ସମୀକ୍ଷା ବ୍ୟୁରୋ
ପରିଶେଷରେ ଉନ୍ନାଓ ଘଟଣାରେ ମାନ୍ୟବର ସୁପ୍ରିମ କୋର୍ଟ ହସ୍ତକ୍ଷେପ କରିଛନ୍ତି। ଗତ ଦୁଇ ବର୍ଷ ଧରି ନ୍ୟାୟ ପାଇଁ ସଂଘର୍ଷ କରୁଥିବା ଉନ୍ନାଓ ର ପୀଡ଼ିତା ଯୁବତୀଙ୍କ ଚିଠି ଉପରେ ସ୍ଵତନ୍ତ୍ର ବିଚାର କରି ମାନ୍ୟବର ସୁପ୍ରିମ କୋର୍ଟ ଆସନ୍ତା ୨୪ ଘଣ୍ଟା ଭିତରେ ତାଙ୍କୁ ୨୫ ଲକ୍ଷ ଟଙ୍କାର କ୍ଷତି ପୂରଣ ଦେବାକୁ ଉତ୍ତରପ୍ରଦେଶ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ଏହା ସହିତ ଏହି ଘଟଣା ସହ ସମ୍ପୃକ୍ତ ପାଞ୍ଚଟି ମାମଲାକୁ ବିଚାର ପାଇଁ ତୁରନ୍ତ ଉତ୍ତର ପ୍ରଦେଶରୁ ଦିଲ୍ଲୀକୁ ସ୍ଥାନାନ୍ତରିତ କରିବାକୁ ଅଦାଲତ ନିର୍ଦ୍ଦେଶ ଦେଇଛନ୍ତି। ସେହିପରି ପୀଡ଼ିତାଙ୍କ ସୁରକ୍ଷା ଦାୟିତ୍ଵ ନିଶ୍ଚିତ କରିବାକୁ ମାନ୍ୟବର ସୁପ୍ରିମ କୋର୍ଟ ନିର୍ଦ୍ଦେଶ ଦେଇଛନ୍ତି। ଏହି ମାମଲାର ତଦନ୍ତ କରୁଥିବା ସିବିଆଇ କୁ ଆସନ୍ତା ୭ ଦିନ ଭିତରେ ଗତ ଜୁଲାଇ ୨୮ ତାରିଖର ହତ୍ୟା ଉଦ୍ୟମ ତଥା ୪୫ ଦିନ ଭିତରେ ଦୁଷ୍କର୍ମ ମାମଲାର ତଦନ୍ତ ସାରିବାକୁ କଡା ନିର୍ଦ୍ଦେଶ ଦିଆଯାଇଛି।ସେହିପରି ପୀଡ଼ିତା ଓ ତାଙ୍କ ଓକିଲଙ୍କୁ ସ୍ବାସ୍ଥ୍ୟସେବା ଯୋଗାଇବାକୁ ଦିଲ୍ଲୀକୁ ସ୍ଥାନାନ୍ତର କରାଯିବ କି ନାଇଁ ସେ ସମ୍ପର୍କରେ ପୀଡ଼ିତାଙ୍କ ସମ୍ପର୍କୀୟଙ୍କ ସହ କଥାବାର୍ତ୍ତା କରିବାକୁ କୁହାଯାଇଛି।
ମୋଟାମୋଟି ଡେରିରେ ହେଲେ ମଧ୍ୟ ସୁପ୍ରିମ କୋର୍ଟ ଏହି ଘଟଣାରେ ନ୍ୟାୟ ପ୍ରକ୍ରିୟାକୁ ତ୍ବରାନ୍ଵିତ କରିଛନ୍ତି। ତେବେ ନ୍ୟାୟ ପାଇବା ରାସ୍ତାରେ ପୀଡ଼ିତା ଅନେକ କିଛି ହରେଈ ସାରିଲେଣି। ପୀଡ଼ିତାଙ୍କ ବାପାଙ୍କୁ ମିଛ ଅସ୍ତ୍ରଶସ୍ତ୍ର ମାମଲାରେ ଗିରଫକରି ତାଙ୍କୁ ପୋଲିସ ହେପାଜତରେ ମାରି ଦିଆ ଯାଇଥିଲା। ଏହାର ତଦନ୍ତ ମଧ୍ୟ ଶିଥିଳ ପଡିଛି। ପୀଡ଼ିତାଙ୍କ ପୂରା ପରିବାର ଏବେ ଆତଙ୍କ ଭିତରେ ରହିଛନ୍ତି। ପରିବାରର ୩ ଜଣ ସଦସ୍ୟଙ୍କୁ ହତ୍ୟା କରାଗଲାଣି ଓ ପରିବାରର ଅନ୍ୟମାନେ ଆତଙ୍କିତ ଅବସ୍ଥାରେ ରହିଛନ୍ତି। ଉତ୍ତର ପ୍ରଦେଶ ପୋଲିସ ଓ ପ୍ରଶାସନ ପୂରା ମାମଲାରେ ଅପରାଧୀ ବିଧାୟକଙ୍କ ସହିତ ହାତକୁ ହାତ ମିଳାଇ କାମ କରୁଥିବା ଭଳି ମନେ ହେଉଛି। ଉତ୍ତର ପ୍ରଦେଶର ଏହି ଉଦାହରଣରୁ ସେଠିକାର ଆଇନ ବ୍ୟବସ୍ଥାର ଏକ ସ୍ପଷ୍ଟ ଚିତ୍ର ମିଳିଯାଉଛି।
ତେବେ ସୁପ୍ରିମ କୋର୍ଟ ନିର୍ଦ୍ଦେଶ ଦେବାବେଳକୁ ଭାରତୀୟ ଜନତା ପାର୍ଟି ମଧ୍ୟ ଅଭିଯୁକ୍ତ ବିଧାୟକ କୁଲଦୀପ ସିଂ ସେଙ୍ଗରଙ୍କୁ ଦଳରୁ ବହିଷ୍କୃତ କରିଛି। ଗତ ଦୁଇ ବର୍ଷ ଧରି ବିଧାୟକଙ୍କୁ ନୈତିକ ସମର୍ଥନ ଦେବା ସହିତ ପୀଡ଼ିତାଙ୍କ ଉପରେ ଅକଥନୀୟ ଶାରୀରିକ ଓ ମାନସିକ ଅତ୍ୟାଚାର କରିବାରେ ବିଜେପି ସହାୟକ ଭୂମିକା ନେଇଆସୁଥିଲା। ଦୁଇ ବର୍ଷ ଧରି ଜଣେ ଅପରାଧୀ ବିଧାୟକଙ୍କୁ ନିଜ ଦଳର ସମର୍ଥନ ଦେଇ ଆସିଥିବା ବିଜେପି ଏହି ମାମଲାରେ ଅନ୍ୟତମ ଦୋଷୀ ନିଶ୍ଚୟ। ଆଜି ସୁପ୍ରିମ କୋର୍ଟ ଉତ୍ତର ପ୍ରଦେଶରୁ ଏ ସଙ୍କ୍ରାନ୍ତୀୟ ସବୁ ମକଦ୍ଦମା ଦିଲ୍ଲୀକୁ ସ୍ଥାନାନ୍ତରିତ କରି ଉତ୍ତର ପ୍ରଦେଶର ଆଇନ ବ୍ୟବସ୍ଥାକୁ ଆମ ଆଗରେ ଅନାବୃତ କରି ଦେଇଛନ୍ତି। ଜଙ୍ଗଲ ରାଜର ଏହାଠୁ ବଳି ବଡ ଉଦାହରଣ ଆଉ କଣ ହୋଇପାରେ।
ଉନ୍ନାଓ ପୀଡ଼ିତାଙ୍କ ଜୀବନ ଆଜି ଘୋର ସଙ୍କଟରେ। ନ୍ୟାୟ ଦେବାଲାଗି ତାଙ୍କ ସହିତ ଦେଶର ଜନ ସାଧାରଣ ଠିଆ ହେବା ଆଜି ପ୍ରଥମ କର୍ତ୍ତବ୍ୟ ନୁହେଁ କି?
