ନାଥଦ୍ୱାରା/ରାଜସ୍ଥାନ: ରିଲାଏନ୍ସ ଇଣ୍ଡଷ୍ଟ୍ରିଜ୍ ଅଧ୍ୟକ୍ଷ ମୁକେଶ ଅମ୍ବାନୀ ପ୍ରସିଦ୍ଧ ହିନ୍ଦୁ ତୀର୍ଥସ୍ଥଳ ଶ୍ରୀନାଥଜୀଙ୍କ ସହର ନାଥଦ୍ୱାରାରେ ଏକ ଆଧୁନିକ “ଯାତ୍ରୀ ଏବଂ ବରିଷ୍ଠ ସେବା ସଦନ” ନିର୍ମାଣ ଘୋଷଣା କରିଛନ୍ତି। ସେ ଶ୍ରୀନାଥଜୀ ମନ୍ଦିରକୁ ୧୫ କୋଟି ଟଙ୍କା ମଧ୍ୟ ପ୍ରଦାନ କରିଛନ୍ତି। ଅମ୍ବାନୀ ରବିବାର ଦିନ ଶ୍ରୀନାଥଜୀଙ୍କ ଭୋଗ-ଆରତୀ ଓ ଦର୍ଶନ କରିବା ସହିତ ପୂଜ୍ୟ ଗୁରୁ ବିଶାଳ ବାବା ସାହେବଙ୍କଠାରୁ ଆଶୀର୍ବାଦ ନେଇଥିଲେ।
ଏହି ନୂତନ ସେବା ସଦନତୀର୍ଥଯାତ୍ରୀ ଏବଂ ବରିଷ୍ଠ ବୈଷ୍ଣବ ଭକ୍ତଙ୍କ ପାଇଁ ସମର୍ପିତ ରହିବ। ଏଥିରେ ୧୦୦ ରୁ ଅଧିକ କୋଠରୀ ରହିବ, ଯାହା ସୁରକ୍ଷିତ ଏବଂ ସମ୍ମାନଜନକ ଆବାସ ସୁବିଧା ପ୍ରଦାନ କରିବ। ଏଠାରେ ଏକ ୨୪ ଘଣ୍ଟା ଚାଲୁଥିବା ଚିକିତ୍ସା ୟୁନିଟ୍, ନର୍ସିଂ ଏବଂ ଫିଜିଓଥେରାପି ସେବା, ସତସଙ୍ଗ ଏବଂ ପ୍ରବଚନ ହଲ୍ ଏବଂ ପୁଷ୍ଟିମାର୍ଗ ଥାଳ-ପ୍ରସାଦ ପରମ୍ପରା ଉପରେ ଆଧାରିତ ଭୋଜନ ବ୍ୟବସ୍ଥା ମଧ୍ୟ ରହିବ।
ଏହି ବିଶେଷ ଅବସରରେ ଅମ୍ବାନୀ କହିଥିଲେ, “ଆମେ ଗର୍ବ କରିବା ଉଚିତ ଯେ ଆମେ ବୈଷ୍ଣବ। ସନାତନ ଧର୍ମ ଏବଂ ଆଚାର୍ଯ୍ୟ ପରମ୍ପରାର ଅନୁଗାମୀ।”
ମୁକେଶ ଅମ୍ବାନୀଙ୍କ ସାନ ପୁଅ ଅନନ୍ତ ଅମ୍ବାନୀ ଏହି ପ୍ରକଳ୍ପରେ ସିଧାସଳଖ ଜଡିତ ରହିଛନ୍ତି। ଏହି ପ୍ରକଳ୍ପର ଲକ୍ଷ୍ୟ ହେଉଛି ଯେ ନାଥଦ୍ୱାରାକୁ ଆସୁଥିବା ପ୍ରତ୍ୟେକ ଭକ୍ତ ସେବା, ସମ୍ମାନ ଏବଂ ଭକ୍ତିରେ ପରିପୂର୍ଣ୍ଣ ପରିବେଶରେ ରହିପାରିବେ। ପ୍ରାୟ ୫୦ କୋଟି ଟଙ୍କା ବ୍ୟୟରେ ନିର୍ମିତ ହେବାକୁ ଥିବା ଏହି ସେବା ସଦନଆଗାମୀ ତିନି ବର୍ଷ ମଧ୍ୟରେ ସମ୍ପୂର୍ଣ୍ଣ ହେବାର ଆଶା ରହିଛି।
ରବିବାର ଦିନ ମୁକେଶ ଅମ୍ବାନୀ କେରଳର ତ୍ରିସୁର ଜିଲ୍ଲା ସ୍ଥିତ ଗୁରୁବାୟୁର ଶ୍ରୀକୃଷ୍ଣ ମନ୍ଦିରରେ ଦର୍ଶନ କରିବା ସହିତ ମନ୍ଦିର ଟ୍ରଷ୍ଟକୁ ୧୫ କୋଟି ଟଙ୍କା ପ୍ରଦାନ କରିଥିଲେ। ସେହିଭଳି ଆନ୍ଧ୍ର ପ୍ରଦେଶର ତିରୁମାଲା ତିରୁପତି ଦେବସ୍ଥାନମରେ ଭଗବାନ ଶ୍ରୀ ଭେଙ୍କଟେଶ୍ୱରଙ୍କୁ ମଧ୍ୟ ସେ ଦର୍ଶନ କରିଥିଲେ। ଏଥିସହିତ ତିରୁମାଲାରେ ଶ୍ରୀ ଭେଙ୍କଟେଶ୍ୱର ଅନ୍ନ ପ୍ରସାଦମ ଟ୍ରଷ୍ଟକୁ ସମର୍ପିତ ଏକ ଅତ୍ୟାଧୁନିକ ରୋଷେଇଶାଳା (କିଚେନ) ନିର୍ମାଣ କରିବାକୁ ସେ ଘୋଷଣା କରିଥିଲେ। ତିରୁମାଲା ତିରୁପତି ଦେବସ୍ଥାନମ (ଟିଟିଡି) ସହଭାଗିତାରେ ନିର୍ମିତ ହେବାକୁ ଥିବା ଏହି ପବିତ୍ର କାର୍ଯ୍ୟରେ ଆନ୍ଧ୍ରପ୍ରଦେଶ ସରକାରଙ୍କ ପୂର୍ଣ୍ଣ ସହଯୋଗ ରହିଛି। ଏହି ନୂତନ ରୋଷେଇଶାଳାରେ ଅତ୍ୟାଧୁନିକ ଅଟୋମେସନ ବ୍ୟବସ୍ଥା ସହିତ ଭକ୍ତି, ସ୍ୱଚ୍ଛତା ଏବଂ ଯତ୍ନର ସହିତ ଦୈନିକ ୨ ଲକ୍ଷ ଅନ୍ନ ଭୋଜନ ପ୍ରସ୍ତୁତ କ୍ଷମତା ରହିବ।