ନୂଆଦିଲ୍ଲୀ: ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ଜନ୍ମ ବାର୍ଷିକୀରେ କଂଗ୍ରେସ ଦଳ ଆଜି ତାହାର ସର୍ବୋଚ୍ଚ କର୍ମକର୍ତ୍ତା ସଦସ୍ୟଙ୍କ ନାମ ଘୋଷଣା କରିଛି। କଂଗ୍ରେସ ସଭାପତି ଭାବେ ମଲ୍ଲିକାର୍ଜୁନ ଖାର୍ଗେ ନିର୍ବାଚିତ ହେବା ପରେ ସେ ଏହି ନୂଆ କମିଟ ଗଠନ କରିଛନ୍ତି। ଏହି ବର୍ଷ ଶେଷରେ ପାଞ୍ଚୋଟି ରାଜ୍ୟରେ ବିଧାନସଭା ନିର୍ବାଚନ ଅଛି। ତାପୂର୍ବରୁ କଂଗ୍ରେସ କାର୍ଯ୍ୟକାରୀ କମିଟି ସହ ଅନ୍ୟ କମିଟ ଘୋଷଣା କରାଯାଇଛି।
ତେବେ ଏହି କମିଟରେ କଂଗ୍ରେସ ରାଜସ୍ଥାନର ବିଧାନସଭା ନିର୍ବାଚନକୁ ଦୃଷ୍ଟିରେ ରଖି ପୂର୍ବତନ ଉପମୁଖ୍ୟମନ୍ତ୍ରୀ ସଚିନ ପାଇଲଟଙ୍କୁ ସିଡବ୍ଲୁସିରେ ସ୍ଥାନିତ କରାଯାଇଛି। ସେହିପରି କଂଗ୍ରେସ ସଭାପତି ପାଇଁ ଖାର୍ଗେ ସହ ଲଢେଇ କରିଥିବା ଶଶି ଥରୁର ମଧ୍ୟ ଏଥିରେ ସ୍ଥାନ ପାଇଛନ୍ତି। ସେହିପରି ଦୀପା ଦାସ ମୁନ୍ସି ଏବଂ ସୟଦ ନାସିର ହୁସେନଙ୍କୁ ସିଡବ୍ଲୁସିରେ ପ୍ରଥମ ଥର ପାଇଁ ପ୍ରବେଶ କରିଛନ୍ତି।
ଶ୍ରୀମତୀ ଦାଶ ମୁନସି ପଶ୍ଚିମବଙ୍ଗର ପୂର୍ବତନ ସାଂସଦ ତଥା ଭେଟେରାନ କଂଗ୍ରେସ ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ସ୍ୱର୍ଗତ ପ୍ରିୟ ରଂଜନ ଦାସ ମୁନସିଙ୍କ ପତ୍ନୀ। ସେହିପରି ଶ୍ରୀମତୀ ହୁସେନ୍ ଜଣେ ରାଜ୍ୟସଭା ସଦସ୍ୟ ଯିଏକି ପୂର୍ବରୁ କଂଗ୍ରେସର ଜାତୀୟ ଗଣମାଧ୍ୟମ ପ୍ୟାନେଲିଷ୍ଟ ଭାବରେ କାର୍ଯ୍ୟ କରିଥିଲେ।
ଶଶି ଥରୁର ତାଙ୍କର ଟୁଇଟରରେ ଏକ ପୋଷ୍ଟରେ କହିଛନ୍ତି ଯେ ତାଙ୍କୁ ମନୋନୀତ କରାଯାଇଥିବାରୁ ଦଳର ସଭାପତିଙ୍କ ଏହି ନିଷ୍ପତ୍ତି ତାଙ୍କୁ ସମ୍ମାନିତ କରିଛି। ସେ କହିଛନ୍ତି ଯେ ଏହି କମିଟରେ ମୋତେ ସାମିଲ କରିଥିବାରୁ ସଭାପତିଙ୍କୁ ଧନ୍ୟବାଦ ଜଣାଉଛି।
ନୂଆ କମିଟକୁ ନେଇ ପୂର୍ବରୁ ଦଳର ସାଧାରଣ ସଂଗଠନ ସମ୍ପାଦକ କେ ସି ଭେନୁଗୋପାଲ କହିଥିଲେ ଯେ ଦଳର ନୂଆ କର୍ମକର୍ତ୍ତାଙ୍କ ବୟସ ପଚାଶ ବର୍ଷରୁ କମ୍ ହେବ। ହେଲେ ବର୍ତ୍ତମାନ ମୋଟ 39 ଜଣ ସିଡବ୍ଲ୍ୟୁସି ସଦସ୍ୟଙ୍କ ମଧ୍ୟରୁ କେବଳ ତିନିଜଣଙ୍କର ବୟସ ପଚାଶ ବର୍ଷରୁ କମ୍ ବୟସ ରହିଛି। ସେମାନେ ହେଲେ ସଚିନ୍ ପାଇଲଟ୍, ଗୋରଭ ଗୋଗୋଇ ଏବଂ କମଲେଶ୍ୱର ପଟେଲ।
ଏହି ନୂଆ କମିଟକୁ ଦଳର ସଭାପତି ମଲ୍ଲିକାର୍ଜୁନ ଖାର୍ଗେ ମନୋନୀତ କରିଛନ୍ତି। ଏଥିପାଇଁ କୌଣସି ନିର୍ବାଚନ କରାଯାଇ ନାହିଁ। ଗତ ଫେବୃୟାରୀରେ ରାୟପୁରରେ ହୋଇଥିବା କଂଗ୍ରେସ ପରିଚାଳନା କମିଟ ବୌଠକରେ ସିଡବ୍ଲ୍ୟୁସି ସଦସ୍ୟ ମନୋନିତ ନେଇ ଆଲୋଚନା ହୋଇଥିଲେ। ଏଥିରେ ସଭାପତି ଖାର୍ଗେ ତାଙ୍କ ହିସାବରେ ନେତାଙ୍କୁ ମନୋନିତ କରିବା ପାଇଁ ସର୍ବ ସମ୍ମତି କ୍ରମେ ନିଷ୍ପତି ଗ୍ରହଣ କରାଯାଇଥିଲା।
ତେବେ ସେତେବେଳେ ସେହି ନିଷ୍ପତିକୁ ଅଜୟ ମାକେନ୍, ଅଭିଷେକ ମନୁ ସିଂହଭି ଏବଂ ଦିଗବିଜୟ ସିଂଙ୍କ ପରି ନେତାମାନେ ନିର୍ବାଚନ କରାଯାଇ ସଦସ୍ୟ ବଛାଯାଉ ବୋଲି ଦାବୀ କରିଥିଲେ।
