ଭୁବନେଶ୍ବର: ଗତକାଲି ମହାଶିବରାତ୍ରି ପାଇଁ ସାରା ଓଡିଶା ଉତ୍ସବ ମୁଖର ଥିବା ବେଳେ ଅନ୍ୟପଟ ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓଙ୍କ ଘରେ ରୁଦ୍ଧଦ୍ବାର ବୈଠକ ନେଇ ରାଜନୈତିକ ମହଲରେ ବେଶ ଚର୍ଚ୍ଚା ଚାଲିଛି। ହଠାତ ଶିବରାତ୍ରୀରେ କିଏ କୁଆଡେ ମନ୍ଦିର ବୁଲୁଥିବା ବେଳେ ମାତ୍ର ଅଳ୍ପ ସଂଖ୍ୟକ ନେତାଙ୍କୁ ନେଇ ଏପରି ବୈଠକ କାହିଁକି କରାଗଲା ସେ ନେଇ ପ୍ରଶ୍ନ ଉଠିଛି।
ମିଡିଆରେ ପ୍ରଚାର କରାଗଲା ଯେ, ବିଭିନ୍ନ ନିଗମ ଅଧ୍ୟକ୍ଷ ପଦବୀ ପାଇଁ ଆଲୋଚନା ହେଉଛି। ତେବେ ଏହା ତ କୌଣସି ଗୁପ୍ତ କଥା ନ ଥିଲା। ତାହା ବିଜେପି କାର୍ଯ୍ୟାଳୟରେ କରାଯାଇ ପାରି ଥାଆନ୍ତା। ହେଲେ ଉପମୁଖ୍ୟମନ୍ତ୍ରୀଙ୍କ ଘରେ ପୁଣି ମହାଶିବରାତ୍ରୀରେ କରିବାର ଉଦ୍ଦେଶ୍ୟ କଣ ତାହା ସମସ୍ତଙ୍କର ସନ୍ଦେହ ସୃଷ୍ଟି କରିଛି।
ଏହି ବୈଠକରେ ଯେଉଁମାନେ ଥିଲେ ସେମାନେ ହେଲେ ଖୋଦ ବାସଭବନ ମାଲିକ କନକ ବର୍ଦ୍ଧନ ସିଂହଦେଓ, ମୁଖ୍ୟମନ୍ତ୍ରୀ ମୋହନ ମାଝୀ, ବିଜେପି ସଭାପତି ମନମୋହନ ସାମଲ, ପ୍ରଭାରୀ ବିଜୟପାଲସିଂ ତୋମାର, ବିଜେପି ସାଂଗଠନିକ ସଂପାଦକ ମାନସ ମହାନ୍ତି, ରାଷ୍ଟ୍ରୀୟ ସଂପାଦକ ତରୁଣ ଚୁଗ ଯୋଗଦେଇଥିଲେ।
ଏହି ବୈଠକରେ ଅନ୍ୟ ଜଣେ ଉପମୁଖ୍ୟମନ୍ତ୍ରୀ ନ ଥିଲେ କି ଅନ୍ୟ କୌଣସି ମନ୍ତ୍ରୀଙ୍କୁ ସେହି ବୈଠକରେ ସାମିଲ କରାଯାଇ ନ ଥିଲା। ଯଦି ନିଗମ ଅଧ୍ୟକ୍ଷ ଆଲୋଚନା ଥିଲା ତେବେ ଅନ୍ୟମନ୍ତ୍ରୀ ସାମିଲ ହେବାରେ କୌଣସି ଅସୁବିଧା ନ ଥିଲା। ଫଳରେ ଏପରି ଏକ ବୈଠକକୁ ନେଇ ସମସ୍ତଙ୍କ ମନରେ ସନ୍ଦେହ ସୃଷ୍ଟି ହୋଇଛି।
