କାଠମାଣ୍ଡୁ: ନେପାଳ-ଚୀନ୍ ସୀମାନ୍ତରେ ଘଟିଥିବା ପ୍ରଳୟଙ୍କରୀ ବନ୍ୟା ଓ ଭୂସ୍କଳନ ଘଟଣାରେ ମୃତ୍ୟୁ ସଂଖ୍ୟା ୧୩୫୫କୁ ବୃଦ୍ଧି ପାଇଛି। ବିଭିନ୍ନ ସ୍ଥାନରୁ ଅଚିହ୍ନା ମୃତଦେହ ଓ ଶରୀରର ଅବଶେଷ ସମେତ ମୋଟ ୧,୩୫୫ଟି ମୃତଦେହ ଉଦ୍ଧାର କରାଯାଇଥିବା ବେଳେ ସେଥିମଧ୍ୟରୁ ୯୮ଟି ମୃତଦେହ ପରିବାରବର୍ଗଙ୍କୁ ହସ୍ତାନ୍ତର କରାଯାଇଛି। ଏବେ ବି ପ୍ରାୟ ୪,୯୯୬ ଜଣ ନିଖୋଜ ଅଛନ୍ତି, ଯେଉଁଥିରେ ୫୮୯ ଜଣ ବିଦେଶୀ ନାଗରିକ ଏବଂ ୧୦୦ ଜଣ ସୁରକ୍ଷା କର୍ମୀ ଓ ସରକାରୀ ଅଧିକାରୀ ରହିଛନ୍ତି। ଅନ୍ୟପଟେ ୧୩ ହଜାରରୁ ଊର୍ଦ୍ଧ୍ୱ ଲୋକଙ୍କୁ ସୁରକ୍ଷିତ ଉଦ୍ଧାର କରାଯାଇଛି ଏବଂ ଆହତ ହୋଇଥିବା ୬,୬୭୨ ଜଣ ଲୋକଙ୍କୁ ଚିକିତ୍ସା ଯୋଗାଇ ଦିଆଯାଉଛି। ବିପର୍ଯ୍ୟୟ ପ୍ରଭାବିତ ଅଞ୍ଚଳରେ ଜୀବନ ରକ୍ଷା ପାଇଁ ବଡ଼ ଧରଣର ଅପରେସନ ଜାରି ରହିଛି।
ଖବର ମୁତାବକ, ଗତ ୨୬ ତାରିଖ ସକାଳ ୮ଟା ୩୭ ମିନିଟରେ ନେପାଳ-ତିବ୍ବତ ସୀମା ନିକଟ ଲେହନ୍ଦେ ଉପତ୍ୟକାରେ ବିଶାଳ ବରଫ ଓ ପଥର ଖସିଥିଲା। ଏହାପରେ ଲ୍ହେନ୍ଦେ-ଭୋଟେକୋଶୀ-ତ୍ରିଶୂଳୀ ନଦୀପଥରେ ଅତି ଦ୍ରୁତ ଗତିରେ ପାଣି, କାଦୁଅ, ବରଫ ଓ ବିଶାଳ ପଥରର ସ୍ରୋତ ମାଡ଼ିଆସିଥିଲା। ମାତ୍ର ୧୦ ମିନିଟରେ ରାସୁୱାଗଢ଼ିରୁ ସ୍ୟାବ୍ରୁବେସୀରେ ପହଞ୍ଚି ପ୍ରଳୟ ରଚିଥିଲା ବନ୍ୟା। ପ୍ରାୟ ସକାଳ ୯ଟାରେ ଜିଲ୍ଲା ପ୍ରଶାସନ ସମ୍ପୃକ୍ତ ବିଭାଗକୁ ସୂଚନା ଦେବା ପରେ ୯ଟା ୧୫ ମିନିଟରେ ମାଇକ୍, ବାର୍ତ୍ତା ଓ ଗଣମାଧ୍ୟମ ଜରିଆରେ ଲୋକଙ୍କୁ ସତର୍କ କରାଯାଇଥିଲା। ଅର୍ଥାତ୍ ୩୮ ମିନିଟ୍ ପରେ ସରକାରୀ ସତର୍କ ସୂଚନା ପହଞ୍ଚିବା ବେଳକୁ ସେଠାରେ ବ୍ୟାପକ କ୍ଷୟକ୍ଷତି ଘଟିସାରିଥିଲା। ଟେଲିକମ୍ ଟାୱାର ଓ ସେନ୍ସର ଭାଙ୍ଗିଯିବାରୁ ସୂଚନା ପ୍ରେରଣା ଆହୁରି କଷ୍ଟକର ହୋଇପଡ଼ିଥିଲା। ମାତ୍ର ଅଧଘଣ୍ଟା ମଧ୍ୟରେ ତ୍ରିଶୂଳୀ ନଦୀର ଜଳସ୍ତର ୯ ମିଟର ବଢ଼ିଯାଇ ଜଳବିଦ୍ୟୁତ ପ୍ରକଳ୍ପ, ସେତୁ, କଷ୍ଟମ୍ସ କମ୍ପ୍ଲେକ୍ସ ଏବଂ ନଦୀକୂଳିଆ ଜନବସତିକୁ ସମ୍ପୂର୍ଣ୍ଣ ଧ୍ୱଂସ କରିଦେଇଛି। ଜଳବିଦ୍ୟୁତ୍ ପ୍ରକଳ୍ପର ସୁଡ଼ଙ୍ଗ ଭିତରେ କାଦୁଅ ଅଜାଡ଼ି ହୋଇପଡ଼ିବାରୁ ଏବେ ବି ଶହ ଶହ ଶ୍ରମିକ ସେଠାରେ ଫସି ରହିଥିବା ଆଶଙ୍କା କରାଯାଉଛି। ଏଭଳି ଏକ ଜରୁରୀ ସମୟରେ ନେପାଳର ପ୍ରଭାବିତ ଜନସାଧାରଣଙ୍କୁ ସହାୟତାର ହାତ ବଢ଼ାଇବା ପାଇଁ ଆମେରିକାର ଭର୍ଜିନିଆରେ ରହୁଥିବା ପ୍ରବାସୀ ନେପାଳୀ ଗୋଷ୍ଠୀ ଆଗେଇ ଆସିଛନ୍ତି। ହାଇମାର୍କେଟ୍ର ପୂର୍ବତନ କାଉନସିଲର ମଧୁ ପନ୍ଥୀ ଏବଂ ମାନାସାସ ଆଧାରିତ ‘ଆମେରିକା ନେପାଳ ହେଲପିଂ ସୋସାଇଟି’ ପକ୍ଷରୁ ସାରା ବିଶ୍ୱକୁ ପ୍ରଭାବିତଙ୍କ ସହାୟତା ପାଇଁ ନିବେଦନ କରାଯାଇଛି। ଫସିରହିଥିବା ଲୋକଙ୍କ ଜୀବନ ବଞ୍ଚାଇବା ପାଇଁ ସୁଡ଼ଙ୍ଗ ଖୋଳିପାରୁଥିବା ଆଧୁନିକ ଯନ୍ତ୍ରପାତି ଯୋଗାଇଦେବାକୁ ପନ୍ଥୀ ଅନୁରୋଧ କରିଛନ୍ତି।
୨୦୦୧ ମସିହାରୁ ଉତ୍ତର ଭର୍ଜିନିଆରେ ବାସ କରୁଥିବା ପନ୍ଥୀ ୨୦୧୫ର ବିନାଶକାରୀ ଭୂକମ୍ପ ସମୟରେ ମଧ୍ୟ ରିଲିଫ୍ କାର୍ଯ୍ୟର ସଂଯୋଜନା କରିଥିଲେ। ସେତେବେଳେ ଭୂକମ୍ପରେ ହଜାର ହଜାର ଲୋକଙ୍କ ମୃତ୍ୟୁ ଘଟିବା ସହ ୧୦ ଲକ୍ଷରୁ ଅଧିକ ଘରଦ୍ୱାର ଭାଙ୍ଗିଯାଇଥିଲା। ସେହି ତୁଳନାରେ ଏଥରର ବନ୍ୟା ଓ ଭୂସ୍କଳନ ସବୁକିଛି ଭସାଇ ନେଇ ନିଶ୍ଚିହ୍ନ କରିଦେଇଥିବାରୁ ସ୍ଥିତି ଅତି ସଙ୍କଟଜନକ ରହିଛି। ରାସ୍ତାଘାଟ, ପୋଲ, ଘରଦ୍ୱାର, ସ୍କୁଲ ଆଦି ସବୁକିଛି ସମ୍ପୂର୍ଣ୍ଣ ଧ୍ୱଂସ ପାଇଯାଇଛି। ଏହି ବେସରକାରୀ ସଂସ୍ଥା ପ୍ରଭାବିତଙ୍କୁ ଜରୁରୀକାଳୀନ ଆଶ୍ରୟ, ଖାଦ୍ୟ, ପାନୀୟ ଜଳ, ସ୍ୱାସ୍ଥ୍ୟସେବା ଓ ଅନ୍ୟାନ୍ୟ ରିଲିଫ୍ ସାମଗ୍ରୀ ଯୋଗାଇଦେବା ପାଇଁ ପ୍ରାଥମିକ ଭାବେ ୧ ଲକ୍ଷ ଡଲାର ସଂଗ୍ରହର ଲକ୍ଷ୍ୟ ରଖିଛି। ଆବଶ୍ୟକତା ଅନୁସାରେ ସଠିକ୍ ସ୍ଥାନରେ ସହାୟତା ପହଞ୍ଚାଇବା ପାଇଁ ଏହି ସଂଗଠନ ୱାଶିଂଟନ୍ ଡି.ସି.ରେ ଥିବା ନେପାଳ ଦୂତାବାସ ଏବଂ ନେପାଳ ସରକାରଙ୍କ ସହ ମିଳିତ ଭାବେ କାର୍ଯ୍ୟ କରୁଛି। ଆଦାୟ ହେଉଥିବା ପ୍ରତ୍ୟେକ ଟଙ୍କା ଶତପ୍ରତିଶତ ଦୁର୍ଗତଙ୍କ ଖାଦ୍ୟ, ଆଶ୍ରୟ, ଚିକିତ୍ସା, ବସ୍ତ୍ର ଓ ଜୀବିକା ପାଇଁ ବିନିଯୋଗ କରାଯିବ। ନେପାଳ ସରକାରଙ୍କ ‘ଏକକ ଦ୍ୱାର ନୀତି’ ଅନୁସାରେ ରିଲିଫ୍ ବଣ୍ଟନକୁ ସୁବ୍ୟବସ୍ଥିତ କରିବା ପାଇଁ ସଂସ୍ଥା ପ୍ରତ୍ୟକ୍ଷ ଭାବେ କୌଣସି ଉଦ୍ଧାରକାରୀ ଦଳ ନପଠାଇ କେବଳ ଆର୍ଥିକ ସହାୟତା ସଂଗ୍ରହ ଉପରେ ଗୁରୁତ୍ୱ ଦେଉଛି। ଏହାଦ୍ୱାରା ସମସ୍ତ ପ୍ରଭାବିତ ଅଞ୍ଚଳରେ ସମାନ ଭାବେ ସହାୟତା ପହଞ୍ଚିପାରିବ। ସେହିପରି ପିକେପି ଟେଣ୍ଡର ହାର୍ଟସ ଫାଉଣ୍ଡେସନ୍ ଏବଂ ଜର୍ଜ ମେସନ୍ ବିଶ୍ୱବିଦ୍ୟାଳୟର ନେପାଳୀ ଛାତ୍ର ସଂସଦ ପକ୍ଷରୁ ଫେୟାରଫ୍ୟାକ୍ସ କାଉଣ୍ଟିରେ ଏକ ମୋମବୁତି ଶୋଭାଯାତ୍ରା ଆୟୋଜନ କରାଯାଇ ବନ୍ୟା ପୀଡ଼ିତଙ୍କ ପାଇଁ ଅର୍ଥ ଓ ସଚେତନତା ସଂଗ୍ରହ କରାଯାଇଛି।