ନୂଆଦିଲ୍ଲୀ: ବିଭିନ୍ନ କୋର୍ଟରେ ମାମଲା ସ୍ଥଗିତ ରଖିବାକୁ ନେଇ ପ୍ରଧାନ ବିଚାରପତି ଡିୱାଇ ଚନ୍ଦ୍ରଚୂଡ଼ ଉଦବେଗ ପ୍ରକାଶ କରିଛନ୍ତି। ସେ କହିଛନ୍ତି ଯେ ଦେଶର ନ୍ୟାୟିକ ବ୍ୟବସ୍ଥାରେ ମୁଲତବୀ ଅଭ୍ୟାସ ଆବେଦନକାରୀଙ୍କ ଯନ୍ତ୍ରଣାକୁ ବଢ଼ାଇଥାଏ ଏବଂ ମାମଲାର ନିଷ୍ପତ୍ତି ନେବା ପାଇଁ ନାଗରିକଙ୍କ ମୃତ୍ୟୁକୁ ଅଦାଲତ ଅପେକ୍ଷା କରିବା ଉଚିତ ନୁହେଁ। ବ୍ୟକ୍ତିଗତ ସ୍ୱାଧୀନତା ସହ ଜଡ଼ିତ ମାମଲାର ଶୁଣାଣି ପାଇଁ ଜିଲ୍ଲା ଅଦାଲତ କୁଣ୍ଠାବୋଧ କରୁଥିବାରୁ ଦୀର୍ଘଦିନ ଧରି ‘ଜାମିନ ହିଁ ନିୟମ, ଜେଲ୍ ବ୍ୟତିକ୍ରମ’ ନୀତି ଦୁର୍ବଳ ହେବାରେ ଲାଗିଛି ବୋଲି ସେ ଉଦବେଗ ପ୍ରକାଶ କରିଛନ୍ତି।
ଗୁଜୁରାଟର କଚ୍ଛ ଜିଲ୍ଲାର ଧୋର୍ଡୋଠାରେ ଆୟୋଜିତ ସର୍ବଭାରତୀୟ ଜିଲ୍ଲା ଜଜ୍ ସମ୍ମିଳନୀରେ ଉଦ୍ଘାଟନୀ ଭାଷଣ ଦେଇ ପ୍ରଧାନ ବିଚାରପତି ଚନ୍ଦ୍ରଚୂଡ଼ କହିଛନ୍ତି ଯେ ବିଚାରାଧୀନ ମାମଲାଗୁଡ଼ିକ ନ୍ୟାୟର ଦକ୍ଷ ପରିଚାଳନା ପାଇଁ ଏକ ଗମ୍ଭୀର ଚ୍ୟାଲେଞ୍ଜ ସୃଷ୍ଟି କରିଛି। ସବୁଠାରୁ ବଡ଼ ପ୍ରସଙ୍ଗ ହେଉଛି ମୁଲତବୀ ଅଭ୍ୟାସ। ଶୁଣାଣିରେ ବିଳମ୍ବ ପାଇଁ ବାରମ୍ବାର ଅନୁରୋଧ କରିବାର ଏହି ଧାରା ଆମ ଆଇନ ବ୍ୟବସ୍ଥାର ଦକ୍ଷତା ଏବଂ ଅଖଣ୍ଡତା ଉପରେ ସୁଦୂରପ୍ରସାରୀ ପ୍ରଭାବ ପକାଇଥାଏ।
ଉଦାହରଣ ଦେଇ ବର୍ଣ୍ଣନା କରିଛନ୍ତି
ମୁଲତବୀ ପ୍ରଥାକୁ ସାଧାରଣ ଲୋକ ନ୍ୟାୟିକ ବ୍ୟବସ୍ଥାର ଅଂଶ ବିଶେଷଭାବେ ବିଶ୍ୱାସ କରନ୍ତି। ଜଷ୍ଟିସ୍ ଚନ୍ଦ୍ରଚୂଡ଼ ଜଣେ କୃଷକଙ୍କ ଆଇନଗତ ଉତ୍ତରାଧିକାରୀଙ୍କ ଉଦାହରଣ ଦେଇ କହିଛନ୍ତି, ‘ଆମେ ସେମାନଙ୍କ ମାମଲାର ନିଷ୍ପତ୍ତି ପାଇଁ ଆମ ନାଗରିକଙ୍କ ମୃତ୍ୟୁକୁ ଅପେକ୍ଷା କରିବା ଉଚିତ ନୁହେଁ।
