ଭୁବନେଶ୍ୱର: ଓଡିଶା ପ୍ରଦେଶ କଂଗ୍ରେସ କମିଟି ପକ୍ଷରୁ ଆଜି କଂଗ୍ରେସ ଭବନଠାରେ ଆୟୋଜିତ ପ୍ରେସ ସମ୍ମୀଳନୀରେ କାଠଯୋଡ଼ି ଟେଣ୍ଡରକୁ ନେଇ ରାଜ୍ୟ ସରକାରଙ୍କୁ କଠୋର ଭାବରେ ସମାଲୋଚନା କରାଯାଇଥିଲା।
ପ୍ରାୟ 200 କୋଟିର କାଠଯୋଡ଼ି ସେତୁ ପ୍ରକଳ୍ପକୁ ଏସପିଏସ୍ କନଷ୍ଟ୍ରକ୍ସନ୍ କମ୍ପାନୀକୁ ଦେବା ସିଦ୍ଧାନ୍ତକୁ କଂଗ୍ରେସ “ଜନସୁରକ୍ଷା ଏଵଂ ଲୋକଙ୍କ ଜୀବନ ସହ ଖେଳ” ବୋଲି କହିଛି। ବରିଷ୍ଠ କଂଗ୍ରେସ ପ୍ରବକ୍ତା ସୋନାଲି ସାହୁ ବିହାରର ବିବାଦିତ ସୁଲତାନଗଞ୍ଜ ଖୋଗାରିଆ ପୋଲ ଭୁଶୁଡିବା ଘଟଣାକୁ ଉଦ୍ଧୃତ କରି କହିଥିଲେ ଯେ, ଏହି କମ୍ପାନୀ ତିଆରି କରୁଥିବା 1700 କୋଟିରୁ ଅଧିକ ମୂଲ୍ୟର ସେତୁ ତିନିଥର ଭାଙ୍ଗି ପଡ଼ିବା ଘଟଣା ସମଗ୍ର ଦେଶରେ ଚର୍ଚ୍ଚାର ବିଷୟ ହୋଇଥିଲା ଏବଂ ଏହା କେବଳ ଦୁର୍ଘଟଣା ନୁହେଁ, ବରଂ କମ୍ପାନୀର ଗୁରୁତର ଅବହେଳା, ନିମ୍ନମାନର କାର୍ଯ୍ୟ , ନିମ୍ନମାନର ସାମଗ୍ରୀ, ଦକ୍ଷତାର ଅଭାବ, ତ୍ରୁଟିପୂର୍ଣ୍ଣ ଡିଜାଇନ୍ ଓ କାର୍ଯ୍ୟ ସମ୍ପାଦନ ବିଫଳତାର ପ୍ରମାଣ।
ସେ କହିଥିଲେ ଯେ ଆଇଆଇଟି ରୁରକିର ରିପୋର୍ଟ ଏହି ପ୍ରକଳ୍ପରେ ଗଭୀର ତ୍ରୁଟି ଥିବା ଚିହ୍ନଟ କରିଥିଲା ଏବଂ ସମ୍ପୂର୍ଣ୍ଣ ସେତୁକୁ ପୁନଃନିର୍ମାଣ କରିବା ପାଇଁ ସୁପାରିଶ କରିଥିଲା, ଯାହାକୁ ପାଟଣା ହାଇକୋର୍ଟ ମଧ୍ୟ ଗୁରୁତ୍ୱ ସହ ଗ୍ରହଣ କରିଥିଲେ ଏବଂ କାହିଁକି ଏ କମ୍ପାନୀ କଳା ତାଲିକା ଭୁକ୍ତ ହେବନାହିଁ ବୋଲି ପ୍ରଶ୍ନ କରିଥିଲେ ।
ଅନ୍ୟତମ ପ୍ରବକ୍ତା ଡ. ମନୀଷା ଦାସ ପଟ୍ଟନାୟକ ସରକାରଙ୍କୁ ସିଧା ଟାର୍ଗେଟ କରି କହିଥିଲେ ଯେ, ଏପରି ବିବାଦିତ, ଦାଗୀ ଓ ବାରମ୍ବାର ବିଫଳ ହେଉଥିବା କମ୍ପାନୀକୁ ଓଡିଶାରେ ଦାୟିତ୍ୱ ଦେବା ଅର୍ଥ ପ୍ରକୃତରେ ଲୋକଙ୍କ ଜୀବନକୁ ବିପଦରେ ପକାଇବା। ସେ କହିଥିଲେ ଯେ ବିହାର ଘଟଣା କେବଳ ଯାନ୍ତ୍ରିକ ତ୍ରୁଟି ନୁହେଁ, ବରଂ ପ୍ରଶାସନିକ ଅବହେଳା ଓ ନିୟନ୍ତ୍ରଣର ଅଭାବକୁ ମଧ୍ୟ ସ୍ପଷ୍ଟ କରିଛି, ଯାହାକୁ ଜାତୀୟ ସବୁଜ ପ୍ରାଧିକରଣ ( ଏନଜିଟି) ପର୍ଯ୍ୟନ୍ତ ନେଇଯିବାକୁ ପଡ଼ିଥିଲା।
ଡ. ପଟ୍ଟନାୟକ ପ୍ରଶ୍ନ କରିଥିଲେ ଯେ କେଉଁ ଯୋଗ୍ୟତା ଆଧାରରେ ଏହି କମ୍ପାନୀକୁ ଚୟନ କରାଗଲା, ପୂର୍ବ ଟେଣ୍ଡର କାହିଁକି ବାତିଲ୍ କରାଗଲା ଓ ଏହାର ପଛରେ କାହାର ଲାଭ ରହିଛି। ସେ ସଚେତନ କରିଥିଲେ ଯେ ଯଦି ଏହିପରି ଅବହେଳା ଜାରି ରହେ, ତେବେ ଓଡିଶାରେ ମଧ୍ୟ ଏକ ବଡ଼ ଦୁର୍ଘଟଣା ଘଟିପାରେ ଓ ତାହାର ଦାୟିତ୍ୱ ସରକାରଙ୍କୁ ନେବାକୁ ପଡ଼ିବ।
ଶେଷରେ କଂଗ୍ରେସ ସରକାରଙ୍କୁ ସଚେତନ କରି କହିଛି ଯେ ଜନସୁରକ୍ଷା ସହ କୌଣସି ପ୍ରକାରର ସାଲିସ କେବେ ମଧ୍ୟ ଗ୍ରହଣଯୋଗ୍ୟ ନୁହେଁ ଏବଂ ଏହି ଟେଣ୍ଡର ପ୍ରକ୍ରିୟାର ତୁରନ୍ତ ପୁନଃବିଚାର ନ କରାଗଲେ ଆଗକୁ ଆନ୍ଦୋଳନ ତୀବ୍ର କରାଯିବ।