ଭୁବନେଶ୍ବର: ଓଡ଼ିଶାର କୃଷି ଓ ଶକ୍ତି କ୍ଷେତ୍ରରେ ଏକ ନୂତନ ଯୁଗର ଆରମ୍ଭ କରିବା ପାଇଁ ରାଜ୍ୟ ସରକାର ଏକ ଐତିହାସିକ ଓ ଯୁଗାନ୍ତକାରୀ ପଦକ୍ଷେପ ଗ୍ରହଣ କରିଛନ୍ତି। ନୂଆଦିଲ୍ଲୀସ୍ଥିତ ଭାରତ ମଣ୍ଡପମ୍ଠାରେ ଆୟୋଜିତ ସପ୍ତମ ବିଶ୍ୱ ଆଗ୍ରି-ଫୋଟୋଭୋଲ୍ଟାଇକ୍ସ ସମ୍ମିଳନୀରେ ଯୋଗଦେଇ ଓଡ଼ିଶାର ଉପମୁଖ୍ୟମନ୍ତ୍ରୀ ତଥା କୃଷି, କୃଷକ ସଶକ୍ତିକରଣ ଏବଂ ଶକ୍ତି ମନ୍ତ୍ରୀ କନକ ବର୍ଦ୍ଧନ ସିଂହଦେଓ ରାଜ୍ୟର ସ୍ୱତନ୍ତ୍ର ସୌର-କୃଷି ନୀତି ୨୦୨୬ ଚୂଡ଼ାନ୍ତ ହେଉଥିବା ନେଇ ଆନୁଷ୍ଠାନିକ ଭାବେ ଘୋଷଣା କରିଛନ୍ତି। ଏହି ନୂତନ ନୀତି ପ୍ରଣୟନ କରିବାରେ ଓଡ଼ିଶା ସମଗ୍ର ଦେଶରେ ପ୍ରଥମ ରାଜ୍ୟ ହେବାର ଗୌରବ ହାସଲ କରିବାକୁ ଯାଉଛି। କେନ୍ଦ୍ର ନୂତନ ଓ ନବୀକରଣୀୟ ଶକ୍ତି ମନ୍ତ୍ରଣାଳୟ ସମେତ ବିଶ୍ୱସ୍ତରୀୟ ଗବେଷଣା ସଂସ୍ଥାମାନଙ୍କ ମିଳିତ ସହଯୋଗରେ ଆୟୋଜିତ ଏହି ସମ୍ମିଳନୀରେ ଅଭିଭାଷଣ ଦେଇ ଉପମୁଖ୍ୟମନ୍ତ୍ରୀ ‘ଗୋଟିଏ ଜମି, ଦୁଇଟି ଅମଳ’ ଦୂରଦୃଷ୍ଟି ଉପସ୍ଥାପନ କରିବା ସହ ‘ପ୍ରଥମେ କୃଷକ, ତା’ପରେ ସୌର ପ୍ୟାନେଲ୍’ ମୂଳମନ୍ତ୍ର ଆଧାରରେ କୃଷି ଉତ୍ପାଦନ ଓ ସ୍ୱଚ୍ଛ ଶକ୍ତି ଉତ୍ପାଦନ ମଧ୍ୟରେ ସମନ୍ୱୟ ରକ୍ଷା କରିବା ଉପରେ ବିଶେଷ ଗୁରୁତ୍ୱାରୋପ କରିଥିଲେ। ରାଜ୍ୟର ଚାଷୀମାନଙ୍କୁ କେବଳ ଖାଦ୍ୟ ଉତ୍ପାଦକ ନୁହେଁ, ବରଂ ଶକ୍ତି ଉତ୍ପାଦକ ଭାବେ ଗଢ଼ିତୋଳି ସେମାନଙ୍କୁ ଆର୍ଥିକ ସ୍ୱାବଲମ୍ବୀ କରିବା ଏହି ଯୋଜନାର ମୁଖ୍ୟ ଲକ୍ଷ୍ୟ ବୋଲି ସେ ପ୍ରକାଶ କରିଛନ୍ତି।
ପ୍ରସ୍ତାବିତ ନୀତି ଅନୁଯାୟୀ, ୨୦୩୦ ମସିହା ସୁଦ୍ଧା ଓଡ଼ିଶାରେ ୧ ଗିଗାୱାଟ୍ କ୍ଷମତା ବିଶିଷ୍ଟ ସୌର-କୃଷି ପ୍ରକଳ୍ପ ସ୍ଥାପନ ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଛି। ଚାଷୀମାନଙ୍କ ସ୍ୱାର୍ଥ ରକ୍ଷା ପାଇଁ କଠୋର ଆଇନଗତ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି, ଯେଉଁଥିରେ ପ୍ରତ୍ୟେକ ପ୍ରକଳ୍ପ ସ୍ଥଳର ଅତିକମରେ ୯୦ ପ୍ରତିଶତ ଜମିରେ ସକ୍ରିୟ ଚାଷ କାର୍ଯ୍ୟ ଜାରି ରହିବ ଏବଂ ଜମିର କୃଷି ବର୍ଗୀକରଣ ସହ ଫସଲ ବୀମା ଯୋଗ୍ୟତା