ସମୀକ୍ଷା ବ୍ୟୁରୋ
କର୍ଣ୍ଣାଟକରେ ବିଜେପି ସରକାର ଗଢିବା ଲାଗି ଓ କୁମାରସ୍ଵାମୀ ସରକାରର ପତନ ଲାଗି ବିଜେପି ଅଧ୍ୟକ୍ଷ ଅମିତ ଶାହ ପ୍ରତ୍ୟକ୍ଷ ଭାବେ ସମ୍ପୃକ୍ତ ଥିଲେ ଓ ତାଙ୍କର ନିର୍ଦ୍ଦେଶରେ ହିଁ କଂଗ୍ରେସ ଓ ଜେଡିଏସର ବିଧାୟକମାନେ ଦଳବଦଳ କରିଥିଲେ ବୋଲି କର୍ଣ୍ଣାଟକ ମୁଖ୍ୟମନ୍ତ୍ରୀ ବି.ଏସ.ୟେଦିୟୁରାପ୍ପା ସ୍ଵୀକାର କରିଛନ୍ତି। ଏବେ ପ୍ରଘଟ ହୋଇଥିବା ଏକ ଭିଡିଓ କ୍ଲିପ ରେ ଶୁଣିବାକୁ ମିଳୁଛି ଯେ ୟେଦିୟୁରାପ୍ପା ଏହି ସମଗ୍ର କାଣ୍ଡ ପଛରେ ଅମିତ ଶାହ ରହିଛନ୍ତି ବୋଲି ତାଙ୍କ କର୍ମୀମାନଙ୍କୁ କହୁଛନ୍ତି। ଯେ କୌଣସି ଗଣତାନ୍ତ୍ରିକ ବ୍ୟବସ୍ଥାରେ ଏହା ଏକ ସାଂଘାତିକ ଅଭିଯୋଗ। ପୂର୍ବରୁ ଏ ପ୍ରକାର ଅଭିଯୋଗ କାରଣରୁ ଅନେକ ନେତା ଜେଲ ମଧ୍ୟ ଯାଇଛନ୍ତି।ହେଲେ ବିଜେପି ସରକାର ଅମଳରେ ଏ ପ୍ରକାର ଅନୈତିକ ବ୍ୟବସ୍ଥା ଗ୍ରହଣୀୟ ହୋଇ ଯାଇଛି।
ଏ ପ୍ରସଙ୍ଗରେ ସବୁଠୁ ବଡ ପ୍ରଶ୍ନ ହେଉଛି, ଦେଶର ଗୃହମନ୍ତ୍ରୀ ଥିବା ବ୍ୟକ୍ତି ଦଳବଦଳକୁ ପ୍ରୋତ୍ସାହନ ଦେବା ଓ ବିଧାୟକ ବିକାକିଣା କାରବାରରେ ସମ୍ପୃକ୍ତ ରହିବା, କେତେ ଦୂର ନୈତିକ? ଯଦି ଖୋଦ ଦେଶର ଗୃହମନ୍ତ୍ରୀ ଏ ପ୍ରକାର ବେଆଇନ ଓ ଅନୈତିକ କାର୍ୟରେ ସମ୍ପୃକ୍ତ ଥିବାର ପ୍ରମାଣ ମିଳେ, ତାହେଲେ ଏହାର ପରିଣତି ଅତ୍ୟନ୍ତ ଜଟିଳ। ଯଦିଓ ଗଣମାଧ୍ୟମରେ ବିଜେପିର ଏ ପ୍ରକାର ରଣନୀତିକୁ ଏକପ୍ରକାର ବଡ ସଫଳତା ବୋଲି କୁହାଯାଉଛି, ଆଇନ ଓ ନୀତି ଦୃଷ୍ଟିରୁ ଏହା ଆଦୌ ଗ୍ରହଣୀୟ ନୁହେଁ।
ଏହି ଟେପର ତଦନ୍ତ ଏବେ ଜରୁରୀ ନୁହେଁ କି? ସିବିଆଇ ଏ ପ୍ରସଙ୍ଗରେ ତଦନ୍ତ କରିବା ଉଚିତ ହେବନାହିଁ କି? ତେବେ ଗୃହମନ୍ତ୍ରୀଙ୍କ ଅଧୀନରେ ପୋଲିସ ଓ ତଦନ୍ତକାରୀ ସଂସ୍ଥା ସବୁ ରହିଥିବାରୁ, ଏହାର ସଠିକ ତଦନ୍ତ ହେବ କେମିତି?