ଆମେରିକା : ଦୁନିଆର ସବୁଠୁ ଶକ୍ତିଶାଳୀ ଦେଶ ଆମେରିକାରେ ଭୟଙ୍କର କରୋନା ଯୋଗୁଁ 41 ଜଣଙ୍କ ମୃତ୍ୟୁ ହୋଇସାରିଲାଣି। ଆମେରିକାର ୪୬ଟି ରାଜ୍ୟ ଏବଂ ୱାସିଂଟନ, ଡିସିରେ କରୋନା ପ୍ରତିକାର ପାଇଁ ବ୍ୟାପକ ପଦକ୍ଷେପ ଗ୍ରହଣ କରାଯାଇଛି। କରୋନା ସଙ୍କଟ ପାଇଁ ଜାତୀୟ ଜରୁରୀ ପରିସ୍ଥିତି ଘୋଷଣା ପରେ ରାଷ୍ଟ୍ରପତି ଟ୍ରମ୍ପ୍ଙ୍କୁ ଏ ବାବଦରେ ଦେଶର ଆଇନ କାର୍ଯ୍ୟକାରୀ କରିବା ପାଇଁ ସମସ୍ତ କ୍ଷମତା ଅର୍ପଣ କରାଯାଇଛି । ଆମେରିକାରେ ୧୯ଟି ରାଜ୍ୟରେ ଏବେ କରୋନା କାୟା ବିସ୍ତାର କରିଛି। କରୋନା ସହ ଲଢିବା ପାଇଁ 37 ହଜାର କୋଟି ଟଙ୍କାର ଘୋଷଣା କରିଛନ୍ତି ଟ୍ରମ୍ପ୍। ଏତଦ୍ବ୍ୟତୀତ ଟ୍ରମ୍ପ୍ ନିଜର କୋରାନା ଯାଞ୍ଚ କରିବେ ବୋଲି କହିଛନ୍ତି ।
ଆମେରିକାରେ ଦୁଇହଜାରରୁ ଉର୍ଦ୍ଧ୍ବ ଲୋକେ ଏହି ଭାଇରସ୍ କବଳରେ କବଳିତ। ନିକଟରେ ଟ୍ରମ୍ପ୍ ବ୍ରାଜିଲ୍ର ରାଷ୍ଟ୍ରପତି ଜାୟର୍ ବୋଲ୍ସୋନାରୋଙ୍କ ସହ ସାକ୍ଷାତ କରିଥିଲେ। ମିଳିଥିବା ସୂଚନା ଅନୁସାରେ ତାଙ୍କ ପ୍ରତିନିଧିମଣ୍ଡଳରେ ରହିଥିବା ଜଣେ ଅଧିକାରୀଙ୍କ ନିକଟରୁ କରୋନା ପଜିଟିଭ୍ ମିଳିଛି। ସେହିପରି ଇଭାଙ୍କାଙ୍କ ଉପରେ ମଧ୍ୟ କରୋନା ବିପଦ ରହିଛି। କାରଣ ଇଭାଙ୍କା ଅଷ୍ଟ୍ରେଲିଆର ଗୃହ ମନ୍ତ୍ରୀ ପିଟର ଡଟନଙ୍କ ନିକଟରେ ସାକ୍ଷାତ କରିଥିଲେ। ପିଟର ଡଟନ୍ ଏବେ କରୋନାରେ ସଂକ୍ରମିତ ହୋଇଙଛନ୍ତି।
ସୂଚନାଯୋଗ୍ୟ, ଚୀନ୍ର ବୁହାନ ସହରରୁ ବ୍ୟାପିଥିବା କରୋନା ଭାଇରସ୍ ଏବେ ବିଶ୍ବ ମହାମାରୀ ରୂପେ ଉଭା ହୋଇଛି। ଆମେରିକା ଓ ଭାରତ ସମେତ 100ରୁ ଉର୍ଦ୍ଧ୍ବ ଦେଶ ଏହି ଭାଇରସ କବଳରେ କବଳିତ ହୋଇଛି।
