ନୂଆଦିଲ୍ଲୀ : କରୋନା ମୁକାବିଲା ପାଇଁ କେନ୍ଦ୍ର ସରକାର ଆଜି ବଡ ନିଷଷ୍ପତ୍ତି ନେଇଛନ୍ତି । ଆସନ୍ତା ଦୁଇ ବର୍ଷ ପାଇଁ ସାଂସଦ ପାଣ୍ଠିକୁ ସ୍ଥଗିତ ରଖିବାକୁ ନିଷ୍ପତ୍ତି ନେଇଛନ୍ତି । ସମସ୍ତ ସ୍ଥଗିତ ପାଣ୍ଠି କନ୍ସୋଲିଡେସନ୍ ଫଣ୍ଡକୁ ଯିବ ବୋଲି ସୂଚନା ଦେଇଛନ୍ତି କେନ୍ଦ୍ରମନ୍ତ୍ରୀ ପ୍ରକାଶ ଜାଭେଡକର୍ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ହୋଇଥିବା ବୈଠକରେ ଏପରି ନିଷ୍ପତ୍ତି ନିଆଯାଇଛି । ସୂଚନାଯୋଗ୍ୟ, ସାଂସଦଙ୍କ ପାଣ୍ଠି ବାର୍ଷିକ 10 କୋଟି ଲେଖାଏଁ ରହିଥିଲା । ଦୁଇ ବର୍ଷ ସ୍ଥଗିତ ସାଂସଦ ପାଣ୍ଠିରୁ 7900 କୋଟି ମିଳିବ । ଆସନ୍ତା 2020-2021 ଏବଂ 2021-2022 ବର୍ଷ ପାଇଁ ଏହି ସାଂସଦ ପାଣ୍ଠିକୁ ସ୍ଥଗିତ ରଖାଯିବ । କରୋନା ମୁକାବିଲା ପାଇଁ କନ୍ସୋଲିଡେସନ୍ ଫଣ୍ଡକୁ ଖର୍ଚ୍ଚ କରାଯିବ ବୋଲି କେନ୍ଦ୍ରସରକାର ନିଷ୍ପତ୍ତି ନେଇଛନ୍ତି ।
ସେହିପରି ସାଂସଦଙ୍କ ଦରମା କାଟିବାକୁ କେନ୍ଦ୍ର ସରକାର ନିଷ୍ପତ୍ତି ନେଇଛନ୍ତି । ଏକ ବର୍ଷ ଯାଏଁ ସମସ୍ତ ସାଂସଦଙ୍କ ଦରମାର 30 ପ୍ରତିଶତ କାଟିବାକୁ ମଧ୍ୟ ନିଷ୍ପତ୍ତି ନିଆଯାଇଛି। ରାଷ୍ଟ୍ରପତି, ଉପରାଷ୍ଟ୍ରପତି, ରାଜ୍ୟପାଳଙ୍କ ଦରମାର ମଧ୍ୟ 30 ପ୍ରତିଶତ ଦରମା କଟାଯିବ । ଦରମା କାଟିବାକୁ ରାଷ୍ଟ୍ରପତି, ଉପରାଷ୍ଟ୍ରପତି ଏବଂ ରାଜ୍ୟପାଳମାନେ ସ୍ୱେଚ୍ଛାକୃତ ଭାବେ ଏହି ନିଷ୍ପତ୍ତି ନେଇଛନ୍ତି।