ଭୁବନେଶ୍ବର: ଓଡିଶାର ମଦ ବ୍ୟବସାୟୀଙ୍କ ଘରର ସମସ୍ତ ଆଲମିରାରରେ ପୁରା ଲୋଡ ହୋଇ ରହିଛି ଟଙ୍କା। ଆଇଟି ଠକେଇ ଯାଞ୍ଚ ବେଳେ ଏତେ ଟଙ୍କା ଦେଖି ତାଜୁବ ହୋଇଛନ୍ତି ଅଧିକାରୀ। ଆଳୁଖୋଳୁ ଖୋଳୁ ମହାଦେବ ବାହାରିବା ପରି ପରିସ୍ଥିତି ହୋଇଛି। ତେବେ ସେମାନେ ଭାବିଥିଲେ ଚାରି ପାଞ୍ଚ କୋଟି ଟଙ୍କା ହେବ। ହେଲେ ଏବେ ବାହାରିଲାଣି ୩୬୦ କୋଟି ଟଙ୍କା।
ଓଡିଶାର ବୌଦ୍ଧ ଡିଷ୍ଟ୍ରିଲାରୀ ପ୍ରାଇଭେଟ ଲିମିଟେଡ କଂପାନୀ ଆଇଟି ଠକେଇ ଅଭିଯୋଗରେ ଚଢାଉ କରାଯାଇଥିଲା। ତାଙ୍କର ଭୁବନେଶ୍ବର ଅଫିସରେ ଏହି ଚଢାଉ ହୋଇଥିଲା। ସେଠାରେୁ ଏକ ଟ୍ରଙ୍କରୁ ଟଙ୍କା ବାହାରିବା ପରେ ଆଇଟି ବିଭାଗ ତାଙ୍କର ସମସ୍ତ ଅଫିସରେ ଚଢାଉ କରିଥିଲା। ଭୁବନେଶ୍ବର ସହିତ ସମ୍ବଲପୁର, ବଲାଙ୍ଗୀର, ଟିଟିଲାଗଡ ପ୍ରଭୃତି ସ୍ଥାନରେ ଚଢାଉ କରାଯିବା ପରେ ସବୁସ୍ଥାନରେ ପୁଳାପୁଳା ଟଙ୍କା ଥିବାର ଦେଖି ଆଇଟି ଅଧିକାରୀଙ୍କ ମୁଣ୍ଡ ଖରାପ ହୋଇଯାଇଛି।
ଗତକାଲି ଏହି ଚଢାଉ କରାଯାଇଥିଲା। ହେଲେ ସବୁସ୍ଥାନରୁ ଟଙ୍କା ବାହାରିବା ପରେ ଏହି ଚଢାଉ ଆଜି ପର୍ୟ୍ୟନ୍ତ ମଧ୍ୟ ଚାଲିଛି। ପ୍ରଥମେ ଭୁବନେଶ୍ବରରୁ ଟଙ୍କା ମିଳିବା ପରେ ସମ୍ବଲପୁରର ମୁଖ୍ୟ ଅଫିସରୁ ୧୫୦ କୋଟି ମିଳିଥିବାର ଜଣାପଡିଛି। ସେହିପର ବଲାଙ୍ଗୀର ଅଫିସରୁ ମଧ୍ୟ ପୁଳାପୁଳ ଟଙ୍କା ଆଲମାରି ଭିତରେ ଖୁନ୍ଧାଖୁନ୍ଧି କରି ରଖାଯାଇଛି।
ତେବେ ଏହି ଟଙ୍କା ଭିତରେ କେବଳ ୫୦୦ ଟଙ୍କିଆ ନୋଟ ନାହିଁ। ଏଥିରେ ୧୦୦ ଟଙ୍କିଆ ଏବଂ ୨୦୦ ଟଙ୍କିଆ ନୋଟ ବିଡା ମଧ୍ୟ ରହିଛି। ଏଗୁଡିକ ୯ଟି ଆଲମିରାରେ ଭର୍ତ୍ତିକରି ରଖାଯାଇଥିବାର ଜଣାପଡିଛି। ଆଇଟି ବିଭାଗ ମେସିନ ଲଗାଇ ଦୁଇଦିନ ଧରି ଗଣତି କରିବାରେ ଲାଗିଛନ୍ତି। ଏଥିରେ ପ୍ରାୟ ୨୦ଟି ଟଙ୍କା ଗଣତି ମେସିନ ନିୟୋଜିତ କରାଯାଇ ଥିବାର ଜଣାପଡିଛି।
ସୂଚନାରୁ ଜଣାପଡିଛି ଯେ, ଓଡିଶାର ମଦ ବ୍ୟବସାୟୀ ରାଜକିଶୋର ସାହୁ ଏବଂ ଦେବରାଜ ସାହୁଙ୍କ ମଦ ପ୍ରସ୍ତୁତ କଂପାନୀ ରହିଛି। ଏଥିସହିତ ତାଙ୍କର ମଦ ଦୋକାନ ମଧ୍ୟ ବିଭିନ୍ନ ସ୍ଥାନରେ ରହିଛି। ଏହି ବ୍ୟବସାୟ ବ୍ୟତିତ ତାଙ୍କର ବସ ସେବା, ଗ୍ୟାସ ଏଜେନସୀ, ରିଅଲ ଇଷ୍ଟେଟ ପ୍ରଭୃତି ବ୍ୟବସାୟ ରହିଛି। ରାଉରକେଲାରେ ତାଙ୍କର ଏକ ଟାଉନସିପ ମଧ୍ୟ ରହିଛି। ପ୍ରଥମେ ମଦ କଂପାନୀରୁ ଟଙ୍କା ମିଳିବା ପରେ ବର୍ତ୍ତମାନ ତାଙ୍କର ସବୁ ବ୍ୟବସାୟ ଉପରେ ଚଢାଉ ହୋଇଛି।
ତେବେ ସମ୍ବଲପୁରରେ ରିଜର୍ଭ ବ୍ୟାଙ୍କ ନ ଥିବାରୁ ସେଠାରେ ସମ୍ବଲପୁର ଏସବିଆଇ ଶାଖାରେ ଆଇଟି ଅଧିକାରୀମାନେ ୨୦୦ କୋଟି ଟଙ୍କା ଜମା କରାଯାଇଥିବାର ଜଣାଯାଇଛି। ଦୁଇଟି ଭ୍ୟାନରେ ଏହି ଟଙ୍କା ବ୍ୟାଗକୁ ବୋଝେଇ କରି ନିଆଯାଇଥିବାର ଜଣାପଡିଛି। ଏହି ଖବର ମିଳିବା ପରେ ଆଇଟି ବିଭାଗର ଡିଜି ସଞ୍ଜୟ ବାହାଦୂର ସମ୍ବଲପୁରରେ ପହଞ୍ଚିଥିବାର ଜଣାପଡିଛି।