ନୂଆଦିଲ୍ଲୀ: ଦକ୍ଷିଣ ଆଫ୍ରିକାର ଅଧ୍ୟକ୍ଷତାରେ କେପଟାଉନ ଠାରେ ଜି-20 ବିପର୍ଯ୍ୟୟ ବିପଦ ହ୍ରାସ (ଡିଆରଆର)ର ମନ୍ତ୍ରୀସ୍ତରୀୟ ବୈଠକ ଅନୁଷ୍ଠିତ ହୋଇଛି। ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ ଡକ୍ଟର ପି.କେ ମିଶ୍ର ଏଥିରେ ଅଂଶଗ୍ରହଣ କରିଥିବା ଭାରତୀୟ ପ୍ରତିନିଧି ଦଳର ନେତୃତ୍ୱ ନେଇଥିଲେ। ଏହି ବୈଠକରେ ମନ୍ତ୍ରୀମାନେ 13 ଅକ୍ଟୋବର, ଅନ୍ତର୍ଜାତୀୟ ବିପର୍ଯ୍ୟୟ ବିପଦ ହ୍ରାସ ଦିବସ ଉପଲକ୍ଷେ ‘‘ସମସ୍ତଙ୍କ ପାଇଁ ଅନୁକୂଳ ପରିବେଶ: ଏକତା, ସମାନତା ଏବଂ ସ୍ଥିରତା ମାଧ୍ୟମରେ ବିପର୍ଯ୍ୟୟ ବିପଦ ହ୍ରାସକୁ ସୁଦୃଢ଼ କରିବା’’ର ଘୋଷଣାନାମାକୁ ଗ୍ରହଣ କରିଛନ୍ତି।
କାର୍ଯ୍ୟକ୍ରମରେ ଉଦବୋଧନ ଦେଇ ଡକ୍ଟର ମିଶ୍ର କହିଛନ୍ତି ଯେ, ବିପର୍ଯ୍ୟୟ ବିପଦ ହ୍ରାସ କ୍ଷେତ୍ରରେ ପାଣ୍ଠି ବିନିଯୋଗ କୌଣସି ବ୍ୟୟ ନୁହେଁ ବରଂ ଏହା ଆମ ସହଭାଗୀ ଭବିଷ୍ୟତ ଲାଗି ଏକ ସାମୁହିକ ନିବେଶ ବୋଲି ଭାରତ ସର୍ବଦା ଗୁରୁତ୍ୱାରୋପ କରି ଆସିଛି। ଜି-20 ଡିଆରଆର କାର୍ଯ୍ୟଗୋଷ୍ଠୀ (2023) ଗଠନରେ ଭାରତର ଅଗ୍ରଣୀ ଭୂମିକା ଉପରେ ସେ ଆଲୋକପାତ କରିଛନ୍ତି। ସେ କହିଛନ୍ତି ଯେ, ବହୁମୁଖି ବିପଦର ଆଗୁଆ ଚେତାବନୀ ବ୍ୟବସ୍ଥାକୁ ଆଗକୁ ବଢ଼ାଇବା, ପୂର୍ବାନୁମାନ ପଦକ୍ଷେପ ଗ୍ରହଣ କରିବା ଲାଗି ପୂର୍ବାନୁମାନ ଆଧାରିତ ପାଣ୍ଠି ସହାୟତାର ଲାଭ ଉଠାଇବା ଏବଂ ଅନୁକୂଳ ସ୍ଥିତି ପାଇଁ ସରକାରୀ-ଘରୋଇ ଭାଗିଦାରୀକୁ ପ୍ରୋତ୍ସାହନ ଦେବାକୁ ଭାରତ ସଂକଳ୍ପବଦ୍ଧ ରହିଛି। ସେ ବିପର୍ଯ୍ୟୟ ବିପଦ ନିରୋଧୀ ଭିତ୍ତିଭୂମି ମେଣ୍ଟ (ସିଡିଆରଆଇ) ମାଧ୍ୟମରେ ଭାରତର ନେତୃତ୍ୱକୁ ଦୋହରାଇଥିଲେ। ଏହି ମେଣ୍ଟ ପ୍ରାୟ 50ଟି ଦେଶକୁ ବୈଷୟିକ ସହାୟତା ଯୋଗାଇ ଦେଇଛି।
