ସମୀକ୍ଷା ବ୍ୟୁରୋ
ଗୋଟେ ବୋଲେରୋ ଗାଡିରେ ୩୫୦ କିଲୋଗ୍ରାମ ଆରଡିଏକ୍ସ ପୂରେଇ ଆତଙ୍କବାଦୀ ଆଦିଲ ଅହମଦ ଦର ଜାମ୍ମୁ-ଶ୍ରୀନଗର ଜାତୀୟ ରାଜପଥରେ ୭୮ଟି ଗାଡିରେ ଆସୁଥିବା କେନ୍ଦ୍ରୀୟ ସ୍ଵତନ୍ତ୍ର ପୋଲିସ ବଳ ବା ସିଆରପିଏଫ ର ୨୫୦୦ ଜବାନଙ୍କ ଉପରେ ଆତ୍ମଘାତି ଆକ୍ରମଣ କରି ୪୦ରୁ ଅଧିକ ଜବାନଙ୍କୁ ହତ୍ୟା କରିଛି। ଏହି ଜଘନ୍ୟ ଆତଙ୍କବାଦୀ ଆକ୍ରମଣରେ ୪୦ ରୁ ଅଧିକ ଜବାନ ଆହତ ହୋଇଛନ୍ତି। ଗତ ପାଞ୍ଚ ବର୍ଷ ଭିତରେ ଏହା ଆମର ଜବାନଙ୍କ ଉପରେ ସବୁଠୁ ବଡ ଆତଙ୍କବାଦୀ ଆକ୍ରମଣ। ପଠାଣକୋଟ ଓ ଉରି ଆକ୍ରମଣ ପରେ ପାକିସ୍ତାନରେ ଥିବା ଆତଙ୍କବାଦୀ ଜୈସ-ଏ-ଅହମଦ ଏହି ଆକ୍ରମଣ ପାଇଁ ନିଜକୁ ଦାୟୀ କରିବା ସହିତ ଏହି ଆତ୍ମଘାତି ଆକ୍ରମଣର ମୁଖ୍ୟ ଅପରାଧୀ ଆଦିଲ ଅହମଦ ଦରର ଭିଡିଓ ଜାରି କରିଛି। ଜାତୀୟ ରାଜପଥରେ ଏତେ ବଡ ଆକ୍ରମଣ ଘଟଣାକୁ ଭାରତ ସହଜ ଭାବରେ ଗ୍ରହଣ କରିବା ଆଦୌ ଉଚିତ ନୁହେଁ। ହେଲେ ଏ ପ୍ରକାର ଆକ୍ରମଣ ସମ୍ଭବ ହେଲା କେମିତି? ୩୫୦ କିଲୋଗ୍ରାମର ଭୟଙ୍କର ବିସ୍ଫୋରକ ନେଇ ଜଣେ ଆତଙ୍କବାଦୀ ରାଜରାସ୍ତାରେ ଏତେ ବଡ ହମଲା କରିବାର ସୁଯୋଗ ପାଇଲା କେମିତି? ପୁଲବାମା ଅଞ୍ଚଳରେ ସୁରକ୍ଷା ବ୍ୟବସ୍ଥା ଅତ୍ୟନ୍ତ ଶକ୍ତିଶାଳୀ ଥିଲା ଓ ଜବାନ ମାନେ ସେ ରାସ୍ତାରେ ଯିବା ପୂର୍ବରୁ ରାସ୍ତାକୁ “ସାନିଟାଇଜ” କରାଯାଇଥିଲା ବୋଲି କୁହାଯାଉଛି। ତା ସତ୍ତ୍ୱେ ବି ଏତେ ବଡ ଦୁର୍ଘଟଣା ଘଟିଲା କେମିତି?
ସବୁଠୁ ବିଡମ୍ବନା ର କଥା ହେଉଛି, ଏଇ ମାତ୍ର ଅଳ୍ପ ଦିନ ତଳେ ପ୍ରତିରକ୍ଷା ମନ୍ତ୍ରୀ ନିର୍ମଲା ସୀତାରାମନ କହିଥିଲେ ଯେ, ତାଙ୍କ ସରକାର ଅମଳରେ ବଡ ଆତଙ୍କବାଦୀ ଆକ୍ରମଣ ହୋଇନାହିଁ। ସେ ବୋଧେ ପଠାଣକୋଟ ଓ ଉରି ଆକ୍ରମଣ କଥା ଭୁଲି ଯାଇଥିଲେ। ଗତ କିଛି ବର୍ଷ ଭିତରେ କାଶ୍ମୀର ସମସ୍ୟା ଉତ୍କଟରୁ ଉତ୍କଟତର ହୋଇ ଚାଲିଛି। ସର୍ଜିକାଲ ଷ୍ଟ୍ରାଇକ ଓ ବିମୂଦ୍ରାକରଣ ମାଧ୍ୟମରେ କାଶ୍ମିରୀ ସନ୍ତ୍ରାସବାଦର ମେରୁଦଣ୍ଡ ଭାଙ୍ଗିଯାଇଛି ବୋଲି ଯେଉଁ ଦାବୀ କରାଯାଉଥିଲା, ତାହା ଆଜି ଭୁଲ ପ୍ରମାଣିତ ହୋଇଛି। କାଶ୍ମୀର ଓ ପାକିସ୍ତାନ ସୀମାନ୍ତରେ ଆମର ଜବାନମାନେ ନିରନ୍ତର ସହିଦ ହେଉଛନ୍ତି। ଆମର ସହିଦମାନଙ୍କ ପ୍ରତି ଆମେ ଗଭୀର ଶ୍ରଦ୍ଧାଞ୍ଜଳି ଜଣାଉଛୁ। ଦେଶ ସେମାନଙ୍କର ବଳିଦାନକୁ ସମ୍ମାନ ଦେଉଛି। ହେଲେ ଆମ ସହିଦଙ୍କ ରକ୍ତର ଖେଳ ଏମିତି କେତେ ଦିନ ଚାଲିଥିବ। ଏ ସମସ୍ୟାର ସ୍ଥାୟୀ ସମାଧାନ କଣ?
