Categories
ଆଜିର ଖବର ଜାତୀୟ ଖବର

ଆଜମ୍‌ ଖାନ୍‌ଙ୍କ ପରିବାରକୁ ଜେଲ୍‌ ଦଣ୍ଡାଦେଶ

ଲକ୍ଷ୍ନୌ : ବେଆଇନ୍‌ ଦସ୍ତାବିଜ୍‌ ଦେଖାଇଥିବା ଅଭିଯୋଗରେ ସମାଜବାଦୀ ପାର୍ଟି ସାଂସଦ ଆଜମ୍‌ ଖାନ୍‌ ଏବଂ ତାଙ୍କ ପରିବାରକୁ ଜେଲ୍‌ ଦଣ୍ଡାଦେଶ ପ୍ରଦାନ କରାଯାଇଛି । ବେଆଇନ୍‌ ଦସ୍ତାବିଜ୍‌ ମାମଲା ଏବଂ କୋର୍ଟଙ୍କ ନିର୍ଦ୍ଦେଶର ଅବମାନନା କାରଣରୁ ଆଜମ୍‌ ଖାନ୍‌ଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି । କୋର୍ଟଙ୍କ ନିର୍ଦ୍ଦେଶ ସତ୍ତ୍ବେ କୋର୍ଟରେ ହାଜର ହେଉନଥିବାରୁ ଆଜମ୍‌ ଖାନ୍‌ଙ୍କ ସହିତ ତାଙ୍କ ପତ୍ନୀ ଏବଂ ପୁତ୍ରଙ୍କୁ ଜେଲ୍‌ ପଠାଇ ଦିଆଯାଇଛି । ଆସନ୍ତା ମାର୍ଚ୍ଚ 2 ପର୍ଯ୍ୟନ୍ତ ଆଜମ୍‌ ଖାନ୍‌ ଏବଂ ପରିବାର ଜେଲ୍‌ରେ ବିତାଇବା ନେଇ କୋର୍ଟ ନିର୍ଦ୍ଦେଶ ଦେଇଛନ୍ତି । କୋର୍ଟଙ୍କ ନିଷ୍ପତ୍ତିର ଉପର କୋର୍ଟରେ ଆବେଦନ କରିବା ପାଇଁ ଆଜମ୍‌ ଖାନ୍‌ ସୂଚନା ଦେଇଛନ୍ତି । (ଏଜେନ୍ସି)

Categories
ଆଜିର ଖବର ଜାତୀୟ ଖବର

ଲକ୍ଷ୍ନୌ କୋର୍ଟରେ ପେଟ୍ରୋଲ ବୋମା ମାଡ: ଦୁଇ ଓକିଲ ଆହତ

ଲକ୍ଷ୍ନୌ : ଲକ୍ଷ୍ନୌର ଏକ କୋର୍ଟରେ ବିସ୍ଫୋରଣ ଘଟିଛି । ଏହି ବିସ୍ଫୋରଣରେ ଦୁଇ ଜଣ ଓକିଲ ଆହତ ହୋଇଛନ୍ତି । ଜନୈକ ଓକିଲଙ୍କ ଚାମ୍ବରକୁ ଏହି ପେଟ୍ରୋଲ ବୋମା ଫୋପଡା ଯାଇଥିବା ବେଳେ ଏହି ଘଟଣା ଘଟିଥିଲା । ଉତ୍ତର ପ୍ରଦେଶ ବିଧାନସଭା ନିକଟରୁ ମାତ୍ର 1 କିମି ଦୂରରେ ରହିଥିବା କୋର୍ଟରେ ଏହି ବିସ୍ଫୋରଣ ଘଟିଥିଲା । ଏହା ସହିତ ପୋଲିସ୍‌ ଘଟଣାସ୍ଥଳରୁ 3ଟି ପେଟ୍ରୋଲ ବମ୍‌ ଜବତ କରାଯାଇଛି । ବାର୍‌ ଆସୋସିଏସନ୍‌ ଯୁଗ୍ମ ସଚିବ ସଞ୍ଜୀବ ଲୋଧୀଙ୍କ ଚାମ୍ବର ଉପରକୁ ବୋମା ମାଡ କରାଯାଇଥିବା ବେଳେ ଅନ୍ୟ ଜଣେ ଓକିଲ ଜିତୁ ଯାଦବଙ୍କୁ ଏହି ଘଟଣା ପାଇଁ ଦାୟୀ କରାଯାଇଛି । (ଏଜେନ୍ସି)

Categories
ଆଜିର ଖବର ଜାତୀୟ ଖବର ବ୍ୟବସାୟ

ଏୟାର ଇଣ୍ଡିଆ ବିକ୍ରି ବିରୋଧରେ କୋର୍ଟ ଯିବେ ସ୍ବାମୀ!

