ଇସ୍ଲାମ୍ବାଦ୍ : କୁଖ୍ୟାତ ଆତଙ୍କବାଦୀ ହାଫିଜ୍ ସଇଦ୍କୁ 10 ବର୍ଷ ଜେଲ୍ ଦଣ୍ଡ ଆଦେଶ ମିଳିଛି । ମୁମ୍ବାଇ ଆତଙ୍କୀ ଆକ୍ରମଣର ଅଭିଯୁକ୍ତ ଓ ଆତଙ୍କବାଦୀଙ୍କ ପାଇଁ ଅର୍ଥ ଯୋଗାଡ କରିବା(ଟେରର୍ ଫଣ୍ଡ) ମାମଲାରେ ଆତଙ୍କବାଦୀ ହାଫିଜ୍ ସଇଦ୍କୁ ପାକିସ୍ତାନ ଆତଙ୍କବାଦୀ ନିରୋଧୀ କୋର୍ଟ 10 ବର୍ଷ ଜେଲ୍ ଦଣ୍ଡ ଆଦେଶ ଦେଇଛି । ପାକିସ୍ତାନର ଆଣ୍ଟି ଟେରୋରିଜମ୍ କୋର୍ଟ ‘ଜମାତ୍-ଉଦ୍-ଦାବା’ ସଂଗଠନର ମୁଖ୍ୟ ହାଫିଜ ବିରୋଧରେ ଏହି ରାୟ ଦେଇଛନ୍ତି । ଗତ ବର୍ଷ ଜୁଲାଇ 17 ତାରିଖରେ ହାଫିଜ୍କୁ ଗିରଫ କରାଯାଇଥିଲା । ଏବେ ଲାହୋର୍ ଜେଲ୍ରେ ବନ୍ଦୀ ଭାବେ ରହିଛି ହାଫିଜ୍ । ଗତବର୍ଷ ଫେବ୍ରୁଆରୀରେ ଲାହୋର ଆଣ୍ଟି ଟେରୋରିଜମ୍ କୋର୍ଟ ଆତଙ୍କୀ କାର୍ଯ୍ୟକଳାପକୁ ସହାୟତା ଦେଉଥିବା ନେଇ 11 ବର୍ଷ ଜେଲ୍ ଦଣ୍ଡ ଶୁଣାଇଥିଲେ । ୨୦୦୮ରେ ମୁମ୍ବାଇରେ ହୋଇଥିବା ଆତଙ୍କୀ ଆକ୍ରମଣ ମାମଲାରେ ହଫିଜ୍ ସଇଦ୍ ଭାରତର ଓ୍ଵାଣ୍ଟେଡ୍ ତାଲିକାରେ ରହିଛି ।
ସୂଚନାଯୋଗ୍ୟ ମୁମ୍ବାଇ ଆକ୍ରମଣରେ 10 ଜଣ ଆତଙ୍କବାଦୀ ମୁମ୍ବାଇରେ 166 ଜଣ ଲୋକଙ୍କୁ ହତ୍ୟା କରିଥିଲେ ଓ ଶତାଧିକ ଲୋକ ଏଥିରେ ଆହତ ହୋଇଥିଲେ । (ଏଜେନ୍ସି)