ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣି ଥରେ ରୁଷ ବିରୁଦ୍ଧରେ ମୋର୍ଚ୍ଚା ଖୋଲିଛନ୍ତି। ସେ ୟୁରୋପୀୟ ସଂଘ (EU)କୁ କହିଛନ୍ତି ଯେ, ଯଦି ରୁଷ ଉପରେ ଚାପ ପକାଇବାକୁ ହୁଏ, ତେବେ ଭାରତ ଉପରେ ୧୦୦ ପ୍ରତିଶତ ଶୁଳ୍କ ଲାଗୁ କରାଯିବା ଉଚିତ। ଏହା ପୁଣିଥରେ ଟ୍ରମ୍ପଙ୍କ ଦ୍ୱୈତ ଚରିତ୍ରକୁ ଦର୍ଶାଉଛି। ସେ ନିକଟରେ ଭାରତର ବନ୍ଧୁତା ବିଷୟରେ ଏକ ବୟାନ ଦେଇଛନ୍ତି। ଆଜି ଟ୍ରମ୍ପ କହିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜଣେ ଭଲ ବନ୍ଧୁ ଏବଂ ଖୁବ୍ ଶୀଘ୍ର ଭାରତ ଏବଂ ଆମେରିକା ମଧ୍ୟରେ ବାଣିଜ୍ୟ ଉପରେ ଆଲୋଚନା ହେବ।
ଟ୍ରମ୍ପ ‘ଟ୍ରୁଥ’ରେ ଏକ ପୋଷ୍ଟ ସେୟାର କରିଛନ୍ତି। ଏହା ମାଧ୍ୟମରେ ସେ କହିଛନ୍ତି ଯେ, “ମୁଁ ଆପଣଙ୍କୁ ଏହା କହି ଖୁସି ହେଉଛି ଯେ ଭାରତ ଏବଂ ଆମେରିକା ମଧ୍ୟରେ ବାଣିଜ୍ୟ ସମ୍ପର୍କିତ ପ୍ରତିବନ୍ଧକ ଦୂର କରିବା ପାଇଁ ଆଲୋଚନା ଚାଲିଛି। ମୁଁ ଆଗାମୀ ସପ୍ତାହଗୁଡ଼ିକରେ ମୋର ବହୁତ ଭଲ ବନ୍ଧୁ ପ୍ରଧାନମନ୍ତ୍ରୀ ମୋଦିଙ୍କ ସହ କଥା ହେବାକୁ ଅପେକ୍ଷା କରିଛି। ମୁଁ ନିଶ୍ଚିତ ଯେ, ଏହି ଆଲୋଚନା ମାଧ୍ୟମରେ ଉଭୟ ଦେଶ ପାଇଁ ସମସ୍ୟାର ସମାଧାନ କରିବା ସହଜ ହେବ।”
ଡୋନାଲ୍ଡ ଟ୍ରମ୍ପ EUକୁ କ’ଣ କହିଥିଲେ?:
ସୂଚନା ଅନୁସାରେ, ରାଷ୍ଟ୍ରପତି ଟ୍ରମ୍ପ EUକୁ କହିଥିଲେ ଯେ, “ଯେପର୍ଯ୍ୟନ୍ତ ଭାରତ ଏବଂ ଚୀନ୍ ରୁଷରୁ ତେଲ କିଣିବା ବନ୍ଦ ନ କରନ୍ତି ସେପର୍ଯ୍ୟନ୍ତ ଶୁଳ୍କ ଲାଗୁ କରିଚାଲିବେ।” ସେ ଭାରତ ଉପରେ ୧୦୦ ପ୍ରତିଶତ ଶୁଳ୍କ ଲାଗୁ କରିବାକୁ ପରାମର୍ଶ ଦେଇଛନ୍ତି। ଏହି ବିଷୟରେ ଟ୍ରମ୍ପର ଜଣେ ଅଧିକାରୀ କହିଛନ୍ତି ଯେ, ଆମେ ସମ୍ପୂର୍ଣ୍ଣ ପ୍ରସ୍ତୁତ, କିନ୍ତୁ ଆମେ ସେତେବେଳେ ଏହା କରିବୁ ଯେତେବେଳେ ଆମର ୟୁରୋପୀୟ ଅଂଶୀଦାରମାନେ ପଦକ୍ଷେପ ନେବେ।
ପ୍ରଧାନମନ୍ତ୍ରୀ ମୋଦୀ ଟ୍ରମ୍ପଙ୍କ ପୋଷ୍ଟର ଉତ୍ତର ଦେଇଛନ୍ତି
ପ୍ରଧାନମନ୍ତ୍ରୀ ମୋଦୀ ଆଜି ସୋସିଆଲ ମିଡିଆ ପ୍ଲାଟଫର୍ମ X ରେ ଏକ ପୋଷ୍ଟ ସେୟାର କରିଛନ୍ତି ଏବଂ ଆମେରିକାକୁ ଏକ ଘନିଷ୍ଠ ବନ୍ଧୁ ଏବଂ ପ୍ରାକୃତିକ ଅଂଶୀଦାର ଭାବରେ ବର୍ଣ୍ଣନା କରିଛନ୍ତି। ଭାରତ ଏବଂ ଆମେରିକା ମଧ୍ୟରେ ବାଣିଜ୍ୟ ଚୁକ୍ତି ଉପରେ ଚାଲିଥିବା ଆଲୋଚନାରେ ବିଶ୍ୱାସ ପ୍ରକାଶ କରି ସେ କହିଛନ୍ତି ଯେ, ଏହି ଆଲୋଚନା ଦୁଇ ଦେଶ ମଧ୍ୟରେ ସହଭାଗୀତାର ଅସୀମ ସମ୍ଭାବନା ଖୋଲିବାର ପଥ ଖୋଲିବ।