ନୂଆଦିଲ୍ଲୀ : ସରକାରୀ ବିମାନ ଚଳାଚଳ କମ୍ପାନୀ ଏୟାର ଇଣ୍ଡିଆର ବିକ୍ରିକୁ ବିରୋଧୀ ଦଳଙ୍କ ପକ୍ଷରୁ ବିରୋଧ କରାଯାଇଥିବା ବେଳେ ଏଥିରେ ସାମିଲ ହୋଇଛନ୍ତି ବିଜେପି ସାଂସଦ ସୁବ୍ରମଣ୍ୟମ ସ୍ବାମୀ । ସରକାରଙ୍କ ପକ୍ଷରୁ ଏୟାର ଇଣ୍ଡିଆର 100 ପ୍ରତିଶତ ବିକ୍ରୟ ପ୍ରକ୍ରିୟା ଆଜିଠାରୁ ଆରମ୍ଭ ହେବାକୁ ଯାଉଥିବା ବେଳେ ଏହା ବିରୋଧରେ କୋର୍ଟ ଯିବାକୁ ନିଷ୍ପତ୍ତି ନେଇଛନ୍ତି ସ୍ବାମୀ । ସରକାରଙ୍କ ଏହି ପ୍ରକ୍ରିୟାକୁ ଦେଶ ବିରୋଧୀ ବୋଲି ଅଭିହିତ କରିଛନ୍ତି । ଯଦି ସରକାର ଏହି ନିଷ୍ପତ୍ତି ପରିବର୍ତ୍ତନ ନକରନ୍ତି ତେବେ ମୁଁ କୋର୍ଟ ଯିବାକୁ ବାଧ୍ୟ ହେବି ବୋଲି ସ୍ବାମୀ କହିଛନ୍ତି । ଦେଶ ହେଉଛି ଏକ ପରିବାର ଏବଂ ଆପଣ ପାରିବାରିକ ସମ୍ପତ୍ତି ବିକ୍ରୟ କରିପାରିବେ ନାହିଁ ବୋଲି ସ୍ବାମୀ ମତ ରଖିଛନ୍ତି । ମାର୍ଚ୍ଚ 17 ସୁଦ୍ଧା ଆଶାୟୀ କମ୍ପାନୀ ଗୁଡିକ ଆବେଦନ କରିବା ପାଇଁ ସୋମବାର ସରକାରଙ୍କ ପକ୍ଷରୁ ଘୋଷଣା କରାଯାଇଛି । (ଏଜେନ୍ସୀ)

Categories
ଅନ୍ତରାଷ୍ଟ୍ରୀୟ ଆଜିର ଖବର

ପୂର୍ବତନ ବାଂଲାଦେଶ ମୁଖ୍ୟ ବିଚାରପତିଙ୍କୁ ଗିରଫ ପାଇଁ ନିର୍ଦ୍ଦେଶ

ଢାକା : ବାଂଲାଦେଶର ପୂର୍ବତନ ମୁଖ୍ୟ ବିଚାରପତି ସୁରେନ୍ଦ୍ର କୁମାର ସିହ୍ନାଙ୍କ ଗିରଫ ପାଇଁ କୋର୍ଟ ନିର୍ଦ୍ଦେଶନାମା ଜାରି କରିଛନ୍ତି । ଅର୍ଥ ହେରଫେର ମାମଲାରେ ସିହ୍ନାଙ୍କ ବିରୋଧରେ ଦୁର୍ନୀତି ନିବାରଣ ବିଭାଗ ପକ୍ଷରୁ ମାମଲା ରୁଜୁ କରାଯାଇଥିବା ବେଳେ ସୋମବାର କୋର୍ଟ ସିହ୍ନାଙ୍କ ଗିରଫଦାରୀ ଆଦେଶ ଦେଇଛନ୍ତି । ବାଂଲାଦେଶରୁ ପଳାୟନ କରି ଯୁକ୍ତରାଷ୍ଟ୍ର ଆମେରିକାରେ ଆତ୍ମଗୋପନ କରିଥିବା ସିହ୍ନାଙ୍କ ନାମରେ ଗିରଫ ପରଓ୍ବାନା ଜାରି କରାଯାଇଛି । ଜାନୁୟାରୀ 22 ତାରିଖ ମଧ୍ୟରେ ସିହ୍ନାଙ୍କୁ ଗିରଫ କରି କୋର୍ଟରେ ହାଜର କରିବା ପାଇଁ ପୋଲିସ୍‌କୁ ନିର୍ଦ୍ଦେଶ ଦିଆଯାଇଛି । ଉଲ୍ଲେଖଯୋଗ୍ୟ ଯେ, ସିହ୍ନା ଅକ୍ଟୋବର 13,2017ରେ ଦେଶ ଛାଡି ପଳାୟନ କରିଥିଲେ ଏବଂ ନଭେମ୍ବର 10,2017ରେ ବିଦେଶରୁ ନିଜର ଇସ୍ତଫା ପ୍ରଦାନ କରିଥିଲେ । ଜାନୁୟାରୀ 2015ରେ ସିହ୍ନାଙ୍କୁ ବାଂଲାଦେଶର ମୁଖ୍ୟ ବିଚାରପତି ଭାବରେ ନିଯୁକ୍ତ କରାଯାଇଥିଲା । (ଏଜେନ୍ସୀ)