ସବୁଠୁ ଦୁର୍ଭାଗ୍ୟର କଥା ହେଉଛି, ଯେତେବେଳେ ବି କିଛି ଗୋଟେ ବଡ ଆତଙ୍କବାଦୀ ଆକ୍ରମଣ ହେଉଛି ତାକୁ ନେଇ ଆମର ଟେଲିଭିଜନ ଚାନେଲ ଗୁଡିକ ଅଧିକରୁ ଅଧିକ ଉତ୍ତେଜନା ସୃଷ୍ଟି କରିବାକୁ ଚେଷ୍ଟା କରନ୍ତି। ଏହାକୁ ନେଇ ରାଜନୈତିକ ଫାଇଦା ଉଠାଇବାର ପ୍ରତିଯୋଗିତା ଆରମ୍ଭ ହୋଇଯାଏ। ସହିଦଙ୍କୁ ସଲାମ କରିବା ବାହାନାରେ ଭୋଟ ମାଗିବାର ଅଶ୍ଳୀଳ ରାଜନୀତି ଚାଲେ। ତେବେ ଅସଲ ସତ୍ୟ ହେଉଛି, ଆତଙ୍କବାଦର ମୁକାବିଲା କ୍ଷେତ୍ରରେ ଆମକୁ ଏକ ସର୍ବସମ୍ମତ ନୀତି ଗ୍ରହଣ କରିବାକୁ ପଡିବ।
ଉଗ୍ର ରାଷ୍ଟ୍ରବାଦ ନାମରେ ବାସ୍ତବ ସ୍ଥିତିକୁ ଅଣଦେଖା କରିବାର ପରିଣାମ ଆମେ ଭୋଗି ଚାଲିଛୁ। କାଶ୍ମୀର ଉପତ୍ୟକାରେ ଚିରସ୍ଥାୟୀ ଶାନ୍ତି ଫେରେଇ ଆଣିବାର ଦାୟିତ୍ଵ ପ୍ରତ୍ୟେକ ଭାରତୀୟଙ୍କର। ସୀମାପାର ଆତଙ୍କବାଦର ମୁକାବିଲା ଲାଗି ଆମକୁ କାଶ୍ମୀରର ଜଣ ସାଧାରଣଙ୍କର ସାହାଜ୍ୟ ଦରକାର। କାଶ୍ମୀର ଓ କାଶ୍ମୀରବାସୀ ଆମ ଦେଶର ଅବିଚ୍ଚ୍ହେଦ୍ୟ ଅଙ୍ଗ। ତେଣୁ ସେମାନଙ୍କ ସହିତ ଏକ ରାଜନୈତିକ କଥାବାର୍ତ୍ତା ଆଜି ପାଇଁ ସବୁଠୁ ବଡ ଆବଶ୍ୟକତା। କାଶ୍ମୀର ପ୍ରସଙ୍ଗରେ ପାକିସ୍ତାନକୁ କଡା ଜବାବ ଆମକୁ ଦେବାକୁ ପଡିବ ଓ ସେ ଜବାବ କାଶ୍ମୀରର ଜନତା ହିଁ ଦେବେ।
ତେବେ ପୁଲବାମା ଘଟନା ପୂର୍ବରୁ କାଶ୍ମୀର ପୋଲିସ ତରଫରୁ ଏ ପ୍ରକାର ଆକ୍ରମଣ ହୋଇପାରେ ବୋଲି ଗୁଇନ୍ଦା ତଥ୍ୟ ମିଳିଥିଲା। ତା ସତ୍ତ୍ୱେ ବି କେଉଁଠି ଆମର ଭୁଲ ରହିଲା ତାର ତର୍ଜମା ହେବା ନିହାତି ଆବଶ୍ୟକ। ଏ ପ୍ରକାର ସ୍ଥିତିରେ ସାରା ଦେଶକୁ ଏକ ହୋଇ ଆତଙ୍କବାଦର ମୁକାବିଲା କରିବାର ଅଛି।