ଭୁବନେଶ୍ୱର: ମଙ୍ଗଳବାର ଦିନ ଦିଲ୍ଲୀରେ ‘ଇଣ୍ଡିଆ’ ମେଣ୍ଟ ମଞ୍ଚରେ ବିଜୁ ଜନତା ଦଳ (ବିଜେଡି)ର ଉପସ୍ଥିତି ଏବଂ ବୁଧବାର ଓଡ଼ିଶା ବନ୍ଦକୁ ସମର୍ଥନ ଘୋଷଣାକୁ ନେଇ ରାଜ୍ୟ ରାଜନୀତିରେ ବଡ଼ ଧରଣର ହଲଚଲ ସୃଷ୍ଟି ହୋଇଛି। ନବୀନ ନିବାସରେ ଗୁରୁତ୍ୱପୂର୍ଣ୍ଣ ବୈଠକ ସରି ବାହାରିବା ପରେ ବନ୍ଦକୁ ସମର୍ଥନ ନେଇ ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକଙ୍କ ଗୋଟିଏ ବୟାନ ରାଜ୍ୟ ରାଜନୀତିକୁ ଗରମ କରିଦେଇଥିଲା। ବିଜେଡି ସତରେ ‘ଇଣ୍ଡିଆ’ ମେଣ୍ଟରେ ସାମିଲ ହୋଇଗଲା କି ବୋଲି ସବୁଠି ଚର୍ଚ୍ଚା ଜୋର ଧରିଥିଲା। ତେବେ ଏହି ସୃଷ୍ଟ ଝଡ଼ ଶାନ୍ତ ନହେଉଣୁ ଅଧ ଘଣ୍ଟା ଯାଇନି, ପ୍ରମିଳା ମଲ୍ଲିକ ସମ୍ପୂର୍ଣ୍ଣ ପଲଟି ଯାଇଥିଲେ ଏବଂ ନିଜର ବୟାନ ବଦଳାଇ ଦେଇଥିଲେ। ନିଜ ସରକାରୀ ବାସଭବନରେ ଗଣମାଧ୍ୟମକୁ ଡାକି ସେ ସ୍ପଷ୍ଟ କରିଥିଲେ ଯେ ବିଜେଡି ଓଡ଼ିଶା ବନ୍ଦକୁ ସମର୍ଥନ କରିବ ନାହିଁ ଏବଂ କଂଗ୍ରେସ ପ୍ରତି ଦଳର କୌଣସି ଦୁର୍ବଳତା ନାହିଁ। ଏଥିସହିତ ସେ ପୁଣି ଥରେ ଦଳର ପୁରୁଣା ସମଦୂରତା ନୀତିର ପାଠ ପଢ଼ାଇଥିଲେ।
ତେବେ ମାତ୍ର ଅଧ ଘଣ୍ଟା ମଧ୍ୟରେ ପ୍ରମିଳା ମଲ୍ଲିକ କାହିଁକି ନିଜ ମତ ବଦଳାଇଲେ, ତାଙ୍କୁ କିଏ ବାଧ୍ୟ କଲା ଏବଂ କାହା ଚାପରେ ଏହି ନିଷ୍ପତ୍ତି ବଦଳାଗଲା, ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ନବୀନ ନିବାସ ବୈଠକରେ ଯଦି ଚର୍ଚ୍ଚା ହୋଇନଥିଲା, ତେବେ ପ୍ରମିଳା ମଲ୍ଲିକଙ୍କ ଭଳି ଜଣେ ଅନୁଭବୀ ନେତ୍ରୀ ଏତେ ବଡ଼ ବୟାନ କିପରି ଦେଲେ ବୋଲି ପ୍ରଶ୍ନ ଉଠୁଛି। ଦିଲ୍ଲୀରେ କେନ୍ଦ୍ରୀୟ ତଦନ୍ତ ବ୍ୟୁରୋ (ସି.ବି.ଆଇ.) ନିର୍ଦ୍ଦେଶକଙ୍କ ଇସ୍ତଫା ଦାବି ରାଲିରେ ‘ଇଣ୍ଡିଆ’ ମେଣ୍ଟ ସହ କାନ୍ଧକୁ କାନ୍ଧ ମିଶାଇବା ପରେ ଆଜି ଏହି ନିଷ୍ପତ୍ତି ବଦଳାଇବା ରାଜନୀତିକୁ ନୂଆ ମୋଡ଼ ଦେଇଛି। ବିଜେଡିର ଏହି ଆଭିମୁଖ୍ୟକୁ କଂଗ୍ରେସ କଡ଼ା ସମାଲୋଚନା କରି କହିଛି ଯେ ବିଜେଡି ଏବେ ସମ୍ପୂର୍ଣ୍ଣ ଦିଗହରା ହୋଇପଡ଼ିଛି। ଅନ୍ୟପଟେ ଭାରତୀୟ ଜନତା ପାର୍ଟି (ବିଜେପି) କଟାକ୍ଷ କରି କହିଛି ଯେ, ଦିଲ୍ଲୀରୁ ଫୋନ୍ ଆସିବା ପରେ ବିଜେଡି ନେତାମାନେ ଡରିଗଲେ, ପ୍ରମିଳା ମଲ୍ଲିକ କାହିଁକି ସ୍ୱର ବଦଳାଇଲେ ସେ ନିଜେ ହିଁ କହିପାରିବେ, କିନ୍ତୁ ଶହେଟା ମିଛ ମିଶି କେବେ ହେଲେ ସତ ହୋଇପାରିବ ନାହିଁ।
ଓଡ଼ିଶାରେ ସରକାରରୁ ଯିବା ପରେ ଗତ କେତୋଟି ରାଜନୈତିକ ଘଟଣାବଳୀକୁ ଦେଖିଲେ, ବିଜେଡି ଧୀରେ ଧୀରେ ‘ଇଣ୍ଡିଆ’ ମେଣ୍ଟ ଆଡ଼କୁ ଢଳୁଥିବା ଅନୁମାନ କରାଯାଉଛି। ରାଜନୈତିକ ସମୀକ୍ଷକଙ୍କ ମତରେ, ହତାଶ ହୋଇପଡ଼ିଥିବା କର୍ମୀ ଓ ଭୋଟରଙ୍କୁ ଭରସା ଦେବା ପାଇଁ ନବୀନ ପଟ୍ଟନାୟକ ବିଜେପି ବିରୋଧରେ ଲଢ଼େଇ ପାଇଁ ପ୍ରସ୍ତୁତ ଅଛନ୍ତି ବୋଲି ବାର୍ତ୍ତା ଦେବାକୁ ଚାହୁଁଛନ୍ତି। ଦିଲ୍ଲୀରୁ ଭୁବନେଶ୍ୱର, ରାଲିରୁ ବନ୍ଦ ଏବଂ ସମର୍ଥନରୁ ନିଷ୍ପତ୍ତି ବଦଳାଇବା ଭଳି ଘଟଣାବଳୀ ଦର୍ଶାଉଛି ଯେ, ନବୀନଙ୍କ ପୁରୁଣା ସମଦୂରତା ନୀତି ଏବେ ସମ୍ପୂର୍ଣ୍ଣ କାଠଗଡ଼ାରେ ଛିଡ଼ା ହୋଇଛି, ଯାହାକୁ ନେଇ ଦଳ ଭିତରେ ଓ ବାହାରେ ବିରାଟ ପ୍ରଶ୍ନବାଚୀ ସୃଷ୍ଟି ହୋଇଛି।