Categories
ଆଜିର ଖବର

ଭଦ୍ରାଙ୍କୁ ଆଶ୍ବସ୍ତି : ଆମେରିକା ଓ ନେଦରଲ୍ୟାଣ୍ଡ ପାଇଁ ମିଳିଲା ଅନୁମତି

ମନି ଲଣ୍ଡରିଂ ମାମଲାରେ ରବର୍ଟ ଭଦ୍ରାଙ୍କୁ ଦିଲ୍ଲୀର ଏକ କୋର୍ଟ ବିଦେଶ ଯିବାକୁ ଅନୁମତି ଦେଇଛନ୍ତି। ତାଙ୍କ ସ୍ବାସ୍ଥ୍ୟ ଖରାପ ଥିବାରୁ ସେ ବିଦେଶ ଯିବାକୁ କୋର୍ଟଙ୍କ ଅନୁମତି ଲୋଡିଥିଲେ। କୋର୍ଟ ପକ୍ଷରୁ ତାଙ୍କ ଆବେଦନର ବିଚାର କରାଯାଇ ଏଭଳି ରାୟ ଦିଆଯାଇଛି। ତେବେ ତାଙ୍କୁ ଆମେରିକା ଏବଂ ନେଦରଲାଣ୍ଡ ଯିବାକୁ ଅନୁମତି ମିଳିଛି। ୬ ସପ୍ତାହ ପାଇଁ ସେ ବିଦେଶ ଯାଇପାରିବେ। ଏହି ସମୟ ମଧ୍ୟରେ କୌଣସି ଲୁକ୍‌ଆଉଟ୍‌ ନୋଟିସ୍‌ ଜାରି ହେଲେ ତାହା ଲାଗୁ ହେବ ନାହିଁ ବୋଲି କୋର୍ଟ ସୂଚନା ଦେଇଛନ୍ତି।

Categories
ଆଜିର ଖବର

‘ବାଲା’କୁ ନେଇ ନୂଆ ବିବାଦ : ନିର୍ମାତାଙ୍କ ବିରୋଧରେ କୋର୍ଟଙ୍କ ଦ୍ବାରସ୍ଥ ହେଲେ ସହକାରୀ ନିର୍ଦ୍ଦେଶକ

ଆର୍ଟିକିଲ୍‌ ୧୫ର ଟ୍ରେଲର ରିଲିଜ୍‌କୁ ନେଇ ଚର୍ଚ୍ଚାରେ ରହିଥିବା ଆୟୁଷ୍ମାନ ଖୁରାନାଙ୍କ ଅପକମିଙ୍ଗ ଫିଲ୍ମ ବାଲାକୁ ନେଇ ଏକ ନୂତନ ବିବାଦ ଦେଖା ଦେଇଛି। କାହାଣୀ ଚୋରି ଅଭିଯୋଗରେ ଜନୈକ ସହକାରୀ ନିର୍ଦ୍ଦେଶକ ଫିଲ୍ମର ନିର୍ମାତା, ନିର୍ଦ୍ଦେଶକ ଏବଂ ଅଭିନେତାଙ୍କ ବିରୋଧରେ କୋର୍ଟଙ୍କ ଦ୍ବାରସ୍ଥ ହୋଇଛନ୍ତି। ସହକାରୀ ନିର୍ଦ୍ଦେଶକ କମଲ କାନ୍ତ ଚନ୍ଦ୍ରା ଆୟୁଷ୍ମାନ ଖୁରାନା, ନିର୍ଦ୍ଦେଶକ ଅମର କୌଶିକ୍‌ ଏବଂ ପ୍ରଯୋଜକ ଦୀନେଶ ଭିଜନଙ୍କ ବିରୋଧରେ ମାମଲା ଦାୟର କରିଛନ୍ତି। ସମାନ କାହାଣୀକୁ ନେଇ କମଲ କାନ୍ତ ରେଜିଷ୍ଟର କରିଥିବାରୁ ବାଲାର ନିର୍ମାତାଙ୍କ ବିରୋଧରେ କୋର୍ଟର ଦ୍ବାରସ୍ଥ ହୋଇଛନ୍ତି। କମଲ କାନ୍ତ ଧାରା ୪୨୦(ଠକେଇ) ଏବଂ ଧାରା ୪୦୬ (ବିଶ୍ବାସ ଭଙ୍ଗ)ରେ ଅଭିଯୋଗ ଆଣି ଏହି ମାମଲା ରୁଜୁ କରିଛନ୍ତି।

