ଭୁବନେଶ୍ବର, ଓଡିଶାର ସରକାର କୋଭିଡ ମୁକାବିଲା ପାଇଁ ଯେଉଁ ସବୁ ପଦକ୍ଷେପ ନେଉଛନ୍ତି ତାହା ସାରା ଦେଶ ପାଇଁ ଏକ ଉଦାହରଣ ପାଲଟିଛି। ଅନ୍ୟ ରାଜ୍ୟ ଓଡିଶାର ଏହି ମୁକାବିଲା ପକ୍ରିୟାକୁ ବାଃ ବାଃ କରିବାରେ ଲାଗିଛି। ବିଭିନ୍ନ ପଦକ୍ଷେପ ଭିତରେ ବର୍ତ୍ତମାନ ଆଉ ଏକ ନୂଆ ତଥା ଅଭିନବ କାର୍ଯ୍ୟକ୍ରମ ଲାଗୁ କରିଛନ୍ତି। ଏହାର ନାମ ରହିଛି ‘ଅପରେସନ ଶୁଭଯାତ୍ରା’।
ବାହାର ରାଜ୍ୟରେ ଅଟକି ରହିଥିବା ହଜାର ହଜାର ଓଡିଆମାନଙ୍କୁ ଓଡିଶା ଫେରାଇ ଆଣିବା ପାଇଁ ସରକାର ଏହି ନୂଆ କାର୍ଯ୍ୟକ୍ରମ ଲାଗୁ କରିଛନ୍ତି ବୋଲି ମୁଖ୍ୟମନ୍ତ୍ରୀଙ୍କ ପ୍ରଯୁକ୍ତିବିଦ୍ୟା ଓଏସଡି ଭାବେ କାର୍ଯ୍ୟ କରୁଥିବା ମନୋଜ ମିଶ୍ର କହିଛନ୍ତି। ଏଥିରେ ବିଭିନ୍ନ ରାଜ୍ୟରୁ ଟ୍ରେନ ଯୋଗେ ଓଡିଆମାନଙ୍କୁ ଆଣିବା ପାଇଁ ଲାଗୁ କରାଯାଇଛି। ପ୍ରଥମ ପର୍ଯ୍ୟାୟରେ କେରଳରୁ ଏହି ଅପରେସନ ଶୁଭଯାତ୍ରା ଆରମ୍ଭ କରାଯାଇଛି। କେରଳରୁ ଶୁକ୍ରବାର ଦିନ 11ଶହ 50 ଜଣ ଓଡିଆ ଏକ ସ୍ବତନ୍ତ୍ର ଟ୍ରେନରେ ଯାତ୍ରା କରିଛନ୍ତି। ଏହି ଟ୍ରେନଟି ରବିବାର ଦିନ ଓଡିଶାରେ ପହଁଚିବ।
ନବୀନ ସରକାରଙ୍କ ଏହି ‘ଅପରେସନ ଶୁଭଯାତ୍ରା’ କଣ ?
କରୋନା ଭାଇରସ ଯୋଗୁଁ ବିଭିନ୍ନ ରାଜ୍ୟରେ ହଜାର ହଜାର ଓଡିଆ ଫସି ରହିଛନ୍ତି। ବିଶେଷ କରି କେରଳ, ତାମିଲନାଡୁ, ଗୁଜୁରାଟ, ମୁମ୍ବାଇ ଏବଂ ଆନ୍ଧ୍ର ପ୍ରଦେଶରେ ଏମାନେ ଫସି ରହିଛନ୍ତି। ଏହି ଓଡିଆମାନଙ୍କୁ ରାଜ୍ୟକୁ ତଥା ତାଙ୍କ ଘରକୁ ଫେରାଇ ଆଣିବା ପାଇଁ ନବୀନ ସରକାର ଏହି କାର୍ଯ୍ୟକ୍ରମ ‘ଅପରେସନ ଶୁଭଯାତ୍ରା’ ଲାଗୁ କରିଛନ୍ତି।
