ନୂଆଦିଲ୍ଲୀ: ଲୋକସଭା ନିର୍ବାଚନ ୨୦୨୪ ପାଇଁ ଆନ୍ଦୋଳନ ତୀବ୍ର ହେବାରେ ଲାଗିଛି। ବୈଠକର ରାଉଣ୍ଡ ଜାରି ରହିଛି। ଶାସକ ଦଳ ଓ ବିରୋଧୀ ପରସ୍ପରକୁ ଟକ୍କର ଦେବା ପାଇଁ ରଣନୀତି ପ୍ରସ୍ତୁତ କରୁଛନ୍ତି। ତେବେ ଭାରତୀୟ ଜନତା ପାର୍ଟି (ବିଜେପି) ଏହି ପ୍ରସଙ୍ଗରେ ଅଧିକ ସଂଗଠିତ ଥିବା ଜଣାପଡ଼ିଛି। ଯୋଜନା ଓ କାର୍ଯ୍ୟକାରିତା କ୍ଷେତ୍ରରେ ବିଜେପି ବିରୋଧୀ ଇଣ୍ଡି ମେଣ୍ଟଠାରୁ ବହୁ ଆଗରେ ରହିଛି। ବିରୋଧୀ ଇଣ୍ଡି ମେଣ୍ଟ ଏପର୍ଯ୍ୟନ୍ତ ଆସନ ବୁଝାମଣା ପ୍ରସଙ୍ଗର ସମାଧାନ କରିବାରେ ସକ୍ଷମ ହୋଇନାହିଁ। ଅନ୍ୟପକ୍ଷରେ ବିଜେପି ମଧ୍ୟ ଏକ ‘ହ୍ୟାଟ୍ରିକ୍’ ଯୋଜନା ପ୍ରସ୍ତୁତ କରିଛି। ଏହାର କେନ୍ଦ୍ରରେ ରହିବ ଗାଁ ଓ ଯୁବକ। ଗାଁ ଗାଁରେ ବ୍ୟାପକଭାବେ ପହଞ୍ଚିବାକୁ ଯୋଜନା କରିଛି ବିଜେପି। ଏଥିପାଇଁ ଦଳର ସଭାପତି ଜେପି ନଡ୍ଡାଙ୍କ ଚିଠି ରାଜ୍ୟ ୟୁନିଟରେ ପହଞ୍ଚିଛି। ଏହି ରଣନୀତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆହ୍ୱାନ ଅନୁଯାୟୀ ରହିଛି। ପ୍ରଧାନମନ୍ତ୍ରୀ ସାମ୍ପ୍ରତିକ ସମୟରେ ବାରମ୍ବାର କହିଛନ୍ତି ଯେ ତାଙ୍କ ପାଇଁ କେବଳ ଚାରିଟି ଜାତି ଅଛି – ଗରିବ, ଯୁବକ, ମହିଳା ଏବଂ କୃଷକ। ସେମାନଙ୍କ କଲ୍ୟାଣ ପାଇଁ କାମ କରିବା ତାଙ୍କ ସରକାରଙ୍କ ଉଦ୍ଦେଶ୍ୟ।
ଜେପି ନଡ୍ଡା ରାଜ୍ୟ ବିଜେପି ମୁଖ୍ୟଙ୍କୁ ଚିଠି ଲେଖିଛନ୍ତି
ଜାନୁଆରୀରୁ ଦୁଇମାସ ପାଇଁ ବଡ଼ ଧରଣର ଗାଁ ଗାଁରେ ପହଞ୍ଚିବାକୁ ଯୋଜନା କରୁଛି ବିଜେପି। ଏହାବ୍ୟତୀତ ଦେଶର ୫ ହଜାର ସ୍ଥାନରେ ୟୁଥ୍ ମିଟ୍ ଆୟୋଜନ କରାଯିବ। ଏହା ବର୍ତ୍ତମାନର ହିତାଧିକାରୀ ଯୋଗାଯୋଗ ଅଭିଯାନଠାରୁ ଭିନ୍ନ ଅଟେ। ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ସୋମବାର ସମସ୍ତ ରାଜ୍ୟ ବିଜେପି ମୁଖ୍ୟଙ୍କୁ ଚିଠି ଲେଖିଛନ୍ତି। ଏଥିରେ ‘ଗାଁ ଚଲୋ ଅଭିଯାନ’ ନାମରେ ଜନସମ୍ପର୍କ କାର୍ଯ୍ୟକ୍ରମ ଆରମ୍ଭ କରିବାକୁ ନିର୍ଦ୍ଦେଶ ଦେଇଛନ୍ତି। ଏହି କାର୍ଯ୍ୟକ୍ରମ ଜାନୁଆରୀ ପ୍ରଥମ ସପ୍ତାହରୁ ଆରମ୍ଭ ହୋଇ ଫେବ୍ରୁଆରି ପର୍ଯ୍ୟନ୍ତ ଚାଲିବ।
ବିଜେପି ସାରାଦେଶରେ ୭ ଲକ୍ଷ ଗାଁ ଚିହ୍ନଟ କରିଛି। ୨୦୧୧ ଜନଗଣନା ଅନୁସାରେ ଦେଶରେ ୬,୪୦,୦୦୦ ଗାଁ ରହିଛି। ତେବେ ବିଜେପି ସୂତ୍ରରୁ ମିଳିଥିବା ସୂଚନା ଅନୁଯାୟୀ ଦଳ ନିଜ ସୁବିଧା ଅନୁସାରେ କିଛି ଗାଁକୁ ଦୁଇ ଭାଗରେ ବିଭକ୍ତ କରିଛି।
ପ୍ରତି ଗାଁରେ ଦଳ ନିଜର ଉପସ୍ଥିତି ଜାହିର କରିବ
ନଡ୍ଡାଙ୍କ ନିର୍ଦ୍ଦେଶ ଅନୁଯାୟୀ ପ୍ରତି ଗାଁ ପାଇଁ ଅତି କମରେ ଜଣେ ବିଜେପି କର୍ମୀଙ୍କୁ ନିଯୁକ୍ତ କରାଯିବ। ବଡ଼ ଗାଁ ହେଲେ ଏକାଧିକ ଦଳୀୟ କର୍ମୀ ରହିବେ। ଏହି ଅଭିଯାନରେ କେନ୍ଦ୍ରମନ୍ତ୍ରୀ, ରାଜ୍ୟର ମୁଖ୍ୟମନ୍ତ୍ରୀ ଏବଂ ବରିଷ୍ଠ ନେତାମାନେ ମଧ୍ୟ ଅଂଶଗ୍ରହଣ କରିବେ। ଗାଁରେ ପହଞ୍ଚିବା ସହ ଯୁବ ଓ ପ୍ରଥମ ଥର ଭୋଟରଙ୍କୁ ଆକୃଷ୍ଟ କରିବା ଦିଗରେ କାର୍ଯ୍ୟ କରିବାକୁ ନଡ୍ଡା ରାଜ୍ୟ ୟୁନିଟ୍ ଗୁଡ଼ିକୁ ନିର୍ଦ୍ଦେଶ ଦେଇଛନ୍ତି।
ଜାତୀୟ ଭୋଟର ଦିବସର ଗୋଟିଏ ଦିନ ପୂର୍ବରୁ ଅର୍ଥାତ୍ ଜାନୁଆରୀ ୨୪ ତାରିଖରେ ଦେଶର ୫ ହଜାର ସ୍ଥାନରେ ଯୁବସଭା କରିବାକୁ ଦଳୀୟ ନେତାମାନଙ୍କୁ କୁହାଯାଇଛି। ଏଭଳି ସମସ୍ତ ସଭାରେ ଅତି କମରେ ୧୦୦୦ ପ୍ରଥମ ଥର ଭୋଟ ତଦେବାକୁ ଥିବା ଯୁବ ଭୋଟରଙ୍କ ଅଂଶଗ୍ରହଣ ସୁନିଶ୍ଚିତ କରିବାକୁ ରାଜ୍ୟ ୟୁନିଟଗୁଡ଼ିକୁ କୁହାଯାଇଛି। ଏହାଦ୍ୱାରା ଦଳ ପ୍ରଥମ ଥର ଭୋଟରଙ୍କୁ ମିଶାଇ ୫୦ ଲକ୍ଷ ଯୁବ ଭୋଟରଙ୍କ ପାଖରେ ପହଞ୍ଚିବ।