Categories
ଆଜିର ଖବର

ଏୟାରସେଲ୍‌-ମାକ୍ସିସ୍‌ ମାମଲା : କର୍ତ୍ତୀ ଚିଦାମ୍ବରମ୍‌ଙ୍କ ପୁଅକୁ ଗିରଫରୁ ଅନ୍ତରୀଣ ସୁରକ୍ଷା

ଏୟାରସେଲ-ମାକ୍ସିସ୍‌ ମାମଲାରେ ପୂର୍ବତନ ଅର୍ଥମନ୍ତ୍ରୀ ପି ଚିଦାମ୍ବରମ୍‌ଙ୍କ ପୁଅ କର୍ତ୍ତୀ ଚିଦାମ୍ବରମଙ୍କୁ ଗିରଫରଚ ଅନ୍ତରୀଣ ସୁରକ୍ଷା ପ୍ରଦାନ କରିଛନ୍ତି ସ୍ବତନ୍ତ୍ର କୋର୍ଟ। ମେ ୩୦ ତାରିଖରେ ଦିଲ୍ଳୀର ଏକ କୋର୍ଟ କର୍ତ୍ତୀଙ୍କୁ ଅନ୍ତରୀଣ ସୁରକ୍ଷା ପ୍ରଦାନ କରିଛି। ଅଗଷ୍ଟ ୧ ତାରିଖ ପର୍ଯ୍ୟନ୍ତ କୋର୍ଟ କର୍ତ୍ତୀଙ୍କୁ ଅନ୍ତରୀଣ ସୁରକ୍ଷା ପ୍ରଦାନ କରିଛନ୍ତି। ସ୍ବତନ୍ତ୍ର ବିଚାରପତି ଓ ପି ସାଇନି ଏହି ମାମଲାର ବିଚାର କରିଥିଲେ। ପ୍ରବର୍ତ୍ତନ ନିର୍ଦ୍ଦେଶାଳୟ ପକ୍ଷରୁ ଏହି ମାମଲାରେ କର୍ତ୍ତୀଙ୍କ ଆଗୁଆ ଜାମିନ ଆବେଦନ ଉପରେ ରିପୋର୍ଟ ଦାଖଲ କରିବା ପାଇଁ ତିନି ସପ୍ତାହ ସମୟ ମାଗିଥିବାରୁ ସ୍ବତନ୍ତ୍ର କୋର୍ଟ କର୍ତ୍ତୀଙ୍କୁ ସୁରକ୍ଷା ପ୍ରଦାନର ନିଷ୍ପତ୍ତି ନେଇଛନ୍ତି। ଏହି ସମୟରେ ଇଡିର ମୁଖ୍ୟ ସିଙ୍ଗାପୁର ଗସ୍ତରେ ରହିଥିବାରୁ ରିପୋର୍ଟ ପ୍ରସ୍ତୁତିରେ ବିଳମ୍ବ ହେଉଛି ବୋଲି ଇଡି ପକ୍ଷରୁ ସୂଚନା ପ୍ରଦାନ କରାଯାଇଛି।

Categories
ଆଜିର ଖବର

ବିଛା ମନ୍ତବ୍ୟ ପାଇଁ କୋର୍ଟରେ ହାଜର ହେବାକୁ ଥରୁରଙ୍କୁ ସମନ

ଶନିବାର ଦିଲ୍ଲୀର ଏକ କୋର୍ଟ ବରିଷ୍ଠ କଂଗ୍ରେସ ନେତା ଶଶୀ ଥରୁର୍‌ଙ୍କୁ କୋର୍ଟରେ ହାଜର ହେବା ପାଇଁ ସମନ ଜାରି କରିଛନ୍ତି। ପ୍ରଧାନମନ୍ତ୍ରୀ ମୋଦିଙ୍କୁ ଶିବଲିଙ୍ଗ ଉପରେ ଥିବା ବିଛା ସହିତ ତୁଳନା କରିବା ମନ୍ତବ୍ୟକୁ ନେଇ ଅଭିଯୋଗ ଆସିବା ପରେ ଜୁନ୍‌ ୭ ତାରିଖରେ କୋର୍ଟରେ ହାଜର ହେବା ପାଇଁ ନିର୍ଦ୍ଦେଶ ଦେଇଛନ୍ତି କୋର୍ଟ। ବିଜେପି ନେତା ରାଜୀବ ବବ୍ବରଙ୍କ ଅଭିଯୋଗ ଉପରେ ବିଚାର କରି କୋର୍ଟ ଏହି ନିଷ୍ପତ୍ତି ଶୁଣାଇଛନ୍ତି। ଅକ୍ଟୋବର ୨୦୧୮ରେ ବେଙ୍ଗାଲୁରୁ ସାହିତ୍ୟ ଉତ୍ସବରେ ଥରୁର୍‌ ଏହି ବିବାଦୀୟ ବୟାନ ଦେବ ସହିତ ଏହା ଜଣେ ଆରଏସ୍‌ଏସ୍‌ ନେତାଙ୍କ ଉକ୍ତି ବୋଲି କହିଥିଲେ। ଏହା ତାଙ୍କର ଧାର୍ମିକ ଭାବନାକୁ ଆଘାତ ପହଞ୍ଚାଇଛି ବୋଲି ଅଭିଯୋଗ କରି ମାମଲା ଦାୟର କରିଥିଲେ ବବ୍ବର। ସହକାରୀ ମାଜିଷ୍ଟ୍ରେଟ୍‌ ସମର ବିଶାଲ ଏହି ମାମଲାର ବିଚାର କରିଥିଲେ।

