ସମୀକ୍ଷା ବ୍ୟୁରୋ
କାଶତଣ୍ଡୀର ଫୁଲେ ଫୁଲେ ଶରତ ଆସିସାରିଛି । ଆଉ ଚାରିଆଡେ ପାର୍ବଣର ମାହୋଲ୍ । ମା’ ଆସୁଛନ୍ତି । ଧରା ସୁସଜ୍ଜିତ ହୋଇ ଅପେକ୍ଷା କରିଛି । ଶାରଦୀୟ ଦୁର୍ଗାପୂଜାର ପ୍ରସ୍ତୁତି ହୋଇସାରିଲାଣି । ଆଜିଠାରୁ ଶାରଦୀୟ ନରବାତ୍ରି ଆରମ୍ଭ ହୋଇଯାଇଛି । ନବରାତ୍ରୀ ଅବସରରେ ଆଜି ଶ୍ରଦ୍ଧାଳୁମାନେ ଦେବୀଙ୍କୁ ମନ୍ଦିର ଓ ପୀଠରେ ପୂଜାର୍ଚ୍ଚନା କରିଛନ୍ତି । ଆଧ୍ୟାତ୍ମିକ ବିଶ୍ୱାସ ଅନୁସାରେ ନବରାତ୍ରୀର ପ୍ରଥମ ଦିନରେ ମା’ଙ୍କୁ ପୂଜାର୍ଚ୍ଚନା କଲେ ବହୁ ଆଶୀର୍ବାଦ ମିଳିଥାଏ । ଏହି କ୍ରମରେ ଆଜି ସାରା ଭାରତ ବର୍ଷରେ ଥିବା ପ୍ରସିଦ୍ଧ ଦେବୀ ପୀଠରେ ନବରାତ୍ରୀ ଆରମ୍ଭ ହୋଇଛି । ମା’ ଦୁର୍ଗା ନବରାତ୍ରୀ କାଳରେ ଭକ୍ତଙ୍କୁ ବିଭିନ୍ନ ବେଶରେ ଦର୍ଶନ ଦେବେ । ନବରାତ୍ରୀ ହେଉଛି ଦଶହରା ମହୋତ୍ସବର ଆଦ୍ୟ ପର୍ବ । ଆଶ୍ୱିନ ଶୁକ୍ଲପକ୍ଷର ପ୍ରତିପଦ ତିଥିରୁ ଏହା ଆରମ୍ଭ ହୋଇ ଦଶହରାରେ ଶେଷ ହୋଇଥାଏ । ଏହି ନବରାତ୍ରି ଅବସରରେ ମା ଦୁର୍ଗାଙ୍କ ନଅଟି ସ୍ୱରୂପକୁ ପୂଜାର୍ଚ୍ଚନା କରାଯିବ । ଯେପରିକି ମା ଶୈଳପୁତ୍ରୀ, ବ୍ରହ୍ମଚାରିଣୀ, ଚନ୍ଦ୍ରଘଣ୍ଟା, କୁଷ୍ମାଣ୍ଡା, ସ୍କନ୍ଦମାତା,କାତ୍ୟାୟନୀ,କାଳରାତ୍ରୀ,ମହାଗୌରୀ ଏବଂ ସିଦ୍ଧଦାତ୍ରୀ ମା ଦୁର୍ଗାଙ୍କର ଭିନ୍ନ ଭିନ୍ନ ରୂପ । ନବରାତ୍ରିର ପ୍ରଥମ ଦିନ କଳଶ ସ୍ଥାପନା ବା ଘଟ ସ୍ଥାପନା କରାଯାଇଥାଏ । ଏହି ନଅ ଦିନ ଯାକ ବ୍ରତ ଧାରୀ ବ୍ରତ ରଖିଥାନ୍ତି ଏବଂ ଅଷ୍ଟମୀ ଏବଂ ନବମୀ ଦିନ କନ୍ୟା ପୂଜା କରାଯାଇଥାଏ ।
