ନୂଆଦିଲ୍ଲୀ: ଯୁଦ୍ଧ ମଧ୍ୟରେ ଇରାନ ଭାରତକୁ ବଡ ଆଶ୍ୱସ୍ତି ପ୍ରଦାନ କରିଛି। ଦୁଇଟି LPG ଟ୍ୟାଙ୍କରକୁ ହର୍ମୁଜ୍ ପ୍ରଣାଳୀ ଦେଇ ପରିବହନ କରିବାକୁ ଇରାନ ଅନୁମତି ଦେଇଛି। ଶୁକ୍ରବାର (୧୩ ମାର୍ଚ୍ଚ, ୨୦୨୬) ଦିନ ଇରାନୀ ରାଷ୍ଟ୍ରଦୂତ ମହମ୍ମଦ ଫତହାଲି ସଂକେତ ଦେବା ପରେ ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ସମୁଦ୍ର ପଥ ମଧ୍ୟରୁ ଗୋଟିଏ ହର୍ମୁଜ୍ ପ୍ରଣାଳୀ ଦେଇ ଭାରତକୁ ତୈଳ ପାଇଁ ସୁରକ୍ଷିତ ପଥ ପ୍ରଦାନ କରାଯିବ ବୋଲି ଜଣାପଡିଛି।
ଯେତେବେଳେ ଭାରତରେ ଇରାନର ରାଷ୍ଟ୍ରଦୂତ ମହମ୍ମଦ ଫତହାଲିଙ୍କୁ ପଚରାଗଲା ଯେ, ଇରାନ ନୂଆଦିଲ୍ଲୀକୁ ସୁରକ୍ଷିତ ପଥ ପ୍ରଦାନ କରିବ କି, ସେ ଉତ୍ତର ଦେଇଥିଲେ, “ହଁ, ଭାରତ ଆମର ବନ୍ଧୁ ଦେଶ। ଆମେ ଏହି ସମସ୍ୟାର ସମାଧାନ କରିବାକୁ ଚେଷ୍ଟା କରୁଛୁ। ଆପଣ ଦୁଇରୁ ତିନି ଘଣ୍ଟା ମଧ୍ୟରେ ଦେଖିବେ। ଆମେ ବିଶ୍ୱାସ କରୁଛୁ ଯେ, ଏହି ଅଞ୍ଚଳରେ ଇରାନ ଏବଂ ଭାରତର ସ୍ୱାର୍ଥ ସମାନ ଅଛି।”
କେତେ ଭାରତୀୟ ପତାକା ଜାହାଜ ଫସି ରହିଛି?
ଭାରତ ସରକାରଙ୍କ ଜାହାଜ ଚଳାଚଳ ମନ୍ତ୍ରଣାଳୟର ରାଜେଶ କୁମାର ସିହ୍ନା କହିଛନ୍ତି ଯେ, “ପର୍ସିଆନ୍ ଗଲ୍ଫରେ ହରମୁଜ୍ ପ୍ରଣାଳୀର ପଶ୍ଚିମରେ ୨୪ ଟି ଭାରତୀୟ ପତାକା ଜାହାଜ ଅଛି, ଯେଉଁଥିରେ ମୋଟ ୬୭୭ ଜଣ ଭାରତୀୟ ନାବିକ ଅଛନ୍ତି। ହରମୁଜ୍ ପ୍ରଣାଳୀର ପୂର୍ବରେ ଓମାନ ଉପସାଗରରେ ଚାରୋଟି ଜାହାଜ ଥିଲା ଏବଂ ସେଗୁଡିକ ମଧ୍ୟରୁ ଗୋଟିଏ ଗତକାଲି ସ୍ଥାନାନ୍ତରିତ ହୋଇଛି। ବର୍ତ୍ତମାନ, ସେଠାରେ ତିନୋଟି ଭାରତୀୟ ପତାକା ଜାହାଜ ଅଛି, ଯେଉଁଥିରେ ୭୬ ଜଣ ଭାରତୀୟ ନାବିକ ଅଛନ୍ତି। ଏହା ସହିତ ପ୍ରାୟ ୨୩ ହଜାର ଭାରତୀୟ ନାବିକ ସମଗ୍ର ଉପସାଗର ଅଞ୍ଚଳରେ ବିଭିନ୍ନ ଜାହାଜରେ କାମ କରୁଛନ୍ତି।”
ଭାରତରେ ଇରାନର ସର୍ବୋଚ୍ଚ ନେତାଙ୍କ ପ୍ରତିନିଧି ଡକ୍ଟର ଅବଦୁଲ ମାଜିଦ ହାକିମ ଇଲାହି କହିଛନ୍ତି ଯେ, “ଇରାନ୍ ହରମୁଜ୍ ପ୍ରଣାଳୀକୁ ବନ୍ଦ କରିନାହିଁ। ଏହା ଖୋଲା ରହିଛି। ତଥାପି, ବର୍ତ୍ତମାନର ଘଟଣା ଏବଂ ପରିସ୍ଥିତି ଯୋଗୁଁ ଜାହାଜଗୁଡ଼ିକ ଏହା ଦେଇ ଯିବାକୁ ଅସମର୍ଥ। ଇରାନ କେବେ ଚାହିଁନଥିଲା ଯେ, ହରମୁଜ୍ ପ୍ରଣାଳୀକୁ ବନ୍ଦ କିମ୍ବା ବାଧାପ୍ରାପ୍ତ କରାଯାଉ। କିଛି ଜାହାଜ ଏବେ ବି ସେହି ପଥ ଦେଇ ଯାତାୟାତ କରୁଛି।”
ଶୁକ୍ରବାର ଅନେକ ଭାରତୀୟ ରାଜ୍ୟରେ ଏଲପିଜି ସିଲିଣ୍ଡର ପାଇଁ ଲୋକଙ୍କୁ ଧାଡ଼ିରେ ଠିଆ ହୋଇଥିବା ଦେଖାଯାଇଥିଲା। କେନ୍ଦ୍ର ସରକାର ଶୁକ୍ରବାର ଦିନ କହିଛନ୍ତି ଯେ, ଘରେ ଘରେ ଏଲପିଜିର ନିରନ୍ତର ଯୋଗାଣ ସୁନିଶ୍ଚିତ କରାଯାଇଛି ଏବଂ ଲୋକଙ୍କୁ ଭୟଭୀତ ନ ହୋଇ ସିଲିଣ୍ଡର ବୁକ୍ କରିବାକୁ ଅନୁରୋଧ କରିଛନ୍ତି। ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରଣାଳୟର ଯୁଗ୍ମ ସଚିବ ସୁଜାତା ଶର୍ମା କହିଛନ୍ତି ଯେ, ମାର୍ଚ୍ଚ ୫ ତାରିଖ ପରଠାରୁ ଘରୋଇ ଏଲପିଜି ଉତ୍ପାଦନ ୩୦ ପ୍ରତିଶତ ବୃଦ୍ଧି ପାଇଛି।
ଏଲପିଜି ସମ୍ପର୍କରେ ସେ କହିଛନ୍ତି ଯେ, “୨୫ ହଜାର ବିତରକଙ୍କ ମଧ୍ୟରୁ କୌଣସି ବି ଷ୍ଟକ୍ ବନ୍ଦ ହେବାର କୌଣସି ରିପୋର୍ଟ ଆସିନାହିଁ। ମୁଁ ସମସ୍ତ ନାଗରିକଙ୍କୁ ଗୁଜବକୁ ଅଣଦେଖା କରିବାକୁ ଏବଂ ଆତଙ୍କିତ ନହେବାକୁ ଅନୁରୋଧ କରୁଛି।”