Categories
ଆଜିର ଖବର

କେଜ୍ରିଓ୍ବାଲ, ସିସୋଦିଆ ଏବଂ ଯୋଗେନ୍ଦ୍ର ଯାଦବଙ୍କ ବିପକ୍ଷର ଜାମିନ ବିହୀନ ପରଓ୍ବାନା

ଦିଲ୍ଲୀର ଏକ କୋର୍ଟ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ଏବଂ ଉପ ମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ବିପକ୍ଷରେ ଏକ ଜାମିନ ବିହୀନ ପରଓ୍ବାନା ଜାରି କରିଛନ୍ତି। ଏମାନଙ୍କ ସହିତ ସ୍ବରାଜ ଇଣ୍ଡିଆ ଦଳର ପ୍ରତିଷ୍ଠାତା ଯୋଗେନ୍ଦ୍ର ଯାଦବଙ୍କ ନାମରେ ମଧ୍ୟ ପରଓ୍ବାନା ଜାରି କରାଯାଇଛି। ଏହି ତିନି ଜଣଙ୍କ ବିରୋଧରେ ୨୦୧୩ରେ ରହିଥିବା ଏକ ଅପରାଧିକ ମାମଲା ଉପରେ ବିଚାର କରି କୋର୍ଟ ଏହି ଆଦେଶ ଶୁଣାଇଛନ୍ତି। ତିନି ଜଣଙ୍କ ବିରୋଧରେ ଜାରି ହୋଇଥିବା ଏନ୍‌ବିଡବ୍ଲ୍ୟୁ ର ଉତ୍ତର ନଦେବା ପରେ ମାଜିଷ୍ଟ୍ରେଟ୍‌ ସମର ବିଶାଲ ଏହି ଆଦେଶ ଦେଇଛନ୍ତି। ଏପ୍ରିଲ୍‌ ୨୯ରେ ମାମଲାର ଶୁଣାଣି ହେବ। ଉଲ୍ଲେଖଯୋଗ୍ୟ ଯେ, ୨୦୧୩ରେ ଦିଲ୍ଲୀର ଜନୈକ ଓକିଲ ସୁରେନ୍ଦ୍ର କୁମାର ଶର୍ମା ଏହି ମାମଲା ଦାୟର କରିଥିଲେ। ଶର୍ମାଙ୍କୁ ଦଳୀୟ ଟିକଟ ଦିଆଯିବା ପରେ ସେ ନାମାଙ୍କନ ଦାଖଲ କରିଥିଲେ ଏଆଂ ପରବର୍ତ୍ତୀ ସମୟରେ ତାଙ୍କର ଟିକଟ ପ୍ରତ୍ୟାହର କରି ନିଆଯାଇଥିଲା। ଏହା ତାଙ୍କର ସମ୍ମାନ ହାନି କରିଥିବା ନେଇ ସେ ମାମଲା ଦାଏର କରିଥିଲେ।

Categories
ଆଜିର ଖବର

ଅଚେତ ହେଲେ ମହାରଥୀ, ଫ୍ଲାଇଂ ସ୍କ୍ବାର୍ଡ ଟିମ୍‌ ଆକ୍ରମଣ ଘଟଣାରେ ହୋଇଛନ୍ତି ଗିରଫ

ପିପିଲି ବିଜେଡି ବିଧାୟକ ପ୍ରାର୍ଥୀ ପ୍ରଦୀପ ମହାରଥୀଙ୍କୁ ଗିରଫ କରାଯିବା ପରେ କୋର୍ଟଚାଲାଣ କରାଯାଇଛି। ସୋମବାର ଅପରାହ୍ନରେ କୋଟରେ ହାଜର ହେବା ସମୟରେ ମହାରଥୀଙ୍କ ସ୍ୱାସ୍ଥ୍ୟବସ୍ଥା ବିଗିଡି ଯାଇଥିଲା। ଏଥିପାଇଁ ପ୍ରଦୀପ ମହାରଥୀ ଅଚେତ ହୋଇଯାଇଥିଲେ। ରବିବାର ବିଳମ୍ବିତ ରାତିରେ ଫ୍ଲାଇଂ ସ୍କ୍ୱାର୍ଡ ଟିମ ଉପରେ ଆକ୍ରମଣ କରିଥିବା ଅଭିଯୋଗରେ ମହାରଥୀଙ୍କୁ ଗିରଫ କରାଯାଇଛି। ସଠିକ୍‍ ତଥ୍ୟ ଆଧାରରେ ମହାରଥୀଙ୍କୁ ଗିରଫ କରାଯାଇଥିବା ଏସପି କହିଛନ୍ତି। ଏହି ଘଟଣାରେ ଯାଞ୍ଚ ଟିମର ୫ଜଣ ସଦସ୍ୟ ଆହତ ହୋଇ କ୍ୟାପିଟାଲ ହସ୍ପିଟାଲରେ ଭର୍ତ୍ତି ହୋଇଥିଲେ। ଭୁବନେଶ୍ବରର ସ୍ବତନ୍ତ୍ର କୋର୍ଟରେ ମହାରଥୀଙ୍କୁ ହାଜର କରାଯାଇଥିଲା।