କାର୍ଯ୍ୟକ୍ରମ ଅନୁସାରେ ରାଜ୍ୟ ସରକାର ରେଳ ବିଭାଗ ସହିତ ବୁଝାମଣା କରି ଓଡିଆଙ୍କୁ ଫେରାଇ ଆଣିବା ପାଇଁ କେତେକ ସ୍ବତନ୍ତ୍ର ଟ୍ରେନର ବ୍ୟବସ୍ଥା କରିଛନ୍ତି। ଏହି ଟ୍ରେନଗୁଡିକ ବିଭିନ୍ନ ରାଜ୍ୟରୁ ବାହାରିବ ବୋଲି ନିଷ୍ପତି କରାଯାଇଛି। ସେହି ଅନୁସାରେ ଶୁକ୍ରବାର ଦିନ କେରଳରୁ ଅପେରସନ ଶୁଭଯାତ୍ରାର ପ୍ରଥମ ଟ୍ରେନଟି ଯାତ୍ରା ଆରମ୍ଭ କରିଛି। ଏହି ଟ୍ରେନରେ 23ଟି ଜିଲ୍ଲାର 11 ଶହ 50 ଜଣ ଯାତ୍ରୀ ଯାତ୍ରା ଆରମ୍ଭ କରିଛନ୍ତି। ଏଥିରେ ସର୍ବାଧିକ କନ୍ଧମାଳ ଜିଲ୍ଲାର 382 ଜଣ ଯାତ୍ରୀ ଅଛନ୍ତି।
ତେବେ ଏହି ଯାତ୍ରୀମାନେ ଓଡିଶା ଫେରିବା ପାଇଁ ପୂର୍ବରୁ ଓଡିଶା ସରକାରଙ୍କ ତରଫରୁ କେରଳ ପ୍ରଶାସନକୁ ଅବଗତ କରାଯାଇ ଆଲୋଚନା କରିଥିଲେ। ଖୋଦ ମୁଖ୍ୟମନ୍ତ୍ରୀ କେରଳ ମୁଖ୍ୟମନ୍ତ୍ରୀଙ୍କ ସହିତ ଆଲୋଚନା କରିଥିଲେ। ସେହି ଅନୁସାରେ କେରଳ ପ୍ରଶାସନ କେଉଁ ଓଡିଆ କେଉଁ କେଉଁ ସ୍ଥାନରେ ରହିଛନ୍ତି ତାହାର ଏକ ତାଲିକା ପ୍ରସ୍ତୁତ କରିଥିଲେ।
ସେହି ତାଲିକା ଅନୁସାରେ ବିଭିନ୍ନ ସ୍ଥାନରେ ଥିବା ଓଡିଆମାନଙ୍କୁ କେରଳ ପ୍ରଶାସନ ତରଫରୁ ଗାଡି ବନ୍ଦୋବସ୍ତ କରାଯାଇ ଷ୍ଟେସନ ନିକଟକୁ ଅଣାଯାଇଥିଲା। ତେବେ ଟ୍ରେନରେ ବସିବା ପୂର୍ବରୁ ଅପରେସନ ଶୁଭଯାତ୍ରା ନିୟମ ଅନୁସାରେ ସେଠାରେ ସମସ୍ତଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇଥିଲେ। ସ୍ବାସ୍ଥ୍ୟ ଠିକ ଥିବାର ଜଣାପଡିବା ପରେ ସେମାନଙ୍କୁ ଗୋଟିଏ ଗୋଟିଏ ମେଡିକାଲ ସାର୍ଟିଫିକେଟ କେରଳ ପ୍ରଶାସନ ଦ୍ବାରା ପ୍ରଦାନ କରାଯାଇଛି।
ସେତିକି ନୁହେଁ ଏହି ଫେରନ୍ତାଙ୍କ ସଂପୂର୍ଣ୍ଣ ବିବରଣୀ ଏପରିକି ସେମାନେ କେଉଁ ଜିଲ୍ଲାର, କେଉଁଠି କି ଯିବେ, ତାଙ୍କର ଓଡିଶାରେ ସଂପର୍କିୟଙ୍କ ବିବରଣୀ, ସେମାନଙ୍କର ଫୋନ ନମ୍ବର ପ୍ରଭୃତି ସଂଗ୍ରହ କରାଯାଇଛି। କେରଳ ସରକାରଙ୍କ ତାଲିକା ଅନୁସାରେ ସମସ୍ତ ଯାତ୍ରୀ ଷ୍ଟେସନକୁ ଆସିଲେ କି ନାହିଁ ତାହା ଚେକିଂ କରାଯାଇ ଟ୍ରେନରେ ବସିବାକୁ ଅନୁମତି