ସାଗରିକା
ଦଙ୍ଗଲ୍ ଗାର୍ଲ ଜାଇରା ଓ୍ବାସିମ୍ ବଲିଉଡ୍ରୁ ବିଦାୟ ନେଇଛନ୍ତି । ନିକଟରେ ଜାଇରା ଟୁଇଟର୍ରେ ଏକ ବାର୍ତ୍ତା ଦେଇ ବଲିଉଡ୍ରୁ ସମ୍ପୂର୍ଣ୍ଣ ରୂପେ ବିଦାୟ ନେଇଥିବାର ଜଣାଇଛନ୍ତି । ସେ ଧର୍ମ ପାଇଁ ବଲିଉଡ୍ରୁ ଦୂରେଇ ଯାଉଥିବାର କହିଛନ୍ତି । ୧୮ ବର୍ଷୀୟା ଏହି ଅଭିନେତ୍ରୀ ଜଣକ ’ଦଙ୍ଗଲ୍’ ‘ସିକ୍ରେଟ୍ ସୁପରଷ୍ଟାର୍’ରେ ନିଜର ବଳିଷ୍ଠ ଅଭିନୟ ଜରିଆରେ ରାତାରାତି ସୁପରଷ୍ଟାର୍ ହୋଇଥିଲେ । ଏହି ଫିଲ୍ମ ପାଇଁ ଜାତୀୟ ପୁରସ୍କାର ପାଇବା ସହିତ ଫିଲ୍ମଫେୟାର୍ ପୁରସ୍କାର ପାଇଛନ୍ତି । ଏହା ସହିତ ଭାରତର ରାଷ୍ଟ୍ରପତି ରାମନାଥ କୋବିନ୍ଦଙ୍କ ତରଫରୁ ଶିଶୁ କଳାକାର ଭାବେ ଏକ ସ୍ଵତନ୍ତ୍ର ପୁରସ୍କାର ମଧ୍ୟ ପାଇଛନ୍ତି । ନିକଟରେ ସେ ତାଙ୍କ ଅଭିନୀତ ‘ସ୍କାଏ ଇଜ୍ ପିଙ୍କ୍’ର ଫିଲ୍ମର ଶୁଟିଂ ସାରିଛନ୍ତି । ଏହି ଫିଲ୍ମର ଶୁଟିଂ ସାରିବା ପରେ ଫିଲ୍ମ ଦୁନିଆରୁ ବିଦାୟ ନେଇଛନ୍ତି। ଏହାକୁ ନେଇ ଏବେ ଚାରିଆଡେ ବୟାନବାଜି । ତେବେ ଫିଲ୍ମ ଛାଡ଼ିବା ନ ଛାଡ଼ିବା ନିଷ୍ପତ୍ତି ସମ୍ପୂର୍ଣ୍ଣ ରୂପେ ଜାଇରାଙ୍କ ବ୍ୟକ୍ତିଗତ ନିର୍ଣ୍ଣୟ ।
ତେବେ ତାଙ୍କ କହିବା ଅନୁସାରେ ସେ ଧର୍ମ ପାଇଁ ଫିଲ୍ମ ଛାଡ଼ିଛନ୍ତି । କୌଣସି ଧର୍ମ ବୃତ୍ତି ତଥା କଳାକୁ ଅନାଦାର କରିନାହିଁ । ସୁଫିବାଦ ଗୀତ ତଥା ଅଭିନୟକୁ କେବେବି ବିରୋଧ କରିନାହିଁ । ତେବେ କେତେକ ରାଜନୈତିକ ଗୋଷ୍ଠୀ ତାଙ୍କ ଉପରେ ଚାପ ପ୍ରୟୋଗ କରି ତାଙ୍କୁ ଏପରି କରିବାକୁ ବାଧ୍ୟ କରାଇଛନ୍ତି ବୋଲି ଯୁକ୍ତି ବାଢିଛନ୍ତି । ତେବେ ଏହି ଘଟଣାକୁ ନେଇ ଚାଲିଥିବା ରାଜନୀତି ଏହି ଘଟଣାକୁ ଆହୁରି ବିବାଦୀୟ କରିଦେଇଛି। ତେବେ ମୁସଲମାନ୍ ଝିଅ ଭାବେ ଜାଇରା ଏକାକୀ ଫିଲ୍ମ ଦୁନିଆରେ ପାଦ ରଖିନାହାନ୍ତି । ଜାଇରାଙ୍କ ପୂର୍ବରୁ ଅନେକ ମୁସଲିମ୍ ଝିଅମାନେ ବଲିଉଡ୍ ତଥା ଫିଲ୍ମ ଓ ଅଭିନୟ ଦୁନିଆରେ ନିଜକୁ ପ୍ରତିଷ୍ଠିତ କରିପାରିଛନ୍ତି । ବଲିଉଡ୍ର ଲୋକପ୍ରିୟ କଳାକାର ଭାବେ ଫରିଦା ଜଲାଲ୍, ଜୀନତ ଅମନ୍, ଶାବନା ଆଜ୍ମୀ, ତବୁ, ଦିୟା ମିର୍ଜା, ଆୟେଶା ଟାକିଆ, ହ୍ୟୁମା କୁରୈସି ପ୍ରମୁଖ ବେଶ୍ ଲୋକପ୍ରିୟତା ହାସଲ କରିଛନ୍ତି । ଫିଲ୍ମ ଦୁନିଆରୁ ସନ୍ନ୍ୟାସୀ ନେବା ନ ନେବା ଏକ ଭିନ୍ନ କଥା । ଜାଇରାଙ୍କ ଏହି ନିଷ୍ପତ୍ତିକୁ କେତେଜଣ ତାଙ୍କ ବ୍ୟକ୍ତିଗତ ନିଷ୍ପତ୍ତି କହି ସମର୍ଥନ କରୁଥିବାବେଳେ ଆଉ କେତେଜଣ ଜାଇରା ଏହା ଲୋକପ୍ରିୟତା ପାଇଁ ଏକ ଡ୍ରାମାବାଜି କରୁଛନ୍ତି ବୋଲି କହିଛନ୍ତି । ତେବେ ଜାଇରା ତାଙ୍କ ଭବିଷ୍ୟତକୁ ନେଇ କ’ଣ କରିବେ, ସେଇଟା ତାଙ୍କ ବ୍ୟକ୍ତିଗତ ନିଷ୍ପତ୍ତି ।
ଧର୍ମ ଏକ ବ୍ୟକ୍ତିଗତ ମାମଲା । ଏହା ଭିନ୍ନ ଭିନ୍ନ ବ୍ୟକ୍ତିଙ୍କ ପାଖରେ ଭିନ୍ନ ହୋଇଥାଏ । ଜାଇରାଙ୍କ ପରି ଅତୀତରେ ଅନେକ କଳାକାରମାନେ ମଧ୍ୟ ନିଜ କ୍ୟାରିଅରରୁ ଏପରି ଭାବରେ ବିଚ୍ୟୁତି ହୋଇଛନ୍ତି । ଭୌତିକବାଦୀରୁ ଆଧ୍ୟାତ୍ମିକବାଦୀକୁ ଅନେକ ଆପଣାଇ ନେଇଛନ୍ତି । ବିଗତ ଦିନର ଲୋକପ୍ରିୟ ନାୟିକା ମମତା କୁଲକର୍ଣ୍ଣୀ ଅଚାନକ ଭାବେ ଫିଲ୍ମ ଦୁନିଆକୁ ଛାଡ଼ି ସାଧ୍ବୀ ପାଲଟି ଯାଇଛନ୍ତି । ସେହିପରି ଗତ ବର୍ଷ ସୁରତର ଧନୀ ତଥା ହୀରା ବ୍ୟବସାୟୀଙ୍କ ପୂରା ପରିବାର ଜୈନ ଭିକ୍ଷୁ ହୋଇ ଏକ ବେଶ୍ ଚର୍ଚ୍ଚାରେ ରହିଥିଲେ । ଜାଗତିକ ସୁଖଠାରୁ ଦୂରେଇ ଯାଇ ଆଧ୍ୟାତ୍ମିକ ସୁଖ ପାଇଁ ସେମାନେ ଏପରି ନିଷ୍ପତ୍ତି ନେଇଥିଲେ । ତେବେ ଜାଇରାଙ୍କ ବ୍ୟକ୍ତିଗତ ନିଷ୍ପତ୍ତିକୁ ସମ୍ମାନ କରିବା ଆମର ଦାୟିତ୍ବ । ତାଙ୍କ ବ୍ୟକ୍ତିଗତ ଜୀବନ ତଥା ନିଷ୍ପତ୍ତିକୁ ନେଇ ଏପରି ବିବାଦୀୟ ତଥା ରାଜେନୖତିକକରଣ କରିବା ଆଦୌ ଶୋଭନୀୟ ନୁହେଁ ।