ନୂଆଦିଲ୍ଲୀ : ଆତ୍ମନିର୍ଭର ଭାରତ ଯୋଜନାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି 20 ଲକ୍ଷ କୋଟି ଟଙ୍କାର ଘୋଷଣା କରିଥିବା ବେଳେ ଏହାର ବିଭିନ୍ନ ପ୍ୟାକେଜ୍ ସମ୍ପର୍କରେ ଘୋଷଣା କରିଛନ୍ତି ଅର୍ଥମନ୍ତ୍ରୀ ନିର୍ମଳା ସୀତାରମଣ । ପ୍ରଥମ ଚାରିଦିନରେ ବିଭିନ୍ନ ପ୍ୟାକେଜ୍ ସମ୍ପର୍କରେ ଘୋଷଣା କରିଥିବା ବେଳେ ରବିବାର ପ୍ୟାକେଜର ଅନ୍ତିମ ଚରଣ ଘୋଷଣା କରିଛନ୍ତି ନିର୍ମଳା ସୀତାରମଣ । ଅର୍ଥ ରାଷ୍ଟ୍ରମନ୍ତ୍ରୀ ଅନୁରାଗ ଠାକୁର ଏବଂ ଅର୍ଥ ସଚିବ ମଧ୍ୟ ଏହି କାର୍ଯ୍ୟକ୍ରମରେ ଉପସ୍ଥିତ ରହିଥିଲେ । ପ୍ରଥମ ଦିନରେ 7.35 ଲକ୍ଷ କୋଟିର ପ୍ୟାକେଜ୍ ଘୋଷଣା କରାଯାଇଥିବା ବେଳେ ଦ୍ବିତୀୟ ଦିନରେ 5.94 ଲକ୍ଷ କୋଟି, ତୃତୀୟ ଦିନରେ 3.16 ଲକ୍ଷ କୋଟି ଏବଂ ଚତୁର୍ଥ ଦିନର ପ୍ୟାକେଜ୍ରେ 1.63 ଲକ୍ଷ କୋଟିର ଘୋଷଣା କରାଯାଇଥିଲା । ଅନ୍ତିମ ଦିନରେ କେନ୍ଦ୍ର ସରକାରଙ୍କ ବିଭିନ୍ନ ଯୋଜନା ସମ୍ପର୍କରେ ସୀତାରମଣ ବର୍ଣ୍ଣନା କରିଥିଲେ । ଲକ୍ଡାଉନ୍ ପରବର୍ତ୍ତୀ ସମୟରେ ଜନଧନ ଆକାଉଣ୍ଟକୁ 10225 କୋଟି ଟଙ୍କା ସିଧାସଳଖ ପଠାଯାଇଛି । ତିନି ମାସର ମାଗଣା ରାସନ ଏବଂ ଗ୍ୟାସ୍ ପ୍ରଦାନ କରାଯିବା ସହିତ ପ୍ରବାସୀ ଶ୍ରମିକଙ୍କୁ ନେବାରେ 85 ପ୍ରତିଶତ ଅର୍ଥ କେନ୍ଦ୍ର ସରକାର ପ୍ରଦାନ କରୁଥିବା ସମ୍ପର୍କରେ ସୂଚନା ଦେଇଥିଲେ । ମନରେଗା ପାଇଁ ଆଉ 40 ହଜାର କୋଟି ସହିତ ସମୁଦାୟ 61 ହଜାର କୋଟିଟଙ୍କାର ଘୋଷଣା କରାଯାଇଛି । ଉଜ୍ଜଳା ଯୋଜନାରେ 8429 କୋଟି ଟଙ୍କାର ଫାଇଦା ପ୍ରଦାନ କରାଯାଇଥିବା ବେଳେ କୃଷି ପାଇଁ 8.79 କୋଟି କୃଷକଙ୍କ ଆକାଉଣ୍ଟକୁ 16394 କୋଟି ଟଙ୍କା ଟ୍ରାନ୍ସଫର କରାଯାଇଛି । ସେହିପରି 2.81 ବିଧବା ଏବଂ ଦିବ୍ୟାଙ୍ଗଙ୍କ ଆକାଉଣ୍ଟକୁ 2860 କୋଟି ଟଙ୍କା ପଠାଯାଇଥିବା ଜଣାପଡିଛି ।
ସ୍ବାସ୍ଥ୍ୟସେବା ପାଇଁ 15 ହଜାର କୋଟି ଘୋଷଣା କରାଯାଇଥିବା ବେଳେ ତନ୍ମଧ୍ୟରୁ ରାଜ୍ୟ ମାନଙ୍କୁ 4 ହଜାର କୋଟି ପ୍ରଦାନ କରାଯାଇଛି । 3750 କୋଟିର ଜରୁରୀକାଳୀନ ସାଗ୍ରୀ କିଣାଯାଇଥିବା ବେଳେ ସ୍ବାସ୍ଥ୍ୟକର୍ମୀଙ୍କ ପାଇଁ 50 ଲକ୍ଷ ଟଙ୍କାର ବୀମା ବ୍ୟବସ୍ଥା କରାଯାଇଛି । ବିଭିନ୍ନ ଲାବ୍ ଏବଂ ଟେଷ୍ଟିଂ ପାଇଁ 550 କୋଟି ଟଙ୍କା ବିନିଯୋଗ କରାଯାଇଛି । ସେହିପରି ଏହି ମହାମାରୀ ସମୟରେ ଅନ୍ଲାଇନ୍ ପାଠ୍ୟକ୍ରମକୁ ସମସ୍ତଙ୍କ ପାଇଁ ଉପଲବ୍ଧ କରାଯାଇଛି । ପୂର୍ବରୁ ସ୍ବୟଂପ୍ରଭା ଚ୍ୟାନେଲ ରହିଥିବା ବେଳେ ଆହୁରି ତିନୋଟି ଶିକ୍ଷାଭିତ୍ତିକ ଚ୍ୟାନେଲକୁ ମଧ୍ୟ ଚୟନ କରାଯାଇଛି । ଭବିଷ୍ୟତରେ ଆହୁରି 12ଟି ଚ୍ୟାନେଲ୍ ଯୋଗ କରାଯିବ ବୋଲି ଜଣାପଡିଛି । ମାନବ ସମ୍ବଳ ବିଭାଗ ପକ୍ଷରୁ 200 ନୂତନ ପୁସ୍ତକକୁ ଅନ୍ଲାଇନ୍ରେ ସାମିଲ କରାଯାଇଛି । ସେହିପରି ପ୍ରତ୍ୟୋକ ରାଜ୍ୟକୁ ଚାରି ଘଣ୍ଟାର ପାଠ୍ୟକ୍ରମ ଯୋଗାଇ ଦେବା ପାଇଁ ଅନୁରୋଧ କରାଯାଇଛି ଯାହାକି ସ୍ବୟଂପ୍ରଭାରେ ଦେଖିବାକୁ ମିଳିବ ବୋଲି ଅର୍ଥମନ୍ତ୍ରୀ ପ୍ରକାଶ କରିଛନ୍ତି ।
ସେହିପରି ଏହି ମହାମାରୀ ସମୟରେ ଅନ୍ଲାଇନ୍ ପାଠ୍ୟକ୍ରମକୁ ସମସ୍ତଙ୍କ ପାଇଁ ଉପଲବ୍ଧ କରାଯାଇଛି । ପୂର୍ବରୁ ସ୍ବୟଂପ୍ରଭା ଚ୍ୟାନେଲ ରହିଥିବା ବେଳେ ଆହୁରି ତିନୋଟି ଶିକ୍ଷାଭିତ୍ତିକ ଚ୍ୟାନେଲକୁ ମଧ୍ୟ ଚୟନ କରାଯାଇଛି । ମାନବ ସମ୍ବଳ ବିଭାଗ ପକ୍ଷରୁ 200 ନୂତନ ପୁସ୍ତକକୁ ଅନ୍ଲାଇନ୍ରେ ସାମିଲ କରାଯାଇଛି । ସେହିପରି