ନୂଆଦିଲ୍ଲୀ: ୨୦୨୬ ଟି-୨୦ ବିଶ୍ୱକପ୍ ପାଇଁ ସ୍ଥାନ ପରିବର୍ତ୍ତନ ନେଇ ବିସିବି ସହିତ ଆଲୋଚନା କରିବା ପାଇଁ ଆଇସିସି ଅଧିକାରୀମାନେ ଗତ ସପ୍ତାହରେ ବାଂଲାଦେଶ ଗସ୍ତ କରିଥିଲେ। ମୁସ୍ତାଫିଜୁର ରହମାନଙ୍କୁ ଆଇପିଏଲରୁ ବାଦ ଦିଆଯିବା ପରେ, ବାଂଲାଦେଶ ଏକ କଡା ଆଭିମୁଖ୍ୟ ପ୍ରଦର୍ଶନ କରିବାକୁ ଚେଷ୍ଟା କରୁଛି। ବାଂଲାଦେଶରେ ଆଇପିଏଲ ପ୍ରସାରଣ ସ୍ଥଗିତ ହେବା ପରେ ବିସିବି ଭାରତରୁ ଶ୍ରୀଲଙ୍କାକୁ ଟି-୨୦ ବିଶ୍ୱକପ୍ ମ୍ୟାଚ୍ ସ୍ଥାନାନ୍ତର କରିବାକୁ ଆଇସିସିକୁ ଅନୁରୋଧ କରିଥିଲା। ଶ୍ରୀଲଙ୍କା ଭାରତ ସହିତ ଟୁର୍ଣ୍ଣାମେଣ୍ଟର ସହ-ଆୟୋଜକ। ଏହି ପ୍ରସଙ୍ଗରେ ସଦ୍ୟତମ ଅପଡେଟ୍ ଏବେ ଆସିଛି, ଯାହା ବାଂଲାଦେଶ ପାଇଁ ଏକ ବଡ଼ ଝଟକା।
ବାଂଲାଦେଶ କ୍ରିକେଟ୍ ବୋର୍ଡ ଦାବି କରିଛି ଯେ, ଭାରତରେ ତାଙ୍କ ଦଳ ବିପଦରେ ଅଛି। ଏହି ପରିପ୍ରେକ୍ଷୀରେ ଆଇସିସି ଅଧିକାରୀମାନେ ସେମାନଙ୍କ ସୁରକ୍ଷାର ଆଶ୍ୱସ୍ତି ଦେବା ପାଇଁ ବିସିବିକୁ ଗସ୍ତ କରିଥିଲେ। ସ୍ଥାନ ପରିବର୍ତ୍ତନ ନ ହେଲେ ବାଂଲାଦେଶ ୨୦୨୬ ଟି-୨୦ ବିଶ୍ୱକପ୍ ରୁ ଓହରିଯିବାକୁ ଧମକ ଦେଇଥିଲା। ଏବେ, ଏହି ମାମଲାରେ ଏକ ନୂତନ ମୋଡ଼ ଆସିଛି: ଆଇସିସି ବିସିବିକୁ ଏକ ଅଲଟିମେଟମ୍ ଜାରି କରିଛି।
BCBକୁ ଅଲଟିମେଟମ୍ ଜାରି କଲା ICC
ESPNcricinfo ଅନୁଯାୟୀ, ବାଂଲାଦେଶ କ୍ରିକେଟ୍ ବୋର୍ଡକୁ ICC ଚେତାବନୀ ଦେଇଛି। BCBକୁ ICC ଜାନୁଆରୀ ୨୧ ତାରିଖ ସୁଦ୍ଧା ଟି-୨୦ ବିଶ୍ୱକପ୍ ରେ ଅଂଶଗ୍ରହଣ କରିବା କି ନାହିଁ ସେ ବିଷୟରେ ଚୂଡ଼ାନ୍ତ ନିଷ୍ପତ୍ତି ନେବାକୁ ଏବଂ ସମୟସୀମା ବିଷୟରେ ଜଣାଇବାକୁ କହିଛି। ଗତ ଶନିବାର (ଜାନୁଆରୀ ୧୭) ଜଣେ ICC ଅଧିକାରୀ ଢାକାରେ BCB ଅଧିକାରୀଙ୍କ ସହ ସାକ୍ଷାତ କରି ଏହି ସମୟସୀମା ସ୍ଥିର କରିଥିଲେ। ସୂଚନା ଅନୁଯାୟୀ, ବାଂଲାଦେଶ ଭାରତରେ ସେମାନଙ୍କର ମ୍ୟାଚ୍ ଖେଳିବ ନାହିଁ ବୋଲି ଅଡ଼ି ବସିଛି।
BCBକୁ ICC କହିଛି ଯେ, ଯଦି ବାଂଲାଦେଶ ଜାନୁଆରୀ ୨୧ ତାରିଖ ସୁଦ୍ଧା ଟୁର୍ଣ୍ଣାମେଣ୍ଟରେ ଅଂଶଗ୍ରହଣ ଘୋଷଣା ନ କରେ, ତେବେ ଏକ ବଦଳ ଦଳ ଘୋଷଣା କରାଯିବ। ସ୍କଟଲାଣ୍ଡ ଏହି ସ୍ଥାନ ଗ୍ରହଣ କରିବ। ଉଲ୍ଲେଖ ଯୋଗ୍ୟ ଯେ, BCB ମଧ୍ୟ ଆୟର୍ଲାଣ୍ଡ ସହିତ ସେମାନଙ୍କର ଦଳର ଗ୍ରୁପ୍ ଅଦଳବଦଳ କରିବାକୁ ପ୍ରସ୍ତାବ ଦେଇଥିଲା, ଯାହାକୁ ICC ପୂର୍ବରୁ ପ୍ରତ୍ୟାଖ୍ୟାନ କରିସାରିଛି।