Categories
ଆଜିର ଖବର

ଗୁଗୁଲ୍‌ ପେ’ର ବୈଧତା ନେଇ ଆରବିଆଇକୁ କୋର୍ଟଙ୍କ ନୋଟିସ୍‌

ଲୋକପ୍ରିୟ ୟୁପିଆଇ ପେମେଣ୍ଟ ଆପ୍ଲିକେସନ୍‌ ଗୁଗୁଲ୍‌ ପେ’ର ବୈଧତା ନେଇ ପ୍ରଶ୍ନ ଉଠାଇଛନ୍ତି ଦିଲ୍ଲୀ ହାଇକୋର୍ଟ। ଏନେଇ କୋର୍ଟଙ୍କ ପକ୍ଷରୁ ଭାରତୀୟ ରିଜର୍ଭ ବ୍ୟାଙ୍କକୁ ଏକ ନୋଟିସ ମଧ୍ୟ ଜାରି କରାଯାଇଛି। ଏହା ସହିତ ଗୁଗୁଲ୍‌ର ଡିଜିଟାଲ ପ୍ଲାଟ୍‌ଫର୍ମକୁ ମଧ୍ୟ ଉତ୍ତର ରଖିବା ପାଇଁ ମଧ୍ୟ ନିର୍ଦ୍ଦେଶ ଜାରି କରାଯାଇଛି। ଅନୁମତି ନଥାଇ ଗୁଗୁଲ୍‌ ପେ ଅର୍ଥ ଦେଣନେଣ ଚଲାଇଥିବା ଅଭିଯୋଗ ଆସିବା ପରେ ଏହି ମାମଲା ହୋଇଛି। ଭାରତରେ ଅର୍ଥନୈତିକ କାରବାର ନିମନ୍ତେ ଆରବିଆଇ ନିକଟରୁ ଏକ ଅନୁମତି ପତ୍ର ନେବାକୁ ପଡିଥାଏ। ସମୁଦାୟ ୮୨ଟି କମ୍ପାନୀ ଦେଶରେ ୟୁପିଆଇ ଦେଣନେଣ ପାଇଁ ଅନୁମତି ନେଇଥିବା ବେଳେ ଏହି ତାଲିକାରେ ଗୁଗୁଲ ପେ’ର ନାମ ନାହିଁ। ଅଭିଜିତ୍‌ ମିଶ୍ରଙ୍କ ଦ୍ବାରା ଦାଖଲ ହୋଇଥିବା ଯାଚିକା ଉପରେ ବିଚାର କରି ମୁଖ୍ୟ ବିଚାରପତି ରାଜେନ୍ଦ୍ର ମେନନ ଏବଂ ଜଷ୍ଟିିସ୍‌ ଅନୁପ ଜୟରାମ ଭାମ୍ଭାନିଙ୍କ ଖଣ୍ଡପୀଠ ଏହି ନୋଟିସ୍‌ ଜାରି କରିଥିଲେ। ଏହି ମାମଲାରେ ଗୁଗୁଲ୍‌ ପକ୍ଷରୁ କୌଣସି ପ୍ରତିକ୍ରିୟା ପ୍ରକାଶ କରିନାହିଁ। ୨୯ ଏପ୍ରିଲ୍‌ରେ ମାମଲାର ବିଚାର ପାଇଁ ତାରିଖ ଧାର୍ଯ୍ୟ କରିଛନ୍ତି କୋର୍ଟ।

Categories
ବିଶେଷ ଖବର

ବେଚାରା ଏମ.ନାଗେଶ୍ଵର ରାଓ, କ୍ଷମତା ଯୁଦ୍ଧରେ ଅସହାୟ ବଳିର ବୋଦା ମାତ୍ର!!

