ଓଡିଶା ବିଜେପି ଭିତରେ ନିତିଦିନ ଚାଲିଛି ଛକାପଞ୍ଚା, ନ ହେଲେ ଏମିତି କେମିତି ହୁଅନ୍ତା ?

ଭୁବନେଶ୍ବର: ଓଡିଶା ବିଜେପି ଭିତରେ କିଛି ଗୋଟେ ଛକାପଞ୍ଚା ଚାଲିଛି। ଯାହା ବାହାରକୁ ସ୍ପଷ୍ଟ ଦେଖାଯାଉଥିଲେ ମଧ୍ୟ ଭିତରେ କେହି ସ୍ବୀକାର କରୁ ନାହାଁନ୍ତି। ହେଲେ ଭିତରେ ଭିତରେ ତାଙ୍କ ମଧ୍ୟରେ ଲଢେଇ ଚାଲିଛି ଯାହା ଜଳଜଳ ହୋଇ ଦେଖାଯାଉଛି। ତାଙ୍କର ଭିତରର ଗୋଟିଏ ଦଳ ପୁରା ବିଜେପିକୁ ନିଜ କବଜାରେ ରଖି ନିୟନ୍ତ୍ରଣ କରିବାକୁ ଚେଷ୍ଠା କରୁଛନ୍ତି। ଫଳରେ ଅନ୍ୟମାନେ ଅବହେଳିତ ହୋଇପ଼ିଛନ୍ତି। ଯାହା ତାଙ୍କ ମିଡିଆ ଗ୍ରୁପରୁ ଜଣାପଡିଛି।

ଗତକାଲି ଓଡିଶାର ବିଜେପି ନେତା ବୈଜୟନ୍ତ ପଣ୍ଡା ପୁଣି ଥରେ ରାଷ୍ଟ୍ରୀୟ ଉପାଧ୍ୟକ୍ଷ ହେଲେ। ସେ ଲଗାତର ତିନିଥର ଏହି ପଦବୀରେ ରହିଆସିଲେଣି। ହେଲେ ଆଶ୍ଚର୍ଯ୍ୟର କଥା ସେ ନେଇ କୌଣସି ଖବର ରାଜ୍ୟ ବିଜେପି ତରଫରୁ ପ୍ରଦାନ କରାଗଲା ନାହିଁ। କେବଳ କେନ୍ଦ୍ର ବିଜେପିର ଯେଉଁ ନାମ ତାଲିକା ପ୍ରକାଶ କରାଯାଇଥିଲା ତାହା ପ୍ରଦାନ କରି ଦିଆଗଲା। ସେ ଓଡିଶାରୁ ଏକମାତ୍ର ନେତା ହିସାବରେ ଏହି ଲମ୍ବା ତାଲିକାରେ ଅଛନ୍ତି, ତାହାକୁ ବିଜେପି ମିଡିଆ ଗୁରୁତ୍ବ ଦେଲା ନାହିଁ।

ସେହିପରି ଆଉ ଏକ ଘଟଣା ମଧ୍ୟ ଉଦାହରଣ ଭାବେ ନିଆଯାଇପାରେ। ତାହା ହେଲା ନିକଟରେ ଭୁବନେଶ୍ବର ସାଂସଦ ଅପରାଜିତ ଷଡଙ୍ଗୀ ଟାଙ୍ଗୀରେ ଏକ ଜନସମାବେଶ କରିଥିଲେ। ସେଥିରେ ଦଳୀୟ ସଭାପତି ମନମୋହନ ସାମଲ ଯୋଗ ଦେଇଥିଲେ। ଏଥିରେ ସାଂସଦ ଅପରାଜିତା ଷଡଙ୍ଗୀ ପ୍ରାୟ 45 ମିନଟ ଧରି ଭାଷଣ ଦେଇ ରାଜ୍ୟ ସରକାରଙ୍କୁ ଟାର୍ଗେଟ କରିଥିଲେ। ମନମୋହନ ମାତ୍ର 15 ମିନିଟରେ ଭାଷଣ ଶେଷ କରିଥିଲେ।

