ଘରକୁ ସୁଗନ୍ଧିତ କରୁଛି, ହେଲେ ଶରୀର ପାଇଁ କେତେ ସୁରକ୍ଷିତ ରୁମ୍ ଫ୍ରେଶନର? ଜାଣନ୍ତୁ କ’ଣ କହୁଛନ୍ତି ବିଶେଷଜ୍ଞ
ଘର, ଅଫିସ୍ କିମ୍ବା କାର୍ରେ ଦୁର୍ଗନ୍ଧ ଦୂର କରି ସୁଗନ୍ଧିତ ପରିବେଶ ପାଇଁ ଅନେକେ ରୁମ୍ ଫ୍ରେଶନର ବ୍ୟବହାର କରନ୍ତି। କିନ୍ତୁ ଅତ୍ୟଧିକ ବ୍ୟବହାର ଶରୀର ପାଇଁ ସମସ୍ୟା ସୃଷ୍ଟି କରିପାରେ। ବିଶେଷକରି ବନ୍ଦ କୋଠରୀରେ ଏହାର ତୀବ୍ର ସୁଗନ୍ଧ ଶ୍ୱାସକ୍ରିୟା ଓ ଆଲର୍ଜି ସମସ୍ୟାକୁ ବଢ଼ାଇପାରେ।
ରୁମ୍ ଫ୍ରେଶନରରେ ଭିନ୍ନ ପ୍ରକାରର ରାସାୟନିକ ପଦାର୍ଥ ଓ ଭୋଲାଟାଇଲ୍ ଅର୍ଗାନିକ୍ କମ୍ପାଉଣ୍ଡ୍ସ୍ (VOCs) ରହିଥାଏ। ସ୍ପ୍ରେ କରିବା ପରେ ଏହି ଉପାଦାନଗୁଡ଼ିକ ବାୟୁରେ ମିଶିଯାଏ। ଅଧିକ ସଂସ୍ପର୍ଶରେ ଆସିଲେ ଆଖି, ନାକ ଓ ଗଳାରେ ଜ୍ୱଳନ, ମୁଣ୍ଡବିନ୍ଧା କିମ୍ବା ମୁଣ୍ଡ ବୁଲାଇବା ଭଳି ସମସ୍ୟା ଦେଖାଦେଇପାରେ।
ବିଶେଷକରି ଆଲର୍ଜି କିମ୍ବା ଶ୍ୱାସକ୍ରିୟା ସମସ୍ୟା ଥିବା ବ୍ୟକ୍ତିଙ୍କ ପାଇଁ ତୀବ୍ର ସୁଗନ୍ଧ ଅଧିକ ଅସୁବିଧାଜନକ ହୋଇପାରେ। କାଶ, ଛାତିରେ ଟାଣ ଓ ନିଶ୍ୱାସ ନେବାରେ କଷ୍ଟ ମଧ୍ୟ ବଢ଼ିପାରେ। ଛୋଟ ପିଲା ଓ ବୃଦ୍ଧଙ୍କ କ୍ଷେତ୍ରରେ ମଧ୍ୟ ଅଧିକ ସତର୍କତା ଆବଶ୍ୟକ।
ତେଣୁ ରୁମ୍ ଫ୍ରେଶନର ବ୍ୟବହାର କରୁଥିଲେ ଅତ୍ୟଧିକ ସ୍ପ୍ରେ କରନ୍ତୁ ନାହିଁ। ମୁହଁ, ଆଖି କିମ୍ବା ଚର୍ମ ଉପରେ ସିଧାସଳଖ ସ୍ପ୍ରେ କରିବାରୁ ଦୂରେଇ ରୁହନ୍ତୁ। ବନ୍ଦ କୋଠରୀରେ ବ୍ୟବହାର ପରେ ଝରକା ଓ କବାଟ ଖୋଲି ଭଲ ଭାବେ ବାୟୁଚଳାଚଳ କରିବାକୁ ଦିଅନ୍ତୁ।
ସ୍ପ୍ରେ କରିବା ପରେ କାଶ, ଆଖି ଜ୍ୱଳନ, ମୁଣ୍ଡବିନ୍ଧା କିମ୍ବା ନିଶ୍ୱାସ ନେବାରେ କଷ୍ଟ ଭଳି ଲକ୍ଷଣ ଦେଖାଦେଲେ ବ୍ୟବହାର ବନ୍ଦ କରିବା ଭଲ। ଘରକୁ ସୁଗନ୍ଧିତ ରଖିବାର ସବୁଠାରୁ ଭଲ ଉପାୟ ହେଉଛି ଘର ସଫା ରଖିବା ଓ ନିୟମିତ ବାୟୁଚଳାଚଳ କରାଇବା। ବାରମ୍ବାର ଶ୍ୱାସକ୍ରିୟା ସମସ୍ୟା ହେଲେ ଡାକ୍ତରଙ୍କ ପରାମର୍ଶ ନେବା ଆବଶ୍ୟକ।