ଦିଆଯାଇଥିଲା। ଏହାପରେ କେରଳ ଷ୍ଟେସନରୁ ଟ୍ରେନ ଓଡିଶା ଅଭିମୁଖେ ବାହାରିଛି। ଷ୍ଟେସନରୁ ବାହାରିବା ବେଳେ ସେମାନଙ୍କୁ କେରଳ ସରକାରଙ୍କ ତରଫରୁ ଖାଦ୍ୟ ପୁଡିଆ, ପାଣି ବୋତଲ ପ୍ରଭୃତି ଜରୁରୀ ସାମଗ୍ରୀ ମଧ୍ୟ ପ୍ରଦାନ କରାଯାଇଛି। ଏପରିକି ରେଳ ବିଭାଗ ତରଫରୁ ସେମାନଙ୍କୁ ରାସ୍ତାରେ ଦୁବୁଡା ଷ୍ଟେସନରେ ରାତ୍ରୀ ଭୋଜନ ଦେବା ପାଇଁ ମଧ୍ୟ ବନ୍ଦୋବସ୍ତ କରାଯାଇଛି।
ଓଡିଶାରେ ପହଁଚିବା ପରେ ଯାତ୍ରୀମାନଙ୍କୁ କିପରି ପଠାଯିବ
ଏହି ସ୍ବତନ୍ତ୍ର ଟ୍ରେନଟି ରବିବାର ଦିନ ଓଡିଶାରେ ପହଁଚିବା ପରେ ଦୁଇଟି ଷ୍ଟେସନରେ ରହିବାର ବ୍ୟବସ୍ଥା କରାଯାଇଛି। ସେହି ଦୁଇଟି ଷ୍ଟେସନ ହେଲା ବ୍ରହ୍ମପୁର ନିକଟସ୍ଥ ଜଗନ୍ନାଥପୁର ଷ୍ଟେସନ ଏବଂ ଖୋର୍ଦ୍ଧାରୋଡ୍। ଏହି ଦୁଇଟି ଷ୍ଟେସନରେ ରାଜ୍ୟ ସରକାରଙ୍କ ତରଫରୁ ସ୍ବାଗତ କରିବା ପାଇଁ ବ୍ୟବସ୍ଥା କରାଯାଇଛି।
ସେଥିପାଇଁ ଗୃହ ବିଭାଗ ସଚିବ ସଂଜୀବ ଚୋପ୍ରାଙ୍କୁ ଏହାର ନୋଡାଲ ଅଫିସର ଭାବେ ନିଯୁକ୍ତି ଦିଆଯାଇଛି। ତାଙ୍କ ନେତୃତ୍ୟରେ 12 ଟି ଟିମ ଗଠନ କରାଯାଇଛି। ଏଥିରେ ପୋଲିସ, ଜିଲ୍ଲା ପ୍ରଶାସନ, ସ୍ବାସ୍ଥ୍ୟ କର୍ମି ପ୍ରମୁଖ ସଦସ୍ୟ ଅଛନ୍ତି। ଏମାନେ ଷ୍ଟେସନରେ ଉପସ୍ଥିତ ରହି ଯାତ୍ରୀମାନଙ୍କୁ ସ୍ବାଗତ କରିବା ସହିତ ଗନ୍ତବ୍ୟ ସ୍ଥଳକୁ ପଠାଇବାର ବ୍ୟବସ୍ଥା କରିବେ।
ପ୍ରଥମ ଷ୍ଟେସନ ଭାବ ଜଗନ୍ନାଥପୁରରେ କେତେ ଯାତ୍ରୀ ଓହ୍ଲାଇବେ ତାହାର ବିବରଣୀ ପ୍ରଶାସନ ପାଖରେ ରହିଛି। ଏହି ଲୋକମାନେ କେଉଁ କେଉଁ ସ୍ଥାନକୁ ଯିବେ ତାହାର ବିବରଣୀ ମଧ୍ୟ ରଖାଯାଇଛି। ସେହି ଅନୁସାରେ ସେମାନଙ୍କୁ ତାଙ୍କ ଗନ୍ତବ୍ୟ ସ୍ଥଳରେ ପହଁଚାଇବା ପାଇଁ ପ୍ରଶାସନ ତରଫରୁ ଗାଡିର ବନ୍ଦୋବସ୍ତ ମଧ୍ୟ କରାଯାଇଛି।
