କେଦାର ମିଶ୍ର
ସବୁ ଗଣମାଧ୍ୟମ ସଂସ୍ଥା କହୁଛନ୍ତି, ସେମାନେ ଲୋକଙ୍କ ପାଇଁ ଲେଖୁଛନ୍ତି। ଲୋକଙ୍କ ପାଇଁ ଲେଖିବାର ବାହାନାରେ ରାଜନୈତିକ ରୋଟି ସେକିବାର ନିର୍ଲଜ ପ୍ରକ୍ରିୟା ଆମେ ଦେଖିଆସୁଛୁ। ମାଲିକର ପ୍ରଚାରକ ହେବାକୁ ମନା କରିଦେବାର ସାହସ କୌଣସି ସାମ୍ବାଦିକର ନାହିଁ, ଏକଥା ନିଧାର୍ୟ ସତ୍ୟ। କିନ୍ତୁ ମାଲିକକୁ ଖୁସି କରିବାକୁ ଯାଇ ଆମେ ଚରିତ୍ର ସଂହାର କରିବୁ, ଖୋଲାଖୋଲି ମା ଭଉଣୀଙ୍କୁ ସୁରାସାକିର ମାଧ୍ୟମ ବୋଲି ଲେଖିବୁ, ଏଇଟା ସାମ୍ବାଦିକତା ନୁହଁ, ବରଂ ଏହାକୁ ଦଲାଲଗିରି କହିବା ସମୀଚୀନ ହେବ। ଯେଉଁ ମହିଳାମାନେ ରାଜନୀତି କରନ୍ତି ବା ଯେଉଁ ରାଜନୈତିକ କାର୍ୟକ୍ରମକୁ ମହିଳାମାନେ ଯାଆନ୍ତି, ସେଠି ସେମାନଙ୍କର ଭୂମିକା ସାକିର ବୋଲି ଯଦି ଓଡିଶାର ଏକ ପ୍ରତିଷ୍ଠିତ ଗଣମାଧ୍ୟମ ଲେଖେ, ତାହେଲେ ସେ ଗଣମାଧ୍ୟମକୁ ମହିଳା ବିରୋଧୀ ନୁହଁ, ବରଂ ଅପରାଧୀ ବୋଲି କହିବା ଉଚିତ ହେବ। ଦୁର୍ଭାଗ୍ୟକ୍ରମେ ଏମିତି ଏକ ରୁଚିହୀନ ସମ୍ବାଦ ପ୍ରକାଶ କରିଥିବା ସଂସ୍ଥାର ମାଲିକ ଏ ରାଜ୍ୟର ଜଣେ ଅତ୍ୟନ୍ତ ସମ୍ମାନୀତ ମହିଳା।
ହଁ, ଆମେ ଓଟିଭି ଗ୍ରୁପ ଦ୍ଵାରା ପ୍ରକାଶ ପାଉଥିବା “ଓଡିଶା ରିପୋର୍ଟର” ୱେବ ସାଇଟର ଏକ ଖବର କଥା କହୁଛୁ। “ଗସିପ ଗଳି” ସ୍ତମ୍ଭରେ ପ୍ରକାଶିତ “ବିଜେଡ଼ିର ଚାଷୀ ଦରଦ ନା ହଲି ଡେ ଟ୍ରିପ” ଖବରରେ (ଯଦିଓ ଏହାକୁ ଗୁଳିଗପ ବୋଲି କୁହାଯାଇଛି) ଏମିତି କିଛି ଧାଡି ରହିଛି ଯାହାକୁ କି ସଭ୍ୟ ସାମ୍ବାଦିକତାର ଭାଷା ବୋଲି କୁହାଯାଇପାରିବା। ଓଡିଶା ରିପୋର୍ଟର ର ଭାଷା ରେ – “ଚର୍ଚ୍ଚା ହେଉଛି, ଦଳର ଆଗଧାଡ଼ିର କିଛି ବିଧାୟକ ଓ ନେତା କୁଆଡ଼େ ଓଡ଼ିଶା ସରକାରଙ୍କ ଓଡ଼ିଶା ଭବନ କି ଓଡ଼ିଶା ସଦନରେ ନରହି ପଞ୍ଚତାରକା ହୋଟେଲକୁ ବାଛିଛନ୍ତି। ଗତକାଲି ରାତିଠୁ ସୁରାସାକିରେ ମଦମସ୍ତ ଥିବା ଏହି ନେତାମାନଙ୍କ ଆଚରଣ ବି ଦଳର କିଛି ବରିଷ୍ଠ ନେତାଙ୍କୁ କୁଆଡ଼େ ଅସନ୍ତୁଷ୍ଟ କରିଛି। ଓଡ଼ିଶାରୁ କୁଆଡ଼େ ଟ୍ରେନ ଓ ପ୍ଲେନରେ ପ୍ରାୟ ୨ହଜାର କର୍ମୀ ଓ ନେତା ଦିଲ୍ଲୀ ଯାଇଛନ୍ତି। ଏମାନଙ୍କ ମଧ୍ୟରେ ଦଳୀୟ ନେତ୍ରୀଙ୍କ ସଂଖ୍ୟା ପ୍ରାୟ ୨୦୦। ନିର୍ବାଚନୀ ବର୍ଷରେ ନିଜର ଗୁରୁତ୍ୱ ବଢ଼ାଇ ଟିକେଟ୍ ଖଣ୍ଡେ ହାସଲ କରିବା ଚକ୍କରରେ ବି ଏହି ନେତ୍ରୀମାନେ କୁଆଡ଼େ ଅଛନ୍ତି। ଯେଉଁଥିପାଇଁ ଦଳର ଆଗ ଧାଡ଼ିର ଯୁବନେତାମାନଙ୍କୁ ଭେଟିବାକୁ କୁଆଡ଼େ ଏହି ନେତ୍ରୀମାନଙ୍କ ଭିଡ଼ ଜମିଛି।”
ଏହି ଗୁଲିଗପରେ ଟ୍ରେନରେ ଥିବା ଗୋଟେ ନିର୍ଦ୍ଦିଷ୍ଟ ଦଳର ୨୦୦ ଜଣ ଯାକ ମହିଳା ନେତ୍ରୀଙ୍କ ଚରିତ୍ରକୁ ଫୁଃ କରି ଉଡେଇ ଦିଆ ଯାଇଛି। କୌଣସି ରାଜନୈତିକ ରାଲିରେ ଯୋଗଦେବା ପାଇଁ ପୁରୁଷ ଓ ମହିଳା ଗୋଟିଏ ଟ୍ରେନରେ ଯିବା ଅପରାଧ କି ? ନାରୀ ଓ ପୁରୁଷ ର ସମ୍ପର୍କ କଣ କେବଳ ବିଳାସ ବ୍ୟସନର? ଗୁଜବ ରଟନା କରିବା ନାଁରେ ମହିଳାମାନଙ୍କର ଚରିତ୍ର ସଂହାର ପାଇଁ ଜାଗି ମଙ୍ଗତ ପଣ୍ଡାଙ୍କ ଭଳି ଜଣେ ଅତ୍ୟନ୍ତ ସଚେତନ ମହିଳା ତାଙ୍କ ଗଣମାଧ୍ୟମକୁ ବ୍ୟବହାର କରୁଛନ୍ତି ବୋଲି କହିବାକୁ ଆମେ ଚାହୁଁନାହୁଁ, କିନ୍ତୁ ଏପ୍ରକାର ନିକୃଷ୍ଟ ସାମ୍ବାଦିକତାକୁ ଓଡିଶାର ଏକ ନମ୍ବର ଗଣମାଧ୍ୟମ ସଂସ୍ଥା ଯେତେବେଳେ ପ୍ରୋତ୍ସାହିତ କରୁଛି, ତାକୁ ଗ୍ରହଣୀୟ ବୋଲି ଆମେ କହି ପାରିବୁ ନାହିଁ।
ଏହି ଖବର ସହିତ ସଂଯୁକ୍ତ କାର୍ଟୁନଟି ମଧ୍ୟ ଅତ୍ୟନ୍ତ ଅରୁଚିକର। ଆମେ ବାକ ସ୍ଵାଧୀନତାର ବିରୋଧ କରୁନାହୁଁ, କିନ୍ତୁ ବାକ ସ୍ଵାଧୀନତା ଆଳରେ ଗୋଟେ ରାଜନୈତିକ ଦଳର ନେତ୍ରୀମାନଙ୍କର ଚରିତ୍ର ଉପରେ ଏ ପ୍ରକାର କୁତ୍ସିତ ମନ୍ତବ୍ୟ ଦେବାର ହୀନ ଉଦ୍ୟମକୁ ବରଦାସ୍ତ କରାଯିବା ଉଚିତ ବୋଲି ମଧ୍ୟ ଆମେ ଭାବୁନାହୁଁ।