ସେ କହିଛନ୍ତି ଯେ ମାମଲା ବିଚାରାଧୀନ ସମସ୍ୟାର ସମାଧାନ ପାଇଁ ବ୍ୟବସ୍ଥାଗତ ସଂସ୍କାର, ପ୍ରକ୍ରିୟାଗତ ସଂସ୍କାର ଏବଂ ବୈଷୟିକ ଜ୍ଞାନକୌଶଳର ବ୍ୟବହାର ସହିତ ଏକ ବହୁମୁଖୀ ଆଭିମୁଖ୍ୟର ଆବଶ୍ୟକତା ରହିଛି। ସିଜେଆଇ କହିଛନ୍ତି ଯେ ଅଦାଲତ ପ୍ରକ୍ରିୟାକୁ ସୁବ୍ୟବସ୍ଥିତ କରିବା, ମାମଲାର ସମାଧାନକୁ ତ୍ୱରାନ୍ୱିତ କରିବା ଏବଂ ବିକଳ୍ପ ବିବାଦ ସମାଧାନ ବ୍ୟବସ୍ଥାକୁ ପ୍ରୋତ୍ସାହିତ କରିବାରେ ଜିଲ୍ଲା ଜଜଙ୍କ ଭୂମିକା ଗୁରୁତ୍ୱପୂର୍ଣ୍ଣ।
‘ଜିଲ୍ଲା ଅଦାଲତ ଏଥିପ୍ରତି ଦୃଷ୍ଟି ଦେବା ଦରକାର’
ବ୍ୟକ୍ତିଗତ ସ୍ୱାଧୀନତା ସହ ଜଡ଼ିତ ମାମଲାର ଶୁଣାଣି ପାଇଁ ଜିଲ୍ଲା ଅଦାଲତ ଅନିଚ୍ଛା ପ୍ରକାଶ କରୁଥିବା ଆଶଙ୍କା ବଢ଼ିବାରେ ଲାଗିଛି। ଜଷ୍ଟିସ ଚନ୍ଦ୍ରଚୂଡ଼ କହିଛନ୍ତି, ‘ଜାମିନ ହିଁ ନିୟମ, ଜେଲ୍ ବ୍ୟତିକ୍ରମ’ ବୋଲି ଦୀର୍ଘଦିନ ଧରି ଚାଲିଆସୁଥିବା ନୀତି ଦୁର୍ବଳ ହେବାରେ ଲାଗିଛି, ଯାହାର ପ୍ରମାଣ ନିମ୍ନ ଅଦାଲତମାନଙ୍କ ଦ୍ୱାରା ଜାମିନ ଆବେଦନ ଖାରଜ ହେବା ବିରୋଧରେ ଆବେଦନ ଆକାରରେ ହାଇକୋର୍ଟ ଓ ସୁପ୍ରିମକୋର୍ଟରେ ମାମଲା ପହଞ୍ଚିବାର ସଂଖ୍ୟା ବୃଦ୍ଧି ପାଉଛି।
ଜିଲ୍ଲା ନ୍ୟାୟପାଳିକା ନ୍ୟାୟ ବ୍ୟବସ୍ଥା ଏବଂ ସ୍ଥାନୀୟ ସମୁଦାୟ ମଧ୍ୟରେ ଏକ ପ୍ରାଥମିକ ମଞ୍ଚ ଭାବରେ କାର୍ଯ୍ୟ କରେ ଏବଂ ନ୍ୟାୟପାଳିକା ଉପରେ ଲୋକଙ୍କ ବିଶ୍ୱାସ ବଜାୟ ରଖିବା ପାଇଁ ଏହାର କାର୍ଯ୍ୟରେ ନିରନ୍ତର ଉନ୍ନତି ଆଣିବା ଉଚିତ ବୋଲି ସେ କହିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ଜିଲ୍ଲା ନ୍ୟାୟପାଳିକାର ବିଚାରପତିମାନେ ଅଦାଲତକାର୍ଯ୍ୟ ଏବଂ ନିଷ୍ପତ୍ତିରେ ବ୍ୟବହୃତ ଭାଷା ପ୍ରତି ସତର୍କ ରହିବା ଉଚିତ।
ଗଣମାଧ୍ୟମର ସମାଲୋଚନାରେ ପ୍ରଭାବିତ ହୁଅନ୍ତୁ ନାହିଁ
ସେ କହିଛନ୍ତି ଯେ ସୋସିଆଲ ମିଡିଆରେ ସମାଲୋଚନା ଏବଂ ମନ୍ତବ୍ୟଦ୍ୱାରା ବିଚାରପତିମାନେ ଅଯଥା ପ୍ରଭାବିତ ହେବା ଉଚିତ ନୁହେଁ। ବାହ୍ୟ ଚାପ କିମ୍ବା ଜନମତରେ ପ୍ରଭାବିତ ନ ହୋଇ ନିରପେକ୍ଷଭାବେ ନ୍ୟାୟ ପ୍ରଦାନ କରିବା ବିଚାରପତିଙ୍କ ଭୂମିକା।