କେଦାର ମିଶ୍ର
୨୦୧୯ ବର୍ଷର ଅନ୍ତିମ ଖବର ଭାବେ ନାଗରିକତା ସଂଶୋଧନ ଆଇନ ଓ ତାକୁ ନେଇ ଶାସକ ବିଜେପିର ଭୟକୁ ହିଁ ଆମେ ଗ୍ରହଣ କରିବାକୁ ବାଧ୍ୟ। ଆଜି ପର୍ୟନ୍ତ ସବୁ ନିଷ୍ପତ୍ତିକୁ ଲୋକଙ୍କ ଉପରେ ଲଦିଦେବାକୁ ଚାହୁଁ ଥିବା ବିଜେପି ନାଗରିକତା ପ୍ରସଙ୍ଗ ଓ ଏହାର ପରବର୍ତ୍ତୀ ନାଗରିକ ପଞ୍ଜୀକରଣ ପ୍ରସଙ୍ଗକୁ ନେଇ ହରଡଘଣା ରେ ପଡିଛି। ସଂସଦରେ ବିଜୁ ଜନତା ଦଳ, ସଂଯୁକ୍ତ ଜନତା ଦଳ ଓ ଆନ୍ନା ଡିଏମକେ ଭଳି ଦଳର ସମର୍ଥନରେ ନାଗରିକତା ବିଲ ଆଇନରେ ସିନା ପରିଣତ ହୋଇଗଲା, ହେଲେ ଲୋକେ ଏହାକୁ ଗ୍ରହଣ କଲେନାହିଁ। ସାରା ଦେଶରେ ଏହା ବିରୋଧରେ ବ୍ୟାପକ ପ୍ରତିବାଦ ହେଲା ଓ ସେ ପ୍ରତିବାଦକୁ ଦମନ କରିବାକୁ ଯାଇ ବିଜେପି ସରକାର ଆହୁରି ବଦନାମ ହେଲା। ଉତ୍ତରପ୍ରଦେଶରେ ଏହି ଆନ୍ଦୋଳନକୁ ଦମନ କରିବାକୁ ଯାଇ ପୋଲିସ ଗୁଣ୍ଡାବାହିନୀ ଭଳି ବ୍ୟବହାର କରିବାର ଦୃଶ୍ୟ ଦେଶବାସୀ ଦେଖିଲେ। ସଂସଦରେ ବିଲ ଆଇନ ଭାବରେ ଗୃହିତ ହେଲାପରେ ମଧ୍ୟ ଏହାକୁ ନେଇ ଆଜି ସାରାଦେଶରେ ବିତର୍କ ଓ ବିଦ୍ରୋହ ଅବ୍ୟାହତ ରହିଛି।
ଏହି ପ୍ରତିବାଦକୁ ହିନ୍ଦୁ ବନାମ ମୁସଲମାନ ସଂଘର୍ଷ ଭାବରେ ଦେଖାଇବାକୁ ବିଜେପି ଉଦ୍ୟମ କରିଥିଲେ ମଧ୍ୟ ଲୋକେ ସେହି ଭାବରେ ଏହାକୁ ଗ୍ରହଣ କରିନାହାନ୍ତି। ପ୍ରଥମେ ଏହା ଅନ୍ୟକୁ ନାଗରିକତା ଦେବାର ଆଇନ, ଛଡାଇବାର ନୁହଁ ବୋଲି ଯୁକ୍ତି କରୁଥିବା ବିଜେପି, ନିଜର ପୁରୁଣା ଭାଷଣ ଓ ଚିଠା ଆଗରେ ହାରିବାକୁ ବାଧ୍ୟ ହୋଇଛି। ନାଗରିକତା ସଂଶୋଧନ ଆଇନ, ମୁସଲମାନ ବିରୋଧୀ ନୁହଁ, ଏହା ଦେଶର ସମ୍ବିଧାନ ବିରୋଧୀ। ସମ୍ବିଧାନରେ ନାଗରିକତା ପ୍ରସଙ୍ଗ ଧର୍ମୀୟ ଆଧାରରେ ସ୍ଵୀକୃତି ପାଇବା କଥା ନୁହେଁ। ତେବେ ଏହି ପ୍ରସଙ୍ଗରେ ସୁପ୍ରିମ କୋର୍ଟ ତୁରନ୍ତ କିଛି ନିର୍ଦ୍ଦେଶ ନଦେବା ଫଳରେ ଲୋକ ଅସନ୍ତୋଷ ବଢିଛି ଓ ପ୍ରତିବାଦ ବ୍ୟାପକ ହୋଇଛି। ଲୋକଙ୍କ ଭିତରେ ରହିଥିବା ପୁଞ୍ଜିଭୂତ ଅସନ୍ତୋଷ ଏହି ଆଇନ ବିରୋଧରେ ଏକତ୍ରିତ ହୋଇଛି।