ସେମାନେ ଓହ୍ଲାଇବା ପରେ ସମସ୍ତଙ୍କୁ ନିଜ ନିଜ ଅଞ୍ଚଳ ବା ପଞ୍ଚାୟତରେ କରାଯାଇଥିବା କ୍ବାରଣ୍ଟାଇନ କେନ୍ଦ୍ରରେ ରଖାଯିବାର ବନ୍ଦୋବସ୍ତ କରାଯାଇଛି। ସେଠାରେ ସେମାନଙ୍କୁ 14 ଦିନ ପର୍ଯ୍ୟନ୍ତ ରହିବାକୁ ବାଧ୍ୟ କରାଯାଇଛି। ସେଥିପାଇଁ ସମସ୍ତ ରହଣି ବ୍ୟବସ୍ଥା ରାଜ୍ୟ ସରକାରଙ୍କ ତରଫରୁ କରାଯାଇଛି।
ଏହି ସ୍ବତନ୍ତ୍ର ଟ୍ରେନ ଆସିବା ସମୟରେ ଷ୍ଟେସନ ଭିତରକୁ ବାହାର ଲୋକଙ୍କୁ ଛଡା ଯିବ ନାହିଁ। ସେଥିପାଇଁ ପୋଲିସ ତରଫରୁ ବ୍ୟାପକ ବନ୍ଦୋବସ୍ତ କରାଯାଇଛି। କେବଳ ସେହି କାମ ପାଇଁ ନିଯୁକ୍ତ ହୋଇଥିବା ସରକାରୀ କର୍ମଚାରୀମାନଙ୍କୁ ଭିତରକୁ ଯିବା ପାଇଁ ଅନୁମତି ଦିଆଯାଇଛି।
କେରଳ ପରେ ଏହି ଅପରେସନ ଶୁଭଯାତ୍ରାରେ ଶନିବାର ଦିନ ସୁରଟରୁ ଆଉ ଏକ ଟ୍ରେନ ଓଡିଶା ଅଭିମୁଖେ ଯାତ୍ରା କରିବ। ଏହି ଟ୍ରେନଟି ବ୍ରହ୍ମପୁରର ଜଗନ୍ନାଥପୁର ଷ୍ଟେସନରେ ରହିବାର ବ୍ୟବସ୍ଥା କରାଯାଇଛି। ବର୍ତ୍ତମାନ କେରଳରୁ ଯେଉଁ 11ଶହ 50 ଜଣ ଆସୁଛନ୍ତି ସେମାନେ ସମସ୍ତେ ରାଜ୍ୟ ସରକାରଙ୍କ ତରଫରୁ ଜାରୀ କରାଯାଇଥି ପୋର୍ଟାଲରେ ମଧ୍ୟ ପଂଜିକୃତ କରିଛନ୍ତି।
ରାଜ୍ୟ ସରକାରଙ୍କ ଏହି ଅପରେସନ ଶୁଭଯାତ୍ରା ଏକ ଜାତୀୟ ମଡେଲ ଭାବେ ବିବେଚନା କରାଯାଇଛି। ଅନ୍ୟ ରାଜ୍ୟ ସରକାର ଏହାକୁ ଅନୁସରଣ କରିବା ପାଇଁ ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀ ଏହାର ଏକ ନକଲ ମଧ୍ୟ ପ୍ରଦାନ କରିଛନ୍ତି।
ଏତେ ସଂଖ୍ୟକ ଲୋକଙ୍କୁ କିପିର ନିୟନ୍ତ୍ରଣ କରାଯିବ ସେ ନେଇ ସମସ୍ତେ ଚିନ୍ତାରେ ଥିଲେ। ହେଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଏହି ଅପରେସନ ଶୁଭଯାତ୍ରା କାର୍ଯ୍ୟକ୍ରମ ସେହି ଦ୍ବନ୍ଦକୁ ଦୂରେଇ ଦେଇଛି। ଏହାଦ୍ବାରା ଓଡିଆ ଫେରନ୍ତାଙ୍କ ପରିବାର ନବୀନ ସରକାରଙ୍କ ଏପରି ପଦକ୍ଷେପ ଦ୍ବାରା ଆସ୍ବସ୍ଥି ପ୍ରକାଶ ମଧ୍ୟ କରିଛନ୍ତି।