ସମୀକ୍ଷା ବ୍ୟୁରୋ

ଗତକାଲି ବୋଧହୁଏ ଭାରତର ସୁପ୍ରିମ କୋର୍ଟର ମାନ୍ୟବର ମୁଖ୍ୟ ବିଚାରପତି ସବୁଠୁ ଅଧିକ କ୍ରୋଧିତ ହୋଇକି ବସିଥିଲେ।ସିବିଆଇ ର ଅନ୍ତରୀଣ ନିର୍ଦ୍ଦେଶକ ଥିବା ଏମ. ନାଗେଶ୍ଵର ରାୟଙ୍କ ବିରୋଧରେ ଅଦାଲତ ଅବମାନନା ମାମଲାର ବିଚାର କରି ମାନ୍ୟବର ମୁଖ୍ୟ ବିଚରପତିଙ୍କ ବେଞ୍ଚ ରାଓଙ୍କୁ ସମ୍ବିଧାନର ଧାରା ୧୨୯ ଅନୁଯାୟୀ  ଏକ ଲକ୍ଷ ଟଙ୍କାର ଜୋରିମାନା କରିବା ସହିତ ତାଙ୍କୁ ଅଦାଲତର ଏକ କୋଣରେ ଦିନସାରା ବସି ରହିବାକୁ ନିର୍ଦ୍ଦେଶ ଦେଇଥିଲେ। ଏହାକୁ ଆଇନ ଦୃଷ୍ଟିରୁ ହୁଏତ ଅଳ୍ପ ସମୟର ଜେଲ ଦଣ୍ଡ ବୋଲି କୁହାଯାଇପାରିବ। ଆଉ ଟିକେ ହାଲୁକା ଭାବରେ ବିଚାର କାଲେ ଶ୍ରେଣୀର ଉଦ୍ଧତ ଓ ଅମାନିଆଁ ଛାତ୍ରକୁ ଦଣ୍ଡିତ କରିବା ଲାଗି ଯେମିତି ଶ୍ରେଣୀ ଗୃହ ବାହାରେ ଛିଡା କରାଇ ଦିଆଯାଏ, ରାଓ ଙ୍କ ଅବସ୍ଥା ଠିକ ସେୟା ହୋଇଥିଲା। ଗୋଟେ ପକ୍ଷରେ ସିବିଆଇକୁ ଏ ଦେଶର ସବୁଠୁ ବଡ ତଦନ୍ତକାରୀ ସଂସ୍ଥା ବୋଲି କୁହାଯାଉଥିବା ବେଳେ ଏହାର ପ୍ରମୁଖ ଅଧିକାରୀଙ୍କ ଲଜ୍ଜାଜନକ ଅବସ୍ଥା ଦେଖି ଅହି ଅନୁଷ୍ଠାନ ପ୍ରତି ଲୋକଙ୍କର ମନୋଭାବ ଯେ କଣ ହେଉଥିବ, ସେଟା ବାସ୍ତବରେ ଚିନ୍ତାର ବିଷୟ।

ତେବେ କାହିଁକି ଏ ପ୍ରକାର ଲଜ୍ଜାଜନକ ପରିସ୍ଥିତି ଉପୁଜିଲା ଓ ସେଥିଲାଗି କିଏ ଦାୟୀ, ସେ କଥା ବିଚାର କରିବା ଜରୁରୀ। ବିହାରର ମୁଜାଫରପୁର ଠାରେ ଘଟିଥିବା ନାବାଳିକା ଯୌନ ଶୋଷଣ ମାମଲାର ତଦନ୍ତ କରୁଥିବା ସିବିଆଇ ର ଯୁଗ୍ମ ନିର୍ଦ୍ଦେଶକ ଅରୁଣ କୁମାର ଶର୍ମା ଏହି ତଦନ୍ତ କରୁଥିବା ସମୟରେ କୋର୍ଟର ନିର୍ଦ୍ଦେଶ ବିନା ବଦଳି ହୋଇପାରିବେ ନାହିଁ ବୋଲି ମାନ୍ୟବର ସୁପ୍ରିମ କୋର୍ଟ ଗତ ୩୧.୧୦.୨୦୧୮ ଓ ୨୮.୧୧.୨୦୧୮ରେ ସ୍ପଷ୍ଟ ନିର୍ଦ୍ଦେଶ ଦେଇଥିଲେ। ଏହାକୁ ଅବମାନନା କରି ତତ୍କାଳୀନ ସିବିଆଇର ଅନ୍ତରୀଣ ମୁଖ୍ୟ ଥିବା ଏମ.ନାଗେଶ୍ଵର ରାଓ ଶର୍ମାଙ୍କୁ ସିବିଆଇରୁ ରିଲିଭ କରିଥିଲେ। ତେବେ ସିବିଆଇ ରୁ ଅରୁଣ କୁମାର ଶର୍ମାଙ୍କୁ ସିଆଆରପିଏଫ କୁ ବଦଳି କରିବାର କ୍ଷମତା ରାୟଙ୍କର ନାହିଁ। ଶର୍ମାଙ୍କୁ ବଦଳି କରିବାର ନିର୍ଦ୍ଦେଶ କେନ୍ଦ୍ର କ୍ୟାବିନେଟର ନିଯୁକ୍ତି କମିଟି ଦେଇଥିଲା ଓ ଏ ନିଷ୍ପତ୍ତି ପର୍ସୋନେଲ ବିଭାଗ ସିବିଆଇ କୁ ଜଣାଇଥିଲେ। ଗୋଟେ ପ୍ରକାର ସରକାରୀ ନିଷ୍ପତ୍ତି କ୍ରମେ ଶର୍ମାଙ୍କୁ ବଦଳି କରା ଯାଇଥିଲା।