ହେଲେ ବିଜେପି ତରଫରୁ ଯେଉଁ ପ୍ରେସ ରିଲିଜ ଦିଆଗଲା ସେଥିରେ ମନମୋହନ କଣ କହିଲେ ତାହା ବିସ୍ତୁୃତ ଭାବେ ପ୍ରଦାନ କରାଯାଇଥିଲା। କିନ୍ତୁ ଅପରାଜିତା କଣ କହିଲେ ସେ କଥା ଆଦୌ ଗୁରୁତ୍ବ ଦିଆଯାଇ ନ ଥିଲା କି ଉଲ୍ଲେଖ କରାଯାଇ ନ ଥିଲା। ବିଜେପି ଖବରରେ କେବଳ ଭୁବନେଶ୍ବର ସାଂସଦ ଅପରାଜିତା ଷଡଙ୍ଗୀ ଏହି ସଭାରେ ଯୋଗ ଦେଇଥିଲେ ବୋଲି ଲେଖି ଦୋଷ ତୁଟାଇ ଥିଲେ। ବିଜେପିର ଏପରି ତଥ୍ୟକୁ ନେଇ ବହୁ ଦଳୀୟ ନେତା ଆଶ୍ଚର୍ଯ୍ୟ ପ୍ରକଟ କରିଥିଲେ।

ତେବେ ସବୁଠାରୁ ବଡ ଗୁରୁତ୍ବପୂର୍ଣ୍ଣ ଘଟଣା ହେଲା ଯେ, ଓଡିଶା ପ୍ରଭାରୀ ସୁନୀଲ ବଂଶଲଙ୍କ ଓଡିଶା ଗସ୍ତ ଏବଂ ତାଙ୍କ ବୈଠକ। ଆଶ୍ଚର୍ଯ୍ୟର କଥା ସୁନୀଲ ବଂଶଲର କୌଣସି ଖବର ଓଡିଶା ବିଜେପି ତରଫରୁ ପ୍ରଦାନ କରାଯାଉ ନାହିଁ। କିଛି ଦିନ ତଳେ ସୁନୀଲ ବଂଶଲ ଓଡିଶା ଆସି ରାଜ୍ୟ କାର୍ଯ୍ୟାଳୟରେ ସମୀକ୍ଷା ବୈଠକ କରିଥିଲେ। ହେଲେ ସେତେବେଳେ ତାଙ୍କର ସମୀକ୍ଷା ବୈଠକ ଖବର ଦଳ ତରଫରୁ ପ୍ରଦାନ କରାଗଲା ନାହିଁ। ଏପରିକି ତାଙ୍କର ଗୋଟିଏ ଫଟୋଟିଏ ମଧ୍ୟ ପ୍ରଦାନ କରାଗଲା ନାହିଁ।

ଏ ସବୁକୁ ଅନୁଧ୍ୟାନ କଲେ ଏହା ସ୍ପଷ୍ଟ ହୋଇଛି ଯେ, ରାଜ୍ୟ ବିଜେପି ଭିତରେ ଭିତରେ କିଛି ନା କିଛି ଚକାପଞ୍ଚା ଚାଲିଛି। ତେବେ ଏ ନେଇ ଜଣେ ବରିଷ୍ଠ ବିଜେପି ନେତା ଯାହା କହିଲେ ତାହା ଆହୁରି ଆଶ୍ଚର୍ଯ୍ୟଜନକ। ତାଙ୍କର କହିବା କଥା ଯେ, ରାଜ୍ୟ ବିଜେପି ମିଡିଆ କେବଳ ଧର୍ମେନ୍ଦ୍ର ପ୍ରଧାନଙ୍କ ପଛରେ ଲାଗିଛି।

କୋଲକାତାରେ ହେଉ କିମ୍ବା ଦିଲ୍ଲୀରେ, ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସେଠାରେ ବୈଠକ କଲେ ତାହାର ବଡ ବଡ ରିପୋର୍ଟ କରି ପଠାଯାଉଛି। ହେଲେ ଅନ୍ୟ ବେଳକୁ ବିଜେପି ମିଡିଆ ଚୁପ ରହୁଛି। ବର୍ତ୍ତମାନ ନିର୍ବାଚନ ପାଖେଇଲାଣି, ଯଦି ଓଡିଶା ବିଜେପି ଭିତରେ ଏପରି ଛକାପଞ୍ଚା ଲାଗି ରହେ ତେବେ ସେମାନେ କିପରି ମୁକାବିଲା କରିବେ ତାହା ସନ୍ଦେହ ସୃଷ୍ଟି କରିଛି।