ଭୁବନେଶ୍ବର: ଭାରତର ମୁଖ୍ୟ ବିଚାରପତି ଡି ୱାଇ ଚନ୍ଦ୍ରଚୁଡ ବା ଧନଞ୍ଜୟ ଯଶବନ୍ତ ଚନ୍ଦ୍ରଚୁଡ ଦୁଇ ଦିନିଆ ଓଡିଶା ଗସ୍ତରେ ଆସିଥିଲେ। କଟକ ଜୁଡିସିୟାଲ ଏକାଡେମୀରେ ଆୟୋଜିତ ପେପରଲେସ କୋର୍ଟ ସଂପର୍କିତ ଆଲୋଚନା ଚକ୍ରରେ ଭାଗ ନେଇଥିଲେ। ତେବେ ସେହି ଆଲୋଚନା ଚକ୍ରରେ ମୁଖ୍ୟ ବିଚାରପତି ଏକ ଖୋଲାସା କରିଥିଲେ। ତାହା ହେଲା ସେ କହିଥିଲେ ଯେ, ସେ ହେଉଛନ୍ତି ଓଡିଶା ଜୋଇଁ।
ଏହି କଥା ଜଣାପଡିବା ପରେ ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ। କାରଣ ସେ ଓଡିଶା ଜୋଇଁ ବୋଲି ପ୍ରାୟ ଲୋକେ ଜାଣି ନ ଥିଲେ। ମୁଖ୍ୟ ବିଚାରପତି କହିଥିଲେ ଯେ, ସେ ଓଡିଶା ଜୋଇଁ ହିସାବରେ ଗର୍ବ ଅନୁଭବ କରନ୍ତି। ସେ ଅନେକ ଥର କଟକ ଭୁବନେଶ୍ବର ଆସିଛନ୍ତି । ମୋ ପତ୍ନୀ ଜଣେ ଓଡିଆ ବୋଲି ସେ ଉଲ୍ଲେଖ କରିଥିଲେ।
ପ୍ରକୃତରେ ମୁଖ୍ୟ ବିଚାରପତିଙ୍କ ବର୍ତ୍ତମାନ ଧର୍ମପତ୍ନୀ ହେଉଛନ୍ତି କଟକର ଏବଂ ତାଙ୍କ ନାମ ହେଉଛି କଳ୍ପନା ଦାସ। ଜଷ୍ଟିସ ଚନ୍ଦ୍ରଚୁଡଙ୍କ ପ୍ରଥମ ପତ୍ନୀଙ୍କ ନାମ ହେଉଛି ରଶ୍ମୀ ଚନ୍ଦ୍ରଚୁଡ। ସେ 2007 ମସିହାରେ କ୍ୟାନସର ରୋଗରେ ମୃତ୍ୟୁ ବରଣ କରିବା ପରେ କଳ୍ପନାଙ୍କୁ ବିବାହ କରିଛନ୍ତି। କଳ୍ପନା ହେଉଛନ୍ତି ପେଶାରେ ଜଣେ ଓକିଲ ଏବଂ ସେ ପୂର୍ବରୁ ବ୍ରିଟସ କାଉନସିଲରେ କାମ କରୁଥିଲେ।
ଜଷ୍ଟିସ ଚନ୍ଦ୍ରଚୁଡଙ୍କ ପ୍ରଥମ ପତ୍ନୀ ରଶ୍ମୀଙ୍କର ଦୁଇ ପୁଅ ଅଛନ୍ତି। ତାଙ୍କ ନାମ ହେଲା ଅଭିନବ ଏବଂ ଚିନ୍ତନ। ଦୁଇଜଣ ଓକିଲାତି କରୁଛନ୍ତି। ବଡ ପୁଅ ଅଭିନବ ବମ୍ବେ ହାଇକୋର୍ଟରେ ଓକିଲାତି କରୁଛନ୍ତି। ସେ ଆଇନି ସଂପର୍କରେ କେତେକ ବହି ମଧ୍ୟ ଲେଖିଛନ୍ତି। ସେ ପ୍ରତିଷ୍ଠିତ ଓକିଲ ସୋଲି ସୋରାବଜୀଙ୍କ ଜୀବନୀ ଇଂରାଜୀରେ ଲେଖିଛନ୍ତି। ସାନପୁଅ ଚିନ୍ତନ ଲଣ୍ଡନରେ ଏକ ଆଇନି ଫାର୍ମ ପରିଚାଳନା କରୁଛନ୍ତି।
ଦ୍ବିତୀୟ ପତ୍ନୀ କଳ୍ପନାଙ୍କର ଦୁଇଜଣ ପାଳିତ ଝିଅ ଅଛନ୍ତି। ତାଙ୍କର ନାମ ହେଲା ମାହି ଏବଂ ପ୍ରିୟଙ୍କା। ନିକଟରେ ଜଷ୍ଟିସ ଚନ୍ଦ୍ରଚୁଡ ତାଙ୍କର ଦୁଇ ଝିଅ ଏବଂ ପତ୍ନୀଙ୍କୁ ସୁପ୍ରିମକୋର୍ଟକୁ ଆଣିଥିଲେ। ସେ ପୁରା ପରିବାରଙ୍କୁ କୋର୍ଟ ରୁମ, ଲାଇବ୍ରେରୀ ଏବଂ କରିଡୋର ସବୁ ବୁଲାଇ ଦେଖାଇ ଥିଲେ। ଜଷ୍ଟିସ ଚନ୍ଦ୍ରଚୁଡଙ୍କ ବାପା ମଧ୍ୟ ଭାରତର ମୁଖ୍ୟ ବିଚାରପତି ଥିଲେ। ତାଙ୍କର ନାମ ହେଉଛି ୱାଇ ଭି ଚନ୍ଦ୍ରଚୁଡ। ସେ ଦୀର୍ଘ ସମୟ ଧରି 1978 ରୁ 1985 ମସିହା ପର୍ଯ୍ୟନ୍ତ ମୁଖ୍ୟ ବିଚାରପତି ଭାବେ କାର୍ଯ୍ୟ କରିଥିଲେ।