ସିବିଆଇର ମୁଖିଆ ଭାବରେ କୋର୍ଟର ନିର୍ଦ୍ଦେଶକୁ ସରକାରଙ୍କୁ ଜଣାଇ ଶ୍ରୀ ଶର୍ମାଙ୍କର ବଦଳିକୁ ଅଦାଲତର ବିନା ଅନୁମତିରେ କାର୍ୟକାରୀ କରାଯାଇପାରିବ ନାହିଁ ବୋଲି ସେ କହିବା କଥା। ରାଓ ସେକଥା ନକରି ପ୍ରଧାନମନ୍ତ୍ରୀ କାର୍ୟାଳୟର ନିର୍ଦ୍ଦେଶ (ପର୍ସୋନେଲ ବିଭାଗ ପ୍ରଧାନମନ୍ତ୍ରୀଙ୍କ ଅଧୀନ) କୁ ରାଓ ମାନିଛନ୍ତି। ଶ୍ରୀ ରାଓ ସରକାରଙ୍କର ଲୋକ ଭାବରେ କାମ କରିବାକୁ ଯାଇ ଆଇନର ଶାସନକୁ ଅଣଦେଖା କାଲେ। ଯାହାର ଶାସ୍ତି ତାଙ୍କୁ ମିଳିଲା।

ହେଲେ ଏହାର ଅସଲ ଅପରାଧୀ କଣ ଶ୍ରୀ ରାଓ? ବରଂ କୁହାଯାଇପାରେ ସେ ହେଉଛନ୍ତି, ଏ କ୍ଷେତ୍ରରେ ଅସହାୟ ବଳିର ବୋଦା। ପୂର୍ବତନ ସିବିଆଇ ନିର୍ଦ୍ଦେଶକ ଆଲୋକ ବର୍ମାଙ୍କୁ ରାତାରାତି ସିବିଆଇରୁ ବିଦା କରି ତାଙ୍କ ଜାଗାରେ ରାଓଙ୍କୁ ସରକାରଙ୍କ ମୋହରା ଭାବରେ ସିବିଆଇରେ ଅବସ୍ଥାପିତ କରାଯାଇଥିଲା। ନିଜ ପଦ ବଞ୍ଚାଇବାକୁ ଯାଇ ସେ ସରକାରଙ୍କର ସବୁ ବୈଧ ଓ ଅବୈଧ ନିଷ୍ପତ୍ତିକୁ କାର୍ୟକାରୀ କରାଉଥିଲେ। ତାରି ଭିତରେ ଅରୁଣ ଶର୍ମାଙ୍କୁ ବଦଳି କରିବାର ଚାପ ସେଇ ଉପରୁ ହିଁ ଆସିଛି। ସରକାରଙ୍କୁ ସନ୍ତୁଷ୍ଟ କରିବାକୁ ଯାଇ ଆଜି ରାଓ ଅଦାଲତରେ ଦଣ୍ଡିତ ହୋଇଛନ୍ତି।

ନାଗେଶ୍ଵର ରାଓ ସରକାରଙ୍କ ବୋଲକରା ହୋଇ ଚିଟ ଫଣ୍ଡ ମାମଲାରେ ଅହେତୁକ ତତ୍ପରତା ଦେଖାଇ କୋଲକାତା ପୋଲିସ କମିଶନରଙ୍କୁ ଗିରଫ କରିବାକୁ ବାହାରିଥିଲେ। ରାଜନୈତିକ ବିରୋଧ ଓ ସୁପ୍ରିମ କୋର୍ଟଙ୍କ ନିର୍ଦ୍ଦେଶ କ୍ରମେ ସେ ଗିରଫଦାରୀ ଟଳିଛି। ତେବେ ଏହାର ମୂଲ୍ୟ ରାଓଙ୍କୁ ବ୍ୟକ୍ତିଗତ ସ୍ତରରେ ଦେବାକୁ ପଡିଛି। ତାଙ୍କ ଘର ଓ ତାଙ୍କ ସ୍ତ୍ରୀଙ୍କ ବ୍ୟବସାୟ ଉପରେ ପଶ୍ଚିମ ବଙ୍ଗ ପୋଲିସ ଚଢଉ କରିଛି। ଉପରର ମାଇଁ ବାପ ମାନଙ୍କ ନିର୍ଦ୍ଦେଶରେ କାମ କଲେ, ପରିଣତି ଏୟା ହିଁ ହୁଏ।

ତେବେ ଏ ପ୍ରସଙ୍ଗର ସବୁଠୁ ବଡ ପ୍ରଶ୍ନ ହେଲା, ଯଦି ବଦଳି ଆଦେଶ କାର୍ୟକାରୀ କରି ନାଗେଶ୍ଵର ରାଓ ଦୋଷୀ, ତାହେଲେ ବଦଳି ଆଦେଶ ଦେଇଥିବା ଓ ତାକୁ ତୁରନ୍ତ କାର୍ୟକାରୀ କରାଇବାକୁ ନିର୍ଦ୍ଦେଶ ଦେଇଥିବା ପ୍ରଧାନମନ୍ତ୍ରୀଙ୍କ ପର୍ସୋନେଲ ବିଭାଗ ଏଥି ପାଇଁ ଦୋଷୀ ହେବନାହିଁ କାହିଁକି??