ବାଣପୁର(ସୀତାରାମ ଅଗ୍ରୱାଲ): ଦିନକୁ ଦିନ ୫ଟି ଓ ନବୀନ ଓଡିଶା ଅଧ୍ୟକ୍ଷ କାର୍ତ୍ତିକ ପାଣ୍ଡିଆନଙ୍କ ଲୋକପ୍ରିୟତା ବଢ଼ିବାରେ ଲାଗିଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅତ୍ୟନ୍ତ ଘନିଷ୍ଠ ଥିବା ପାଣ୍ଡିଆନ ଓଡ଼ିଶାର ବିକାଶ ପାଇଁ ଅହରହ ଚେଷ୍ଟିତ ଥିବା ବେଳେ ଜନସାଧାରଣ ମଧ୍ୟ ତାଙ୍କୁ ବିପୁଳ ସମର୍ଥନ ଦେବାରେ ଲାଗିଛନ୍ତି।
ମୁଖ୍ୟମନ୍ତ୍ରୀ ଙ୍କ ନିର୍ଦେଶକ୍ରମେ ପାଣ୍ଡିଆନ ପ୍ରତିଦିନ ବିଭିନ୍ନ ଜିଲ୍ଲା ଗସ୍ତ କରୁଛନ୍ତି ଏବଂ ଉନ୍ନୟନ ପ୍ରକଳ୍ପ ତଦାରଖ କରୁଛନ୍ତି। ଏହି ଅବସରରେ ଶ୍ରୀ ପାଣ୍ଡିଆନ ଆଜି ଖୋର୍ଦ୍ଧା ଜିଲ୍ଲା ଗସ୍ତରେ ଆସି ପ୍ରଥମେ ଖୋର୍ଦ୍ଧା ଏବଂ ପରେ ବାଣପୁର ଆସିଥିଲେ। ଖୋର୍ଦ୍ଧା ହାବେଳୀ ପଡିଆରେ ନୂଆ ଓ କାର୍ଯ୍ୟକ୍ରମରେ ଯୋଗଦେଇ ଜିଲ୍ଲାର ବିଭିନ୍ନ ମହାବିଦ୍ୟାଳୟରୁ ଆସିଥିବା ପାଖାପାଖି ୧୫ ହଜାର ଛାତ୍ରଛାତ୍ରୀଙ୍କୁ ସମ୍ବୋଧିତ କରିଥିଲେ।
ଏହାପରେ ସେ ସିଧାସଳଖ ସଡ଼କପଥରେ ବାଣପୁର ମା’ ଭଗବତୀ ମନ୍ଦିର ପହଞ୍ଚିଥିଲେ। ସେଠାରେ ମା’ ଙ୍କୁ ଦର୍ଶନ କରିବା ସହ ନିକଟରେ ମନ୍ଦିର ପରିସରରେ ଆରମ୍ଭ ହୋଇଥିବା ଉନ୍ନୟନ କାର୍ଯ୍ୟ ତଦାରଖ କରିଥିଲେ। ଏହାପରେ ଶ୍ରୀ ପାଣ୍ଡିଆନ ବାଣପୁର ପଲଟନ ପଡିଆ ସଭାସ୍ଥଳରେ ପହଞ୍ଚିଥିଲେ। ସେଠାରେ ଉପସ୍ଥିତ ଥିବା ହଜାର ହଜାର ପୁରୁଷ ଓ ମହିଳା ପାଣ୍ଡିଆନକୁ ପୁଷ୍ପ ବୃଷ୍ଟି ଓ ହୁଳହୁଳି ଦେଇ ସ୍ୱାଗତ କରିଥିଲେ।
ପାଣ୍ଡିଆନ ସଭାସ୍ଥଳକୁ ଯାଇ ବ୍ୟାରିକେଡ଼ ପାର୍ଶ୍ୱରେ ବସିଥିବା ସମସ୍ତ ଜନସାଧାରଣଙ୍କ ସହିତ ହାତ ମେଳାଇବା ସହ ଏକାଧିକ ଅଭିଯୋଗ ପତ୍ର ଗ୍ରହଣ କରିଥିଲେ। ମଞ୍ଚ ଉପରେ ସେ ଜୟ ଜଗନ୍ନାଥ ଓ ଜୟ ମା ଭଗବତୀ କହି ଉଦବୋଧନ ଆରମ୍ଭ କରିଥିଲେ।
ଏହିି ଅବସରରେ ଶ୍ରୀ ପାଣ୍ଡିଆନ ମା’ ଭଗବତୀ ମନ୍ଦିର ବିକାଶ ପାଇଁ ୩୩ କୋଟି, ଚଣ୍ଡେଶ୍ୱର ଶିବ ମନ୍ଦିର ପାଇଁ ୧.୫ କୋଟି, ବାଣପୁର କଲେଜ ପାଇଁ ୨.୨୫ କୋଟି, ବାଲୁଗାଁ କଲେଜ ପାଇଁ ୧.୫୦ କୋଟି, ବାଣପୁର ଏନଏସି ଡ୍ରେନେଜ ପାଇଁ ୨୪ କୋଟି ଅର୍ଥ ଅନୁମୋଦନ ହୋଇଥିବା କହିଥିଲେ।
ଏପରିକି ଚିଲିକା ନିର୍ବାଚନ ମଣ୍ଡଳିର ଉନ୍ନତି ପାଇଁ ସମୁଦାୟ ୯୦ କୋଟି ଟଙ୍କା ଅନୁମୋଦନ ହୋଇଥିବା କହିଥିଲେ ଶ୍ରୀ ପାଣ୍ଡିଆନ। ଅନୁରୂପ ଭାବେ ବିଏସକେୱାଇ ରୁ ବାଦ ପଡ଼ିଥିବା ଗ୍ରାମାଞ୍ଚଳର ଜନସାଧାରଣମାନେ ଖୁବ ଶୀଘ୍ର ଆବେଦନ କରି ବିଏସକେୱାଇ ନବୀନ କାର୍ଡ ପାଇପାରିବେ ବୋଲି କହିଥଲେ।
ଏହାପରେ ଶ୍ରୀ ପାଣ୍ଡିଆନ ବାଣପୁର ବ୍ଲକ କାର୍ଯ୍ୟାଳୟ ସମ୍ମୁଖରେ ଥିବା ମିଶନ ଶକ୍ତି କାଫେ ପରିଦର୍ଶନ କରି ମାମାନଙ୍କ ସହ ଭାବ ବିନିମୟ କରି ମଧ୍ୟାହ୍ନ ଭୋଜନ କରିଥିଲେ। ପରିଶେଷରେ ସେ ନିକଟସ୍ଥ ହେଲିପ୍ୟାଡ଼ କୁ ଯାଇ ଆକାଶମାର୍ଗରେ ରଣପୁର ଅଭିମୁଖେ ଗସ୍ତ କରିଥିଲେ। ପାଣ୍ଡିଆନ ଙ୍କ ଗସ୍ତ ନିମନ୍ତେ ପୋଲିସ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା।
