ଭୁବନେଶ୍ୱର: ନିକଟରେ ଅନୁଷ୍ଠିତ ହୋଇଥିବା ୫ଟି ରାଜ୍ୟର ନିର୍ବାଚନରୁ ୩ଟିରେ ବିଜେପି ବିଜୟ ଲାଭ କରି ମନୋବଳ ବୃଦ୍ଧି କରିଛି। ଆଗାମୀ ସାଧାରଣ ନିର୍ବାଚନରେ ବିଜେପି ଦେଶରୁ ୪୦୦ରୁ ଅଧିକ ଆସନରେ ବିଜୟୀ ହୋଇ ପୂର୍ବ ଥରର ରେକର୍ଡ ଭାଙ୍ଗିବା ପାଇଁ ରଣନୀତି ପ୍ରସ୍ତୁତ କରୁଛି ।
ଏହିକ୍ରମରେ ଓଡ଼ିଶାର ୨୧ଟି ଲୋକସଭା ଆସନରୁ ବିଜେପି୧୫ଟି ଲୋକସଭା ଆସନ ଜିତିବ ବୋଲି ଦମ୍ଭୋକ୍ତି ପ୍ରକାଶ କରିଛି। ଏଥିସହିତ ୪୫ ପ୍ରତିଶତ ଭୋଟ ହାସଲ କରିବ ବୋଲି ବିଜେପି ଲକ୍ଷ୍ୟ ଧାର୍ଯ୍ୟ କରିଛି । ଓଡ଼ିଶାରୁ କେଉଁ ୧୫ଟି ଲୋକସଭା ଆସନ ଉପରେ ବିଜେପି ଲକ୍ଷ୍ୟ ରଖିଛି ତାକୁ ନେଇ ଏବେ ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି ।
ଗତ ୨୦୧୯ର ନିର୍ବାଚନକୁ ଲକ୍ଷ୍ୟ କଲେ ଜଣାଯାଏ ଯେ, ରାଜ୍ୟର ୨୧ଟି ଲୋକସଭା ଆସନରୁ ୮ଟିରେ ବିଜୟୀ ହୋଇଥିଲା ଏବଂ ୧୧ଟିରେ ଦ୍ୱିତୀୟ ସ୍ଥାନରେ ରହିଥିଲା । ୨୦୧୯ ନିର୍ବାଚନରେ ବିଜେପି ୨୦୧୪ ନିର୍ବାଚନଠାରୁ ୧୬.୯ ପ୍ରତିଶତ ଅଧିକ ଭୋଟ ପାଇ ୩୮.୪ ପ୍ରତିଶତରେ ପହଞ୍ଚିଥିଲା । ୨୦୧୯ ନିର୍ବାଚନରେ ପୁରୀ, ଭଦ୍ରକ, ଢେଙ୍କାନାଳ, କେନ୍ଦୁଝର, ବ୍ରହ୍ମପୁର ଆସନରେ ଭଲ ଲଢ଼େଇ କରିଥିଲା ।
ପୁରୀ ଆସନରେ ବିଜେପି ପ୍ରାର୍ଥୀ ସମ୍ବିତ ପାତ୍ର ୧୧ ହଜାର ୭୧୪ ଖଣ୍ଡ ଭୋଟ ବ୍ୟବଧାନରେ ହାରିଯାଇଥିବା ବେଳେ ଭଦ୍ରକ ଆସନରେ ଅଭିମନ୍ୟୁ ସେଠୀ ୨୮ ହଜାର ୮୦୩ ଭୋଟ, ଢେଙ୍କାନାଳରେ ରୁଦ୍ରନାରାୟଣ ପାଣି ୩୫ ହଜାର ୪୧୩ ଭୋଟ, କେନ୍ଦୁଝରରେ ଅନନ୍ତ ନାୟକ ୬୬ ହଜାର ୨୦୩ ଭୋଟ, ବ୍ରହ୍ମପୁରରେ ଭୃଗୁ ବକ୍ସିପାତ୍ର ୯୪ ହଜାର ୮୪୪ ଖଣ୍ଡ ଭୋଟରେ ହାରିଯାଇଥିଲେ। ବାକି ଯାଜପୁର, କନ୍ଧମାଳ, କୋରାପୁଟ, ନବରଙ୍ଗପୁର, ଆସ୍କା, କେନ୍ଦ୍ରାପଡ଼ା, ଜଗତସିଂହପୁର, କଟକ ଆସନରେ ବିଜେପି ପ୍ରାର୍ଥୀମାନେ ଲକ୍ଷାଧିକ ଭୋଟ ଅନ୍ତରରେ ପରାଜିତ ହୋଇଥିଲେ।
