ସମୀକ୍ଷା ବ୍ୟୁରୋ
ସାର୍ଥକ ଟିଭିର ପ୍ରତିଷ୍ଠାତା ତଥା ସାର୍ଥକ ମ୍ୟୁଜିକ, ସାର୍ଥକ ଫିଲମସ ଏବଂ ସିଦ୍ଧାର୍ଥ ୟୁଟିୟୁବ ଚ୍ୟାନେଲ ମାଲିକ ସୀତାରାମ ଅଗ୍ରୱାଲା ଓଡିଶା ମନୋରଂଜନ ଜଗତରେ ଆଣୁଛନ୍ତି ଏକ ନୂଆ ବିପ୍ଳବ। 2020 ମସିହାରେ ସେ ଏକାଥରେ 4 ଟି ଚ୍ୟାନେଲ ପ୍ରସାରଣ କରିବା ପାଇଁ ନିଷ୍ପତି କରିଛନ୍ତି। ସେଗୁଡିକ ହେଲା ଜେନରାଲ ଏଣ୍ଟରଟେନମେଣ୍ଟ “ସିଦ୍ଧାର୍ଥ ଟିଭି” ଓଡିଆ ମ୍ୟୁଜିକ ଚ୍ୟାନେଲ ସିଦ୍ଧାର୍ଥ ମ୍ୟୁଜିକ, ଓଡିଆ ଆଧ୍ୟାତ୍ମକ ଚ୍ୟାନେଲ ସିଦ୍ଧାର୍ଥ ଭକ୍ତି ଏବଂ ବଙ୍ଗଳା ମନୋରଂଜନ ଚ୍ୟାନେଲ ସିଦ୍ଧାର୍ଥ ବଙ୍ଗଳା। ଏସବୁ ଚ୍ୟାନେଲ ପାଇଁ ସେ ଏକ ନୂଆ କଂପାନୀ ମଧ୍ୟ କରିଛନ୍ତି। କଂପାନୀ ନାମ ରହିଛି ସିଦ୍ଧାର୍ଥ ବ୍ରଡକାଷ୍ଟିଂ ପ୍ରାଇଭେଟ ଲିମିଟେଡ। ଏହି କଂପାନୀ ଚ୍ୟାନେଲ ଲାଇସେନସ ପାଇଁ ସୂଚନା ଓ ପ୍ରସାରଣ ମନ୍ତ୍ରଣାଳୟକୁ ଆବେଦନ କରିଛି। ଏଥିସହିତ କଂପାନୀର ଏକ ସ୍ବତନ୍ତ୍ର ଟେଲିପୋର୍ଟ ପାଇଁ ମଧ୍ୟ ଆବେଦନ କରାଯାଇଛି। ମନ୍ତ୍ରଣାଳୟ ବର୍ତ୍ତମାନ ଦୁଇଟି ଚ୍ୟାନେଲ ପାଇଁ ଲାଇସେନସ ଦେଇସାରିଛି। ହେଲେ ଆଉ ଦୁଇଟି ଚ୍ୟାନେଲ ଆବେଦନ ବିଚରାଧିନ ରହିଛି। ଯେହେତୁ ଓଡିଆ ମନୋରଂଜନ ଏବଂ ଟେଲିଭିଜନ ଜଗତରେ ସୀତାରାମ ଏକ ପରିଚିତ ଏବଂ ପ୍ରତିଷ୍ଠତ ବ୍ୟକ୍ତିତ୍ବ ସେଥିପାଇଁ ତାଙ୍କୁ ଲାଇସେନସ ମିଳିବା ସହଜ ହେବ। କାରଣ ବର୍ତ୍ତମାନ ସୂଚନା ଓ ପ୍ରସାରଣ ବିଭାଗ ଟେଲିଭିଜନ ପ୍ରସାରଣ ଲାଇସେନସ ଦେବା ପାଇଁ ବହୁ କଟକଣା କରିଛନ୍ତି।
ବର୍ତ୍ତମାନ ସୀତାରାମଙ୍କ ଅନେକ ଓଡିଆ ଓ ବଙ୍ଗଳା ୟୁଟିୟୁବ ଚ୍ୟାନେଲ ରହିଛି। ସେଥିରେ ସେ ତାଙ୍କ ଦ୍ବାରା ପ୍ରସ୍ତୁତ ଓଡିଆ ଗୀତ ପ୍ରସାରଣ କରୁଛନ୍ତି। ବର୍ତ୍ତମାନ ସେ ହେଉଛନ୍ତି ଓଡିଶାର ଏକମାତ୍ର ବ୍ୟକ୍ତି ଯେ କି ୟୁଟିୟୁବ ଚ୍ୟାନେଲରୁ ବେଶ୍ ରାଜସ୍ବ ପାଇ ପାରୁଛନ୍ତି। ନିକଟରେ ସେ ସିଦ୍ଧାର୍ଥ ବଙ୍ଗଳା ୟୁଟିୟୁବ ଚ୍ୟାନେଲ କରି ବେଶ୍ ଲୋକପ୍ରିୟତା ହାସଲ କରିଛନ୍ତି। ବର୍ତ୍ତମାନ ଓଡିଶାରେ ସୀତାରାମ ଅଗ୍ରୱାଲାଙ୍କ ପାଖରେ ଯେତିକି ବେଶ୍ ଲୋକପ୍ରିୟ ହାସଲ କରିଥିବା ଫିଲ୍ମ ଏବଂ ଓଡିଆ ଗୀତ ଅଛି ତାହା ଅନ୍ୟ କୌଣସି ପ୍ରଯୋଜକଙ୍କ ପାଖରେ ନାହିଁ। ତାଙ୍କ ଧର୍ମପତ୍ନୀ ନମିତା ଅଗ୍ରୱାଲା ମଧ୍ୟ ଓଡିଶାର ଜଣେ ପ୍ରତିଷ୍ଠିତ କଣ୍ଠଶିଳ୍ପୀ।
ପୂର୍ବରୁ ସେ ଓଡିଶାରେ ମନୋରଂଜନ ଚ୍ୟାନେଲ ସାର୍ଥକ ଟିଭି ପ୍ରତିଷ୍ଠା କରି ରାଜ୍ୟରେ ନମ୍ବର ୱାନ କରାଇପାରିଥିଲେ। ହେଲେ ପରବର୍ତ୍ତି ସମୟରେ ସେ ଏହି ଚ୍ୟାନେଲକୁ ଜୀ ଗ୍ରୁପକୁ 115 କୋଟି ଟଙ୍କାରେ ବିକ୍ରି କରିଦେଇଥିଲେ। ଜୀ ଗ୍ରୁପ ସହିତ ହୋଇଥିବା ଚୁକ୍ତି ଅନୁସାରେ ସୀତାରାମ 5 ବର୍ଷ ମଧ୍ୟରେ କୌଣସି ସାଟାଲାଇଟ ଚ୍ୟାନେଲ କରିପାରିବେ ନାହିଁ। ଏହି ଚୁକ୍ତି 2020ରେ ଶେଷ ହେଉଥିବାରୁ ସେ ଏହି 4ଟି ଚ୍ୟାନେଲ ଆରମ୍ଭ କରିବେ ବୋଲି ନିଷ୍ପତି କରିଛନ୍ତି। ବର୍ତ୍ତମାନ ଓଡିଶାରେ ଏକମାତ୍ର କଂପାନୀ ଓଡିଶା ଟେଲିଭିଜନ ବା ଓଟିଭି ହାତରେ ନ୍ୟୁଜ, ମନୋରଂଜନ, ମ୍ୟୁଜିକ, ଆଧ୍ୟାତ୍ମିକ ପରି ବିଭିନ୍ନ ଚ୍ୟାନେଲ ରହିଛି।