାନ ସଦୃଶ୍ୟ ହୋଇପଡିଛି। କାରଣ ସେ ଦଳରେ ଯୋଗଦେଲେ ଆଉ ବିରୋଧୀ ଦଳର କିଛି କହିବାର ସାମର୍ଥ୍ୟ ରହିବ ନାହିଁ।
ବହୁ ବର୍ଷ ଧରି ପାଣ୍ଡିଆନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦୂତ ଭାବରେ ଓଡିଶାର ବିକାଶର ମଙ୍ଗ ଧରି ଆସିଛନ୍ତି। ଶ୍ରୀମନ୍ଦିର ପରିକ୍ରମା ପ୍ରକଳ୍ପ ହେଉ କିମ୍ବା ସମଲେଶ୍ବରୀ ଉନ୍ନୟନ। ସେହିପରି ଚାଷୀଙ୍କ ସମସ୍ୟା ହେଉ କିମ୍ବା ମହିଳା ଶସକ୍ତିକରଣ। ସବୁ କ୍ଷେତ୍ରରେ ପାଣ୍ଡିଆନଙ୍କ ଅବଦାନକୁ ସ୍ବୀକାର କରିବାକୁ ପଡିବ। ଭୋର 4 ଟାରୁ ଉଠି ଶୀତକାକରରେ ଓଡିଶା ବିକାଶର ଚିତ୍ର ଅଙ୍କନ କରୁଥିବା ବ୍ୟକ୍ତି ହେଉଛନ୍ତି ପାଣ୍ଡିଆନ।
ତାଙ୍କର ଏହି କାର୍ଯ୍ୟ ଶୈଳୀକୁ ଦେଖି ବିରୋଧୀ ସବୁବେଳେ ଖପ୍ପା ହେଉଥିଲେ। ତାଙ୍କ ବିରୋଧରେ କେନ୍ଦ୍ର ସରକାରଙ୍କ ନିକଟରେ ଅଭିଯୋଗ ଉପରେ ଅଭିଯୋଗ କରିବାରେ ଲାଗିଲେ। ହେଲେ ଫଳ ହେଲା ଶୂନ। କାରଣ ହେଲା ସେ ଓଡିଶାର ବିକାଶ ସହିତ ରାଜନୈିକ ଦଳକୁ କିପରି ପରିଚାଳନା କରାଯାଇପାରିବ ତାହାର କଳାକୌଶଳ ପାଣ୍ଡିଆନଙ୍କୁ ବେଶ ଭଲଭାବରେ ଜଣା ଅଛି। ସେଥିପାଇଁ ସେ ବିଜେଡି ସହିତ ବିରୋଧୀ ଦଳକୁ କିପରି ନିୟନ୍ତ୍ରଣ କରାଯାଇପାରିବ ତାହା କରି ଆସୁଛନ୍ତି।
ତେବେ ଚାକିରୀର କଟକଣା ଭିତରେ ଓଡିଶାର ବିକାଶ କାମ କରିବା ତାଙ୍କ ପାଇଁ ବହୁ ବାଧା ସୃଷ୍ଟି ହେଉଥିଲା। ଫଳ ସ୍ବରୂପ ସେ ଆଇଏଏସ ପରି ଚାକିରୀରୁ ଇସ୍ତଫା ପ୍ରଦାନ କଲେ। ଏବେ ସେ ସିଧା ରାଜନୀତିରେ ଲମ୍ପ ପ୍ରଦାନ କରି ବିଜେଡିର ହର୍ତ୍ତାକର୍ତ୍ତା ପାଲଟି ଓଡିଶାର ବିକାଶକୁ ଆହୁରି ସୁଦୃଢ କରିବେ ବୋଲି ଆଶା କରାଯାଉଛି।