ହିନ୍ଦୁ ଧର୍ମରେ ନବରାତ୍ରିର ବହୁତ ମହତ୍ତ୍ବ ରହିଛି । ବର୍ଷକ ମଧ୍ୟରେ ୪ ଥର ନବରାତ୍ରି ପାଳିତ ହୋଇଥାଏ । ତେବେ ଚୈତ୍ର ଓ ଆଶ୍ବିନ ମାସ ଶୁଳ୍କ ପକ୍ଷ ପ୍ରତିପଦାର ପଡ଼ଡୁଥିବା ନବରାତ୍ରି ବହୁ ଲୋକପ୍ରିୟ । ସିଦ୍ଧି ସାଧନା ପାଇଁ ଏହି ଶାରଦୀୟ ନବରାତ୍ରି ବିଶେଷ ମହତ୍ତ୍ବ ରଖିଥାଏ । ଚଳିତ ଥର ଶାରଦୀୟ ନବରାତ୍ରି ଆରମ୍ଭ ହୋଇଯାଇଛି । ଆସନ୍ତୁ ଜାଣିବା ନବରାତ୍ରିରେ ମାତା କେଉଁ ଦିନ କେଉଁ ସ୍ବରୂପରେ ପୂଜା ପାଇବେ ।
ନବରାତ୍ରିର ପ୍ରଥମ ଦିନ – ସେପ୍ଟମ୍ବର ୨୯, ୨୦୧୯ – ଶୈଳୀପୁତ୍ର
ନବରାତ୍ରିର ଦ୍ବିତୀୟ ଦିନ – ସେପ୍ଟେମ୍ବର ୩୦ – ବ୍ରହ୍ମଚାରିଣୀ
ନବରାତ୍ରିର ତୃତୀୟ ଦିନ – ଅକ୍ଟୋବର ୧ – ଚନ୍ଦ୍ରଘଣ୍ଟା
ନବରାତ୍ରିର ଚତୁର୍ଥ ଦିନ – ଅକ୍ଟୋବର୨ – କୁଷ୍ମାଣ୍ଡା
ନବରାତ୍ରିର ପଞ୍ଚମ ଦିନ – ଅକ୍ଟୋବର ୩ – ସ୍କନ୍ଦମାତା
ନବରାତ୍ରିର ଷଷ୍ଠ ଦିନ – ଅକ୍ଟୋବର ୪ – ସ୍କନ୍ଧମାତା
ନବରାତ୍ରିର ସପ୍ତମ ଦିନ – ଅକ୍ଟୋବର ୫ – କାଳରାତ୍ରି
ନବରାତ୍ରିର ଅଷ୍ଟମ ଦିନ – ଅକ୍ଟୋବର ୬ – ମହାଗୌରୀ
ନବରାତ୍ରିର ନବମ ଦିନ – ଅକ୍ଟୋବର ୭ – ସିଦ୍ଧିଦାତ୍ରୀ
ଅକ୍ଟୋବର ୮ ତାରିଖ ଦିନ ମାତାଙ୍କର ବିଜୟା ଦଶମୀ ପାଳନ ହେବ ।
ଦେଶର ସମସ୍ତ ଶକ୍ତିପୀଠଗୁଡ଼ିକ ଏବେ ଚଳଚଞ୍ଚଳ ହୋଇପଡିଲାଣି । ଗତକାଲିଠାରୁ ମାତା ସମଲେଶ୍ବରୀଙ୍କ ଧବଳମୁଖୀ ବେଶ ହୋଇଛି । ସେହିପରି ଆଗାମୀ ନଅଦିନ ପର୍ଯ୍ୟନ୍ତ ମାତାଙ୍କର ଭିନ୍ନ ଭିନ୍ନ ବେଶ ପୂଜା କରାଯିବ । ପାର୍ବଣର ଖୁସିର ମାହୋଲ୍କୁ ଆହୁରି ଉଲ୍ଲସିତ ତଥା ରଙ୍ଗୀନ କରିବା ପାଇଁ ଗର୍ବା ତଥା ଦାଣ୍ଡିଆ ନୃତ୍ୟର କାର୍ଯ୍ୟକ୍ରମ କରାଯାଉଛି ।