ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନିକଟରେ ହୋଇଥିବା ଆମେରିକା ଗସ୍ତ ଭାରତକୁ କୋଟି କୋଟି ଡଲାରର କାରବାର ଆଣିଥିବାବେଳେ ଏକ କମ୍ପାନୀ ଅଛି ଯାହା ଏହି ଗସ୍ତ ସମୟରେ ଭାରତରେ ଲକ୍ଷ ଲକ୍ଷ ଚାକିରୀ ଯୋଗାଇଦେବାକୁ ନିଶ୍ଚିତ କରିଛି। ପ୍ରଖ୍ୟାତ ଇ-କମର୍ସ କମ୍ପାନୀ ଆମାଜନ ୪-୫ ଲକ୍ଷ ନୁହେଁ ଭାରତରେ ୨୦ ଲକ୍ଷ ଚାକିରି ଯୋଗାଇଦେବାକୁ ନିଶ୍ଚିତ କରିଛି। ଦେଶର ଆଇଟି ମନ୍ତ୍ରୀ ରାଜୀବ ଚନ୍ଦ୍ରଶେଖର ଟ୍ୱିଟ୍ କରି ଏହି ସୂଚନା ଦେଇଛନ୍ତି।
ରାଜ୍ୟ ଆଇଟି ମନ୍ତ୍ରୀ ରାଜୀବ ଚନ୍ଦ୍ରଶେଖର ତାଙ୍କ ଟୁଇଟରେ ଲେଖିଛନ୍ତି ଯେ, ଆମାଜନ୍ ଇଣ୍ଡିଆ ଦ୍ୱାରା ଏକ ବଡ଼ ବିନିଯୋଗ ପାଇଁ ପ୍ରତିଶ୍ରୁତି ଦିଆଯାଇଛି। ଏହା ଅଧୀନରେ ୨୦୩୦ ସୁଦ୍ଧା ଭାରତରେ ୨୬ ବିଲିୟନ ଡଲାର ଏବଂ ୨୦ ଲକ୍ଷ ନିଯୁକ୍ତି ସୁଯୋଗ ସୃଷ୍ଟି ହେବ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଡିଜିଟାଲ୍ ଇଣ୍ଡିଆ ଏବଂ ଆତ୍ମନିର୍ଭରଶୀଳ ଦୃଷ୍ଟିକୋଣ ସହିତ ଆମେରିକା-ଭାରତ ବୈଷୟିକ ଭାଗିଦାରୀକୁ ଆହୁରି ମଜବୁତ କରିବା ଦିଗରେ ଏହା ଏକ ପଦକ୍ଷେପ ବୋଲି ପ୍ରମାଣିତ ହେବ।
ଇ-କମର୍ସ କମ୍ପାନୀ ଆମାଜନର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ, ଭାରତରେ କମ୍ପାନୀର ଅତିରିକ୍ତ ୧୫ ବିଲିୟନ ଡଲାର ବିନିଯୋଗ କରିବାକୁ ଯୋଜନା କରିଛି, ଯାହା ମୋଟ ବିନିଯୋଗକୁ ୨୬ ବିଲିୟନ ଡ଼ଲାରରେ ପହଞ୍ଚାଇବ। ଆମେରିକାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭେଟିବା ପରେ ଆମାଜନ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ) ଆଣ୍ଡି ଜାସି କହିଛନ୍ତି ଯେ, କମ୍ପାନୀ ଭାରତରେ ୧୧ ବିଲିୟନ ଡଲାର ବିନିଯୋଗ କରିସାରିଛି।
ସେ ଶୁକ୍ରବାର ଦିନ କହିଥିଲେ ଯେ, ପ୍ରଧାନମନ୍ତ୍ରୀ ମୋଦୀଙ୍କ ସହ ମୋର ବହୁତ ଭଲ ଏବଂ ଅର୍ଥପୂର୍ଣ୍ଣ ବାର୍ତ୍ତାଳାପ ହୋଇଛି ଏବଂ ମୁଁ ଅନୁଭବ କରୁଛି ଯେ ଆମର ଅନେକ ଲକ୍ଷ୍ୟ ସମାନ ଅଟେ। ଆମାଜନ ହେଉଛି ଭାରତର ସବୁଠାରୁ ବଡ ନିବେଶକ। ଆମେ ଏପର୍ଯ୍ୟନ୍ତ ୧୧ ବିଲିୟନ ଡଲାର ବିନିଯୋଗ କରିଛୁ ଏବଂ ମୋଟ ପରିମାଣକୁ ୨୬ ବିଲିୟନ ଡଲାରରେ ପହଞ୍ଚାଇବକୁ ଇଚ୍ଛା କରୁଛୁ। ତେଣୁ ଭାଗିଦାରୀର ଭବିଷ୍ୟତ ବିଷୟରେ ଆମେ ବହୁତ ଉତ୍ସାହିତ।
ଭାରତର ବୈଦେଶିକ ବ୍ୟାପାର ମନ୍ତ୍ରଣାଳୟ ମଧ୍ୟ ଟ୍ୱିଟ୍ କରି କହିଛି ଯେ, ଆମାଜନ୍ ର ଚେୟାରମ୍ୟାନ୍ ତଥା ସିଇଓଙ୍କ ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏକ ଅର୍ଥପୂର୍ଣ୍ଣ ବୈଠକ କରିଛନ୍ତି। ବୈଦେଶିକବ୍ୟାପାର ମନ୍ତ୍ରଣାଳୟ ଟୁଇଟ୍ କରି କହିଛି ଯେ, ଭାରତର ଲଜିଷ୍ଟିକ୍ ସେକ୍ଟରରେ ଏବଂ ଇ-ବାଣିଜ୍ୟ କ୍ଷେତ୍ରରେ ଆମାଜନ ସହ ସହଯୋଗ ବିସ୍ତାର କରିବାର ସମ୍ଭାବନା ଉପରେ ଆଲୋଚନା କରାଯାଇଥିଲା। ଭାରତରେ ଏମଏସଏମଇର ଡିଜିଟାଇଜେସନକୁ ପ୍ରୋତ୍ସାହିତ କରିବା ପାଇଁ ଆମାଜନର ପଦକ୍ଷେପକୁ ମୋଦୀ ସ୍ୱାଗତ କରିଛନ୍ତି।