ପ୍ରତ୍ୟୋକ ରାଜ୍ୟକୁ ଚାରି ଘଣ୍ଟାର ପାଠ୍ୟକ୍ରମ ଯୋଗାଇ ଦେବା ପାଇଁ ଅନୁରୋଧ କରାଯାଇଛି ଯାହାକି ସ୍ବୟଂପ୍ରଭାରେ ଦେଖିବାକୁ ମିଳିବ ବୋଲି ଅର୍ଥମନ୍ତ୍ରୀ ପ୍ରକାଶ କରିଛନ୍ତି । ଦିବ୍ୟାଙ୍ଗ ଶିଶୁ ମାନଙ୍କ ପାଇଁ ଏକ ନୂତନ ଅନ୍ଲାଇନ୍ ପାଠ୍ୟକ୍ରମ ଆରମ୍ଭ କରାଯାଇଛି । ଶିକ୍ଷା କ୍ଷେତ୍ରରେ ବୈଷୟିକ କୌଶଳର ପ୍ରୟୋଗ ପାଇଁ ପିଏମ୍ ଇ ବିଦ୍ୟା କାର୍ଯ୍ୟକ୍ରମ ଆରମ୍ଭ କରାଯାଇଛି । ଦେଶର 100ଟି ବିଶ୍ବବିଦ୍ୟାଳୟକୁ ଅନ୍ଲାଇନ୍ ପାଠ୍ୟକ୍ରମ ପାଇଁ ଅନୁମତି ପ୍ରଦାନ କରାଯାଇଛି । ଦୀକ୍ଷା ଏବଂ ମନୁଦର୍ପଣ ନାମକ ଦୁଇଟି କାର୍ଯ୍ୟକ୍ରମ ଆରମ୍ଭ କରାଯିବା ନେଇ ସୂଚନା ଦିଆଯାଇଛି । ଏହା ସହିତ ଓ୍ବାନ୍ ପ୍ଲସ୍ ଓ୍ବାନ୍ କାର୍ଯ୍ୟକ୍ରମରେ ପ୍ରଥମରୁ ଦ୍ବାଦଶ ପର୍ଯ୍ୟନ୍ତ ଛାତ୍ରଛାତ୍ରୀଙ୍କୁ ଏଥିରେ ପଢିବାର ସୁଯୋଗ ପ୍ରଦାନ କରାଯିବ ।
ଏମ୍ଏସ୍ଏମ୍ଇ ବର୍ଗ ପାଇଁ ଏକ ନୂତନ ଘୋଷଣା କରିଛନ୍ତି ସରକାର । ଏକ ସ୍ବତନ୍ତ୍ର ଆଇନ ଅନୁଯାୟୀ ଏମ୍ଏସ୍ଏମ୍ଇ କମ୍ପାନୀଙ୍କ ବିପକ୍ଷରେ ଦେବାଳିଆପଣ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ନାହିଁ । ଦେବାଳିଆପଣ ନିୟମରେ ସଂଶୋଧନ କରାଯିବା ସହିତ ମାମଲା ରୁଜୁ କରାଯିବ ନାହିଁ । ଆସନ୍ତା ଏକ ବର୍ଷ ପାଇଁ କମ୍ପାନୀକୁ ଦେବାଳିଆ ଘୋଷଣା କରାଯାଇ ପାରିବ ନାହିଁ । ଏହା ଫଳରେ ଏମ୍ଏସ୍ଏମ୍ଇ ସେକ୍ଟର ଶକ୍ତିଶାଳୀ ହୋଇପାରିବ । ଏହା ସହିତ ସମସ୍ତ ଭାରତୀୟ କମ୍ପାନୀ ଏଣିକି ବିଦେଶୀ ଷ୍ଟକ୍ ଏକସ୍ଚେଞ୍ଜରେ ନିଜକୁ ଲିଷ୍ଟିଂ କରିପାରିବେ । ଏହା ଦ୍ବାରା ଭାରତୀୟ ନିବେଶକ ମାନେ ବିଦେଶୀ ଷ୍ଟକ୍ ଏକ୍ସଚେଞ୍ଜରେ ନିବେଶ କରିବାର ସୁଯୋଗ ପାଇପାରିବେ ।