ସମୀକ୍ଷା ବ୍ୟୁରୋ
ଗତକାଲି ବିଳମ୍ବିତ ରାତ୍ରିରେ ଭାରତର ଚନ୍ଦ୍ରଯାନ ମିଶନ ବିଫଳ ହୋଇଛି। ଏହାକୁ ନେଇ ବେଙ୍ଗାଲୁରୁ ସ୍ଥିତ ଇସ୍ରୋ ମୁଖ୍ୟାଳୟରୁ ନିଜର ବକ୍ତବ୍ୟ ରଖିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ଇସ୍ରୋର ବୈଜ୍ଞାନିକଙ୍କୁ ସମ୍ବୋଧିତ କରି ମୋଦି କହିଛନ୍ତି ବିଜ୍ଞାନରେ ବିଫଳତା ବୋଲି କିଛି ଜିନିଷ ନଥାଏ। ବିଫଳତା ସର୍ବଦା ସଫଳତାର ଉତ୍ସ ହୋଇଥାଏ। ଇସ୍ରୋର ବୈଜ୍ଞାନିକ ମାନଙ୍କୁ ସମ୍ବୋଧିତ କରି ମୋଦି କହିଛନ୍ତି, ଆପଣଙ୍କ ପାଇଁ ଦେଶବାସୀ ଗର୍ବିତ, ଆପଣ ମାନେ ଦେଶର ମସ୍ତକ ଉଚ୍ଚରେ ରଖିବା ପାଇଁ ସର୍ବଦା ନିଜର ସ୍ବପ୍ନ ସହିତ ସାଲିସ କରିଥାନ୍ତି, ତେଣୁ ଏହି ବିଫଳତାରେ ବୈଜ୍ଞାନିକ ମାନେ ନିରାଶ ନହୋଇ ଆଗକୁ ବଢିବା ଉଚିତ୍ ବୋଲି ମୋଦି କହିଥିଲେ। ନିଜର ୩୦ ମିନିଟର ଅଭିଭାଷଣ ପରେ ଇସ୍ରୋ ଚେୟାରମ୍ୟାନ୍ କେ ଶିବନଙ୍କୁ ଆଲିଙ୍ଗନ କରି ସାନ୍ତ୍ବନା ପ୍ରଦାନ କରିଥିଲେ ମୋଦି। ପ୍ରତିବନ୍ଧକକୁ ଅତିକ୍ରମ କରି ସଫଳତା ହାସଲ କରିବା ଆମେ ଭଲଭାବରେ ଜାଣିଛେ ଏବଂ ଆମେ ଏହା କରି ଦେଖାଇବା ବୋଲି ମୋଦି କହିଥିଲେ।
ଗତକାଲି ରାତିରେ ମିଶନର ସିଧା ପ୍ରସାରଣକୁ ଉଭୟ ଶିବନ ଏବଂ ମୋଦି ଦେଖୁଥିଲେ ମାତ୍ର ମିଶନର ବିଫଳତା ନେଇ ଶିବନଙ୍କ ସୂଚନା ପରେ ମୋଦି ତଳକୁ ଚାଲି ଆସିଥିଲେ। ଏହାକୁ ନେଇ ମୋଦି କହିଛନ୍ତି, ବିଫଳତା ପରେ ସମସ୍ତଙ୍କ ମୁହଁରେ ଚିନ୍ତାର ଏକ ଝଲକ ଦେଖିବାକୁ ମିଳିଥିଲା ତେଣୁ ସେହି ସମୟରେ ସେଠାରୁ ଚାଲିଯାଇଥିଲି। ଉଲ୍ଲେଖଯୋଗ୍ୟ ଯେ, ଏହି ମିଶନର ମାତ୍ର ୫ ପ୍ରତିଶତ ବିଫଳ ହୋଇଛି, କିନ୍ତୁ ଯେହେତୁ ଅର୍ବିଟର କାର୍ଯ୍ୟ କରୁଛି ଏହା ଆସନ୍ତା ଏକ ବର୍ଷ ପର୍ଯ୍ୟନ୍ତ ଏହା ଚନ୍ଦ୍ର ପୃଷ୍ଠର ଫଟୋ ଉତ୍ତୋଳନ କରିବା ସହିତ ଅନ୍ୟାନ୍ୟ ଅନୁଧ୍ୟାନ କରିପାରିବ ବୋଲି ଜଣାପଡିଛି। ଆମେରିକାର ଚନ୍ଦ୍ର ମିଶନ ଆପୋଲୋରେ ସମୁଦାୟ ୧୦୦ ବିଲିୟନ୍ ଡଲାର ଖର୍ଚ୍ଚ ହୋଇଥିବା ବେଳେ ଭାରତ ମାତ୍ର ୧୪୦ ମିଲିୟନ୍ ଡଲାରରେ ଚନ୍ଦ୍ର ପୃଷ୍ଠରେ ପହଞ୍ଚିଛି। ତେଣୁ ଏହି ମିଶନରୁ ମିଳିଥିବା ଅଭିଜ୍ଞତା ଭାରତ ନିଜର ଗଗନାୟନ ମିଶନରେ ଉପଯୋଗ କରିପାରିବ ବୋଲି ମୋଦି କହିଛନ୍ତି।