ଭୁବନେଶ୍ୱର: ରାଜ୍ୟରେ ଜନସାଧାରଣଙ୍କ ବିଭିନ୍ନ ଗୁରୁତ୍ୱପୂର୍ଣ୍ଣ ସମସ୍ୟା, ଛାତ୍ର ସ୍ୱାର୍ଥ, ଭୋଟ୍ ଜାଲିଆତି ଏବଂ ମୁଖ୍ୟ ନିର୍ବାଚନ ଆୟୋଗଙ୍କ ଆଭିମୁଖ୍ୟକୁ ବିରୋଧ କରି ଆସନ୍ତା ୮ ତାରିଖରେ ସାରା ରାଜ୍ୟରେ କଂଗ୍ରେସ ପକ୍ଷରୁ ‘ଓଡ଼ିଶା ବନ୍ଦ’ ଡାକରା ଦିଆଯାଇଛି। ପ୍ରଦେଶ କଂଗ୍ରେସ କମିଟି (ପିସିସି) ସଭାପତି ଭକ୍ତ ଚରଣ ଦାସ ଏହି ବନ୍ଦ ଡାକରା ସମ୍ପର୍କରେ ଆନୁଷ୍ଠାନିକ ଘୋଷଣା କରିବା ସହ ଏଥିରେ ସାମିଲ ହେବା ପାଇଁ ‘ଇଣ୍ଡି’ ମେଣ୍ଟର ସମସ୍ତ ସହଯୋଗୀ ଦଳର ନେତୃବୃନ୍ଦ ଓ ସଦସ୍ୟମାନଙ୍କୁ ଆକୁଳ ଅପିଲ୍ କରିଛନ୍ତି।
ପିସିସି ସଭାପତି ଭକ୍ତ ଚରଣ ଦାସ କହିଛନ୍ତି ଯେ ରାଜ୍ୟର ଜନସାଧାରଣ ଏବେ ସମ୍ପୂର୍ଣ୍ଣ ଭାବେ ସଚେତନ ଓ ଜାଗ୍ରତ ହୋଇସାରିଛନ୍ତି। ନିର୍ବାଚନ ମଣ୍ଡଳୀ ଓ ଭୋଟ୍ ଜାଲିଆତି, ଶିକ୍ଷା ବିଭାଗରେ ଛାତ୍ରଛାତ୍ରୀଙ୍କୁ ପ୍ରଭାବିତ କରୁଥିବା ବିଭିନ୍ନ ସମସ୍ୟା ଏବଂ ଅନ୍ୟାନ୍ୟ ଜନସ୍ୱାର୍ଥ ମାମଲାକୁ ନେଇ କ୍ରମାଗତ ଭାବେ ଆନ୍ଦୋଳନ ଜାରି ରହିଛି। ଏହା ସହିତ ମୁଖ୍ୟ ନିର୍ବାଚନ ଆୟୋଗ ଜ୍ଞାନେଶ କୁମାରଙ୍କ ନିଷ୍ପତ୍ତି ଓ ଆଭିମୁଖ୍ୟକୁ କଡ଼ା ସମାଲୋଚନା କରାଯାଇଛି। ନିର୍ବାଚନ ପ୍ରକ୍ରିୟାରେ ସ୍ୱଚ୍ଛତା ରକ୍ଷା କରିବାରେ ବିଫଳ ହୋଇଥିବାରୁ ମୁଖ୍ୟ ନିର୍ବାଚନ ଆୟୋଗ ଜ୍ଞାନେଶ କୁମାର ତୁରନ୍ତ ନିଜ ପଦବୀରୁ ଇସ୍ତଫା ଦିଅନ୍ତୁ ବୋଲି କଂଗ୍ରେସ ଦାବି କରିଛି।
ଅନ୍ୟପଟେ, ଅଖିଳ ଭାରତୀୟ କଂଗ୍ରେସ କମିଟିର ସାଧାରଣ ସମ୍ପାଦକ ଜୟରାମ ରମେଶ ଏକ ସମ୍ବାଦପତ୍ରର ରିପୋର୍ଟକୁ ଆଧାର କରି ନିର୍ବାଚନ ଆୟୋଗଙ୍କ ବିରୋଧରେ ଗୁରୁତର ଅଭିଯୋଗ ଆଣିଛନ୍ତି। ନିର୍ବାଚନ ଆୟୋଗ ଜାରି କରିଥିବା ପ୍ରେସ୍ ବିଜ୍ଞପ୍ତିରେ କରାଯାଇଥିବା ଅଭିଯୋଗଗୁଡ଼ିକୁ ସିଧାସଳଖ ଖଣ୍ଡନ କରାଯାଇ ନାହିଁ। ଗୋଆ ଭୋଟର ତାଲିକାରୁ ଭୋଟରଙ୍କ ନାମ ହଟାଯିବା ଏବଂ ପରେ ତାହାକୁ ଯୋଡ଼ାଯିବା, କର୍ଣ୍ଣାଟକ, ତେଲେଙ୍ଗାନା, ବିହାର, ପଶ୍ଚିମବଙ୍ଗ ଆଦି ରାଜ୍ୟରେ ଭୋଟରଙ୍କ ସମସ୍ୟା, ଏବଂ ନୂଆ ଯୁବ ଭୋଟରମାନଙ୍କୁ ଭୋଟର ତାଲିକାରେ ଅନ୍ତର୍ଭୁକ୍ତ କରିବାରେ ସୃଷ୍ଟି କରାଯାଉଥିବା ଜଟିଳତା ଉପରେ କଂଗ୍ରେସ ପ୍ରଶ୍ନ ଉଠାଇଛି।
ନିର୍ବାଚନ ଆୟୋଗଙ୍କ ପକ୍ଷରୁ ସେମାନଙ୍କ ପୋର୍ଟାଲ ଯାଞ୍ଚ ପାଇଁ ବୈଷୟିକ ବିଶେଷଜ୍ଞଙ୍କୁ ସାମିଲ କରିବା ପାଇଁ ଦିଆଯାଇଥିବା ସ୍ପଷ୍ଟୀକରଣକୁ କଂଗ୍ରେସ ଅସାର ବୋଲି କହିବା ସହ ମୁଖ୍ୟ ନିର୍ବାଚନ ଆୟୋଗଙ୍କ ପକ୍ଷପାତିତା ଓ ବେଆଇନ୍ ପଦକ୍ଷେପ ବିରୋଧରେ ନିରନ୍ତର ସ୍ୱର ଉତ୍ତୋଳନ କରାଯିବ ବୋଲି ସ୍ପଷ୍ଟ କରିଛି। ଏହି ସବୁ ଦାବି ଓ ସମସ୍ୟାର ସମାଧାନ ପାଇଁ କଂଗ୍ରେସ ରାଜପଥକୁ ଓହ୍ଲାଇବ ଏବଂ ଆସନ୍ତା ୮ ତାରିଖର ଓଡ଼ିଶା ବନ୍ଦକୁ ପୂର୍ଣ୍ଣ ସଫଳ କରିବାକୁ ସମସ୍ତ ମେଣ୍ଟ ସହଯୋଗୀ ଓ ସାଧାରଣ ଜନତାଙ୍କ ସହଯୋଗ କାମନା କରାଯାଇଛି।