କିନ୍ତୁ ଗତ ଥରର ରାଜନୈତିକ ସ୍ଥିତି ରାଜ୍ୟରେ ଦ୍ରୂତ ଗତିରେ ପରିବର୍ତ୍ତନ ହେବାରେ ଲାଗିଛି । ତେଣୁ ବିଜେପି କେନ୍ଦ୍ରୀୟ ନେତାମାନେ ୧୫ଟି ଲୋକସଭା ଆସନ ସହିତ ୪୫ ପ୍ରତିଶତ ଭୋଟ ହାସଲ କରିବାକୁ ଅଣ୍ଟାଭିଡ଼ି ବାହାରିଛନ୍ତି। ଗତଥର ବିଜେପି ଭୁବନେଶ୍ୱର, ବାଲେଶ୍ୱର, ମୟୁରଭଞ୍ଜ, ସୁନ୍ଦରଗଡ଼, ବରଗଡ଼, ସମ୍ବଲପୁର, ବଲାଙ୍ଗୀର, କଳାହାଣ୍ଡି ଆସନରେ ବିଜୟୀ ହୋଇଛି।
ଏହି ୮ଟି ସହିତ ବର୍ତ୍ତମାନ ଢେଙ୍କାନାଳ, କେନ୍ଦୁଝର, ଭଦ୍ରକ, ପୁରୀ, ବ୍ରହ୍ମପୁର, କଟକ, ନବରଙ୍ଗପୁର ଆସନରେ ବିଜୟୀ ହେବା ପାଇଁ ଦଳ ଯୋଜନା ପ୍ରସ୍ତୁତ କରିଛି । ଏହି ୧୫ଟି ଆସନରେ ଗତଥର ନିର୍ବାଚନ ଲଢ଼ିଥିବା ଅନେକ ପ୍ରାର୍ଥୀଙ୍କୁ ଆଗାମୀ ନିର୍ବାଚନରେ ପରିବର୍ତ୍ତନ କରି ନୂଆ ପ୍ରାର୍ଥୀ ଦେବାର ମଧ୍ୟ ସମ୍ଭାବନା ରହିଛି ।
ଯେଉଁସବୁ ଆସନରେ ପ୍ରାର୍ଥୀ ପରିବର୍ତ୍ତନ ହେବାର ସମ୍ଭାବନା ରହିଛି ସେଗୁଡ଼ିକ ହେଲା, ବାଲେଶ୍ୱର, ମୟୁରଭଞ୍ଜ, କେନ୍ଦୁଝର, ବରଗଡ଼, ସମ୍ବଲପୁର, କଳାହାଣ୍ଡି, ଢେଙ୍କାନାଳ, କେନ୍ଦୁଝର, ବ୍ରହ୍ମପୁର, ନବରଙ୍ଗପୁର ଲୋକସଭା ଆସନ।
ଏପରିକି ବିଜେଡିରୁ ଯେଉଁ ନେତାମାନେ ଦଳୀୟ ଟିକଟରୁ ବଞ୍ଚିତ ହେବେ ସେମାନଙ୍କୁ ବିଜେପି ଟାର୍ଗେଟ କରିଛି। ଶେଷ ମୂହୁର୍ତ୍ତରେ ସେମାନେ ବିଜେପିରେ ଯୋଗ ଦେଇ ଲୋକସଭା ନିର୍ବାଚନ ଲଢ଼ିବେ ବୋଲି ଦଳୀୟ ମହଲରେ ଗୁପ୍ତ ରଣନୀତି ପ୍ରସ୍ତୁତି ଚାଲିଛି।