ସଂସଦରେ ଆଇନ କରିସାରିବା ପରେ, ଏହାକୁ କାର୍ୟକାରୀ କରିବାର ଦାୟିତ୍ଵ କେନ୍ଦ୍ର ସରକାରଙ୍କର। ନାଗରିକତା କେନ୍ଦ୍ର ବିଷୟ ହୋଇଥିବାରୁ ଏ ସମ୍ପର୍କରେ ରାଜ୍ୟମାନଙ୍କର ବିଶେଷ କିଛି ଭୂମିକା ନାହିଁ। ହେଲେ ଏହାର ପରବର୍ତ୍ତୀ ପଦକ୍ଷେପ ଭାବରେ ଯଦି ଜାତୀୟ ନାଗରିକତା ପଞ୍ଜୀକରଣ କାମ କରାଜୀ, ତାହେଲେ ତାକୁ ଦେଶର ଅର୍ଦ୍ଧାଧିକ ରାଜ୍ୟ ବିରୋଧ କରୁଛନ୍ତି। ଏପରିକି ନାଗରିକତା ସଂଶୋଧନ ସପକ୍ଷରେ ଭୋଟ ଦେଇଥିବା ବିଜେଡି, ଜେଡ଼ି-ୟୁ ଭଳି ଦଳ ଏହାକୁ ବିରୋଧ କରୁଛନ୍ତି। ପୂର୍ବରୁ ଏହି ସବୁ ପ୍ରକ୍ରିୟାକୁ ଏକ ବୃତ୍ତ ବୋଲି ଭାବୁଥିବା ବିଜେପି, ଏବେ ବହୁ ମୁହଁରେ ବହୁ ଭାଷା କହୁଛି। ସଂସଦରେ ପ୍ରବଳ ଉତ୍ତେଜନା ଓ ଉତ୍ସାହ ଦେଖାଇଥିବା ବିଜେପି ଏବେ ସୋସିଆଲ ମିଡିଆ ଓ ମିଡିଆ ଜରିଆରେ ନିଜର ପକ୍ଷ ରଖିବାକୁ ଚେଷ୍ଟା କରୁଛି। ଏହାକୁ ବିରୋଧ କରି ପ୍ରାଣ ହରାଇଥିବା ଲୋକଙ୍କ ବିରୋଧରେ ବିଜେପିର ବିଷୋଦଗାର ଅବ୍ୟାହତ ରହିଛି।
କୋଟି କୋଟି ଟଙ୍କା ଖର୍ଚ୍ଚ କରି ଏହା ସପକ୍ଷରେ ଜନମତକୁ ପ୍ରଭାବିତ କରିବାର ଉଦ୍ୟମ ଆରମ୍ଭ ହୋଇଛି। ଏହା ବିରୋଧରେ ହୋଇଥିବା ଆନ୍ଦୋଳନ ଅତ୍ୟନ୍ତ ସ୍ଵାଭାବିକ ଓ କୌଣସି ରାଜନୈତିକ ପୃଷ୍ଠପୋଷକତା ବିନା ହୋଇଥିବା ବେଳେ, ବିଜେପି ଏବେ ଏହା ସପକ୍ଷରେ ଜନମତ ସୃଷ୍ଟି କରାଇବାକୁ ପାଣି ଭଳି ଅର୍ଥ ବୁହାଇ ଚାଲିଛି। ସୋସିଆଲ ମିଡିଆରେ ପ୍ରବଳ ପ୍ରଚାର କରି ବିଜେପି ଭାବୁଛି, ଲୋକେ ଏଥିରେ ଭୂତେଇଯିବେ। ଦେଶର ଆର୍ଥିକ ଦୁରବସ୍ଥା ଉପରୁ ନଜର ହଟାଇବାକୁ ଯାଇ ନାଗରିକତା ପ୍ରସଙ୍ଗକୁ ଉତ୍ତପ୍ତ କରି ରଖିବାକୁ ବିଜେପି ଚାହୁଛି। ବିଜେପି ଭଲ ଭାବରେ ଜାଣେ ଯେ ଜାତୀୟ ନାଗରିକତା ପଞ୍ଜିକରଣକୁ ଲାଗୁ କରିବା ସହଜ ହେବନାହିଁ। ଏହା ଲାଗୁହେଲେ, ଆସାମରେ ଯେଉଁ ସ୍ଥିତି ହୋଇଛି, ସାରାଦେଶରେ ସେହି ସ୍ଥିତି ହେବ। ଅର୍ଥାତ ଏଥିରୁ ବେଆଇନ ଶରଣାର୍ଥୀ ବା ଅନୁପ୍ରବେଶକାରୀଙ୍କୁ ଚିହ୍ନଟ କରିବା ସମ୍ଭବ ହେବନାହିଁ। ବରଂ ଏହାର ଓଲଟା ଅନେକ ଦେଶର ବାସ୍ତବ ନାଗରିକ କାଗଜପତ୍ର ଅଭାବରେ ନିଜର ଜାତୀୟ ପରିଚୟ ହରାଇବେ।
ଏବେ ବିଜେପି ନେତାମାନେ କିଛି ବୁଦ୍ଧିଜୀବୀଙ୍କ ଘରକୁ ଯାଇ ତାଙ୍କୁ ଏହି ଆଇନ ସପକ୍ଷରେ ବୁଝାଉଛନ୍ତି। ତାହାହିଁ ଆମ ସମୟର ସବୁଠୁ ବଡ ନାଟକ। ଦେଶରେ ଏମିତି ଏକ ଆଇନ ସରକାର ଆଣିଛନ୍ତି, ଯାହାକୁ ବୁଦ୍ଧିଜୀବୀମାନେ କୁଆଡେ ବୁଝିବାକୁ ଅସମର୍ଥ। ସେହି କ୍ରମରେ ଆମେ ଓଡିଶାରେ ଏକ ଚମତ୍କାର ଚିତ୍ର ଦେଖିଲୁ। ବିଜେପିର ଉପ ସଭାପତି ବୈଜୟନ୍ତ ପଣ୍ଡା ବିଜେଡି ନେତା ସୌମ୍ୟରଞ୍ଜନ ପଟ୍ଟନାୟକଙ୍କୁ ଏହି ଆଇନ ବିଷୟରେ ବୁଝାଇବାକୁ ଯାଇଥିଲେ। ସୌମ୍ୟ ବାବୁ ଓଡିଶାର ସର୍ବାଧିକ ବିକ୍ରି ହେଉଥିବା ଖବର କାଗଜ “ସମ୍ବାଦ” ଓ କନକ ଟିଭିର ମୁଖିଆ। ବୈଜୟନ୍ତ ବାବୁ ରାଜ୍ୟର ଏକନମ୍ବର ଟିଭି ଚାନେଲ ଓ ଟିଭିର ପୃଷ୍ଠପୋଷକ। ଏ ଦୁହେଁ, କିଏ କାହାକୁ କଣ ବୁଝାଇଲେ?
ସୌମ୍ୟବାବୁ ନିଜେ ରାଜନୀତି ବିଜ୍ଞାନର ଅଧ୍ୟାପକ ଥିଲେ। ଆଗରୁ ସାଂସଦ ଥିଲେ, ଏବେ ବିଧାୟକ ଅଛନ୍ତି। ତାଙ୍କ ଦଳ ବିଜେଡି ନାଗରିକତା ସଂଶୋଧନ ଆଇନକୁ ସଂସଦରେ ସମର୍ଥନ କରିଛି। ତାପରେ ବି ସୌମ୍ୟ ପଟ୍ଟନାୟକଙ୍କୁ ବୁଝେଇବାକୁ ବୈଜୟନ୍ତ ପଣ୍ଡାଙ୍କୁ ତାଙ୍କ ପାଖକୁ ଯିବାକୁ ପଡିଲା କାହିଁକି? ବରଂ ଏହି ବିଲକୁ ବିରୋଧ କରୁଥିବା ସୌମ୍ୟ ବାବୁଙ୍କ ବଡଭାଇ ତଥା ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କୁ ଏହି ବିଲ ବାବଦରେ ବୁଝାଇବା ଉଚିତ ହୋଇଥାନ୍ତା।
ଅସଲରେ, ଏହି ଆଇନକୁ ଯେଉଁ ପ୍ରକାର ବିରୋଧ ହେଉଛି, ସେଥିରେ ଛାନିଆଁ ହୋଇ ବିଜେପି ନିଜର ପୁରୁଣା ଅଭ୍ୟାସ କ୍ରମେ ସୋସିଆଲ ମିଡିଆ ଆନ୍ଦୋଳନ ଓ ଫଟୋ-ଅପ ର ନାଟକ କରୁଛି।