ତେବେ ବୈଠକ ପରେ ମନମୋହନ ସାମଲ ଯାହା କହିଲେ ସେଥିରେ ସ୍ପଷ୍ଟ ହୋଇଛି ଯେ, ସେ କିଛି ଲୁଚାଇବାକୁ ଚେଷ୍ଠା କରୁଛନ୍ତି। କାରଣ ତାଙ୍କ ମୁହଁରୁ ସ୍ପଷ୍ଟ ବାରି ହେଉଥିଲା ଯେ, ସେ କିଛି ତଥ୍ୟ ଖୋଲମଖୁଲା କହିବାକୁ ରାଜି ନୁହଁନ୍ତି।
ତେବେ ବିଜେପିର ଭିତିରିଆ ତଥ୍ୟ ଅନୁସାରେ ସେହି ବୈଠକରେ କୁଆଡେ ନିଗମ ଅଧ୍ୟକ୍ଷ ନୁହେଁ ମନ୍ତ୍ରୀ ମଣ୍ଡଳ ଅଦଳବଦଳ ଏବଂ ସଂପ୍ରସାରଣ ନେଇ ଆଲୋଚନା ହୋଇଥିଲା। ସେଥିପାଇଁ କୌଣସି ମନ୍ତ୍ରୀଙ୍କୁ ସେହି ବୈଠକରେ ସାମିଲ କରାଯାଇ ନ ଥିଲା। ଫଳରେ କେଉଁମାନେ ମନ୍ତ୍ରୀ ମଣ୍ଡଳରେ ରହିବେ, କାହାକୁ ବାହାର କରାଯିବ ଆଉ କାହାକୁ ନୂଆ ସାମିଲ କରାଯିବ ସେ ନେଇ ସେହି ବୈଠକରେ ବିସ୍ତୁତ ଆଲୋଚନା ହୋଇଛି।
ସେହି ସୁତ୍ର ଅନୁସାରେ କୁଆଡେ କେତେକ ମନ୍ତ୍ରୀଙ୍କ ଉପରେ ବିଜେପି ଓ ଖୋଦ ମୁଖ୍ୟମନ୍ତ୍ରୀ ଖପ୍ପା ହୋଇପଡିଛି। ସେମାନେ କୁଆଡେ ମୁଖ୍ୟମନ୍ତ୍ରୀଙ୍କଠାରୁ ନିଜକୁ ବଡ ଭାବୁଛନ୍ତି ବା ମୁଖ୍ୟମନ୍ତ୍ରୀଙ୍କୁ ହେୟଜ୍ଞାନ କରୁଛନ୍ତି ବୋଲି ଦଳ ଅନୁଭବ କରୁଛି। କେତେକ ମନ୍ତ୍ରୀ ମିଡିଆକୁ ବିନା କୌଣସି ଅନୁମତିରେ ଯାହା ଇଚ୍ଛା ତାହା କହିଦେଉଛନ୍ତି। ସେସବୁ ଆଲୋଚନା କରାଯାଇ, କେଉଁମାନଙ୍କୁ ମନ୍ତ୍ରୀ ମଣ୍ଡଳରୁ ବାହାର କରାଯିବ ସେ ତାଲିକା କୁଆଡେ ପ୍ରସ୍ତୁତ କରାଯାଇଛି।
ତେବେ ଏହି ତାଲିକା ସଂପର୍କରେ ଓଡିଶା ଗସ୍ତରେ ଆସିବାକୁ ଥିବା ରାଷ୍ଟ୍ରୀୟ ସଭାପତି ଜେ ପି ନଡ୍ଡାଙ୍କ ସହିତ ଆଲୋଚନା କରାଯିବ। ତାଙ୍କର ସ୍ବୀକୃତି ପରେ ଏହାକୁ କାର୍ଯ୍ୟକାରୀ କରାଯିବ ବୋଲି କୁଆଡେ ନିଷ୍ପତି କରାଯାଇଛି। ଏ ନେଇ ଦିଲ୍ଲୀରୁ ମଧ୍ୟ ନିର୍ଦ୍ଦେଶ ରହିଛି ବୋଲି ଜଣାପଡିଛି। ତେଣୁ ଏସବୁ ତଥ୍ୟକୁ ବିଚାରକୁ ନେଲେ ଖୁବ ଶିଘ୍ର ରାଜ୍ୟ ମନ୍ତ୍ରୀ ମଣ୍ଡଳରେ ଏକ ବଡ ଧରଣର ଅଦଳବଦଳ ସହିତ ସଂପ୍ରସାରଣ ହେବ ବୋଲି ସ୍ପଷ୍ଟ ହୋଇଛି।