ଡକ୍ଟର ମିଶ୍ର ବିପର୍ଯ୍ୟୟ ବିପଦ ହ୍ରାସ ଏଜେଣ୍ଡା ଅଧୀନରେ ଭାଗିଦାରୀ ଭାବନାକୁ ପ୍ରୋତ୍ସାହନ ଦେବା ଏବଂ ଆଫ୍ରିକାର ଦୃଷ୍ଟିକୋଣକୁ ବ୍ୟାପକ କରିବା ଲାଗି ଦକ୍ଷିଣ ଆଫ୍ରିକାର ଅଧ୍ୟକ୍ଷତାକୁ ପ୍ରଶଂସା କରିଥିଲେ।
ଡିଆରଆରରେ ନିବେଶ ଲାଗି ସ୍ୱେଚ୍ଛାକୃତ ଉଚ୍ଚସ୍ତରୀୟ ନୀତି ଉପରେ ମନ୍ତ୍ରିସ୍ତରୀୟ ଗୋଲଟେବୁଲ ବୈଠକ ଅନୁଷ୍ଠିତ ହୋଇଥିଲା। ଡକ୍ଟର ମିଶ୍ର ଏହି ବୈଠକରେ ବିପଦର ସୂଚନା, ପାଣ୍ଠି ଯୋଗାଣ ରଣନୀତି, ନବସୃଜନ ଏବଂ ସ୍ଥାନୀୟ ସ୍ତରର ନିବେଶ ଉପରେ ଆଧାରିତ ଭାରତର ସମନ୍ୱିତ ଦୃଷ୍ଟିକୋଣ ବିଷୟରେ ଉଲ୍ଲେଖ କରିଥିଲେ। ଭାରତର ପ୍ରଶାସନିକ ଢାଞ୍ଚାରେ ଡିଆରଆରକୁ ଜାତୀୟ ଅନୁକୂଳ ଯୋଜନା, କ୍ଷେତ୍ରୀୟ ନୀତି ଏବଂ ପାଣ୍ଠିଯୋଗାଣ ସମ୍ବଳରେ ସାମିଲ କରାଯାଇଛି। ଏହାଦ୍ୱାରା ବିକାଶ ଯୋଜନାର ପ୍ରତ୍ୟେକ ସ୍ତରକୁ ଅନୁକୂଳ ଏବଂ ସମାବେଶୀ କରିବା ସହିତ ସ୍ଥିରତା ଆଣିବାରେ ସଫଳତା ମିଳିଛି।
ଏହି ଅବସରରେ ଡକ୍ଟର ମିଶ୍ର ଦକ୍ଷିଣ ଆଫ୍ରିକାର ସମବାୟ ପ୍ରଶାସନ ଏବଂ ପାରମ୍ପରିକ ବ୍ୟାପାର ମନ୍ତ୍ରୀ ଭେଲେଂକୋସିନୀ ହ୍ଲାବିସା, ଅଷ୍ଟ୍ରେଲିଆର ଆପାତକାଳ ପରିଚାଳନା ମନ୍ତ୍ରୀ ସୁଶ୍ରୀ କ୍ରିଷ୍ଟୀ ମ୍ୟାକବେନ୍ ଏବଂ ଅନ୍ୟ ଜି-20 ସଦସ୍ୟ ଓ ଅନ୍ତର୍ଜାତୀୟ ପ୍ରତିନିଧି ଦଳର ମୁଖ୍ୟମାନଙ୍କ ସହିତ ଦ୍ୱିପାକ୍ଷିକ ବୈଠକ କରିଥିଲେ। ଏସବୁ ବୈଠକରେ ବିପର୍ଯ୍ୟୟ ପ୍ରଶମନ ଦିଗରେ ସହଯୋଗ ପ୍ରୟାସକୁ ସୁଦୃଢ଼ କରିବା ନେଇ ଆଲୋଚନା କରାଯାଇଥିଲା।
କାର୍ଯ୍ୟକ୍ରମ ଶେଷରେ ଡକ୍ଟର ମିଶ୍ର ଘରୋଇ ସ୍ତରରେ ଏବଂ ଅନ୍ତର୍ଜାତୀୟ ଭାଗିଦାରୀ ମାଧ୍ୟମରେ ଘୋଷଣାପତ୍ରର ପ୍ରତିଶ୍ରୁତିବଦ୍ଧତାକୁ ଆଗକୁ ବଢ଼ାଇବା ଲାଗି ଭାରତର ପ୍ରତିବଦ୍ଧତାକୁ ଦୋହରାଇଥିଲେ।