ସମ୍ପୂର୍ଣ୍ଣ ଅକ୍ଷୁର୍ଣ୍ଣ ରହିବ। ଏହି ବ୍ୟବସ୍ଥା ଦ୍ୱାରା କୃଷକମାନେ ନିଜେ ସୌର ପ୍ରକଳ୍ପ ସ୍ଥାପନ କରି ଫସଲ ବିକ୍ରି ଏବଂ ବିଦ୍ୟୁତ୍ ଉତ୍ପାଦନରୁ ଦ୍ୱିଗୁଣିତ ଆୟ କରିପାରିବେ କିମ୍ବା ଶକ୍ତି ଉତ୍ପାଦନକାରୀ ସଂସ୍ଥାମାନଙ୍କ ସହ ଦୀର୍ଘକାଳୀନ ଭଡ଼ା ଚୁକ୍ତି କରି ନିଶ୍ଚିତ ରୋଜଗାର ପାଇପାରିବେ। ନିବେଶକମାନଙ୍କୁ ସୁରକ୍ଷା ଯୋଗାଇବା ପାଇଁ ରାଜ୍ୟ ବିଦ୍ୟୁତ ନିଗମ ସହିତ ୨୫ ବର୍ଷର ବିଦ୍ୟୁତ୍ କ୍ରୟ ଚୁକ୍ତି, ନିଶ୍ଚିତ ବିଦ୍ୟୁତ୍ ଗ୍ରହଣ ଏବଂ ସଂଯୋଗୀକରଣ ଅଧିକାର ପ୍ରଦାନ କରାଯାଉଛି। ଏହା ସହ କୃଷକମାନଙ୍କ ପାଇଁ ଏହି ସୌର ପ୍ରୋତ୍ସାହନକୁ ବୁନ୍ଦା ଜଳସେଚନ, ଶୀତଳ ଭଣ୍ଡାର, ସୌର ପମ୍ପ ଏବଂ କୃଷି ପ୍ରକ୍ରିୟାକରଣ କେନ୍ଦ୍ର ସହିତ ସମନ୍ୱିତ କରାଯାଉଛି।
ଆଗାମୀ ଦିନରେ ତାପମାତ୍ରା ବୃଦ୍ଧି ଓ ଅନିୟମିତ ବର୍ଷାର ସମ୍ମୁଖୀନ ହେବା ପାଇଁ ଜଳବାୟୁ ସହନଶୀଳତାର ଆବଶ୍ୟକତା ଉପରେ ଉପମୁଖ୍ୟମନ୍ତ୍ରୀ ଦୃଷ୍ଟିପାତ କରିଥିଲେ। ସେ ଦର୍ଶାଇଥିଲେ ଯେ, ନିର୍ଦ୍ଦିଷ୍ଟ ଉଚ୍ଚତାରେ ସ୍ଥାପିତ ସୌର ପ୍ୟାନେଲଗୁଡ଼ିକ କ୍ଷେତ୍ରରେ ଅନୁକୂଳ ଜଳବାୟୁ ସୃଷ୍ଟି କରିବା ସହ ମୃତ୍ତିକାର ଆର୍ଦ୍ରତା ରକ୍ଷା କରିବ ଏବଂ ପ୍ରତିକୂଳ ପାଣିପାଗରୁ ଫସଲକୁ ସୁରକ୍ଷା ଯୋଗାଇବ। ପୂର୍ବରୁ ଆୟୋଜିତ ଅକ୍ଷୟ ଶକ୍ତି ନିବେଶକ ସମ୍ମିଳନୀରେ ୬.୮ ଗିଗାୱାଟ୍ କ୍ଷମତା ପାଇଁ ୬୭,୦୦୦ କୋଟି ଟଙ୍କାର ନିବେଶ ପ୍ରସ୍ତାବ ମିଳିଥିବା ବେଳେ ଏବେ ୧ ମେଗାୱାଟ୍ର ପ୍ରାରମ୍ଭିକ ପ୍ରକଳ୍ପ କାର୍ଯ୍ୟକାରୀ ହେଉଛି। ରାଜ୍ୟର ୪୦.୭ ଲକ୍ଷ ଏକର ଚାଷଜମି ଏବଂ ୪୭.୭ ଲକ୍ଷ ଏକର ପଡ଼ିଆ ଜମିରେ ଅତ୍ୟାଧୁନିକ ସୌର-କୃଷି ସମାଧାନର ପରୀକ୍ଷଣ ପାଇଁ ସିଙ୍ଗାପୁରର ପ୍ରସିଦ୍ଧ ବୈଷୟିକ ବିଶ୍ୱବିଦ୍ୟାଳୟ ସହ ମିଳିତ ଭାବେ କାର୍ଯ୍ୟ ଜାରି ରହିଛି। ଏହି ସମ୍ମିଳନୀରେ ରାଜ୍ୟ ଶକ୍ତି ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ବିଶାଳ କୁମାର ଦେବ, କୃଷି ବିଭାଗର କମିଶନର ତଥା ଶାସନ ସଚିବ ସଚିନ ରାମଚନ୍ଦ୍ର ଜାଧବଙ୍କ ସମେତ ବହୁ ବରିଷ୍ଠ ଅଧିକାରୀ ଉପସ୍ଥିତ ଥିଲେ।